L’Angolo de la Wanda – Novembre 2017 – “La barba de Canela”

…a cura di Graziano M. Cobelli

gcobelli05@gmail.com

Quatro Ciàcoe: da Verona

La barba de Canela

A Verona, quando ’na roba la stufa, se dise che la te fa vegner “la barba de Canela”. Che ’na roba noiosa la fassa “créssar la barba” se lo dise in tuto el mondo, ma parché proprio “de Canela”? Notemo la “maiuscola”: “Canela” no’ l’è mia la spessia a tubeti che se dòpara nel strudel… l’è un nome de persona! Un nome ligà a ’na storia de quasi un secolo fà… ’Na storia intrigante che par ani à tegnù l’Italia spacà in dó: quela del “Smemorato de Collegno”. Andemo a rivédarla.

Ano 1926… a l’inissio de Marso, a Torin, i carabinieri i ferma un barbon che sta robando in un çimitero. L’omo l’è confuso, no ’l sa dir el so nome… no ’l sa dir da dove el vien, né parché l’è lì. L’è un bel’omo, barba longa ma curà, su i 45 ani, el parla italian… e anca ben, come ’na persona istruida. Vien ciamà un dotor a visitarlo… la diagnosi l’è “amnesia” e cusì l’omo el vien portà al Manicomio Reale de Collegno. Passa un ano. El passiente 44170 l’è senpre calmo, beneducato, gentile… ma la memoria no la ghe torna.
Nel 1926 la prima guera mondiale l’era finì da pochi ani e i “dispersi” i era ancora tanti, cusì la “Domenica del Corriere” la gavéa ’na rubrica intitolà “Chi li ha visti?” dedicà proprio a casi come questo. El 6 febrar 1927 sul giornal vien publicà la so foto. Tra le çentenara de risposte che riva, una la par quela giusta: l’è de ’na dona de Verona, Giulia Canella, sicura de riconóssar ne la foto proprio so marì Giulio… professor de filosofia, giornalista, dó fiói, capitan de fanteria e disperso in Macedonia dal 1916. Cusì la signora Giulia la vien invità a Collegno a védar el passiente de persona.
Al primo incontro ela l’è subito sicura che l’è lu… lu invesse el par incerto, ma pian a pian el scominçia a ricordarse de ela, de i fiói, de la casa… finché i se strense insieme, piansendo. L’omo cusì el vien riconossù come Giulio Canella, la mojer la se le porta a Verona e tuta l’Italia la gioisse par naltro disperso tornà finalmente a casa. Lieto fine? Nò… parché qualche giorno dopo a la questura de Torin riva ’na létera anomina con su scrito che el “smemorato” in realtà l’è un çerto Mario Bruneri, anarchico, ladruncolo e ricercà da la polissia. Cusì el “smemorato” el deve tornar a Torin par naltro riconossimento. Mojer, foto, amici, fiói e parfin le inpronte digitali, tuto el dise che l’omo l’è proprio Bruneri… Ma Giulia Canella la insiste che invesse l’è so marì, e la alsa un tal putiferio che tuta Italia la vien coinvolta. Se forma capanèi… ghè quei che partegia par Canella e quei sicuri che l’è Bruneri.

Nel 1929 se riva al processo. I giornài i segue la situassion con titoloni da prima pagina. No se parla de altro. Specialmente a Verona (dove i Canella i ga la casa e i è conossù) la foto del “smemorato” col barbon l’è dapartuto… e l’è da lì che nasse el termine “barba de Canela” come esenpio tipico de “barba granda”. Ma la storia come vala a finir? La se tira par le longhe (come tute le robe italiane), rivando fin in Cassassion. Prove e testimoni i fa pensar che l’omo el sia Bruneri, ma Giulia Canella a ogni processo perso la ghe ne invia uno novo… disposta a difèndar anca co i denti el so “marì” ritrovà. Comunque nel 1931 el tribunal el stabilisse ’na òlta par tute che el “smemorato” l’è Bruneri, e come conseguensa i ghe fa scontar i dó ani de preson che ancora pendéa su de lu. Finì la galera tuta la fameja (che durante i processi l’era cressù de altri tri fiói, a prova del fato che anca soto le coèrte le robe ’ndava ben) la s’à trasferì in Brasile.
A Rio l’omo l’è stà registrà come Giulio Canella e dopo aver inparà el portoghese el s’à rimesso a far el professor, tegnendo conferense e lessioni fin al 1941: data de la so morte. Giulia Canella l’è campà invesse fin al 1977, çercando par tuto el resto de la vita de far riconóssar al governo italian che l’omo che par dies’ani la ga avù nel leto l’èra veramente so marì. El dubio comunque el resta… e in novant’ani ’sta storia no’ l’à mai finì de dar spunti al teatro (Pirandello: “Come tu mi vuoi” del 1931), a film (“Lo smemorato di Collegno” del 1962 e “Uno scandalo perbene” del 1984), miniserie in TV, mostre, libri, ecc. Nel 2009 e nel 2014 la trasmission “Chi l’ha visto” l’à çercà par dó òlte de dar ’na risposta precisa usando el test del DNA, ma anca lì i risultati no i è stà definitivi.
Ci èrelo “lo smemorato”? Probabilmete no lo savaremo mai.
Finisso qua. Ò çercà de contarve in poche righe tuta ’sta strana storia: spero che la ve sia piasù e de no’ averve fato vegner… la barba de Canela!

Wanda Girardi Castellani
Mirco Castellani