L’Angolo de la Wanda – Aprile 2017 – “Cronache de ’n altro mondo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Cronache de ‘n altro mondo

Nel caos frenetico de la vita de ancó, dove i unici valori restà par che i sia “schei, sesso e potere”, i è tante le abitudini, le tradissioni e le usanse che se sta perdendo. Par esempio a la vigilia de Pasqua me mama l’andava a tòrse, da la “pidela” ne la cesa de Santa Toscana, l’aqua benedeta che dovéa servir par farse el segno de la croçe quando che le canpane, a l’indoman ’na òlta desligade, le avesse dà al mondo l’anuncio de la resuression de Cristo.
Quel giorno po’ no mancava mai in mèso la tola la “brassadela” e no’ l’era mia solo a Pasqua che se ringrassiava el Signor prima de métarse a magnar le robe semplici (ma bone) de la nostra tradission.
Al Luni de l’Angelo po’ se preparava i ovi duri. Dopo averli fati bójar, tuta la fameja la se dava da far co i colori par inpiturarli in maniera artistica… par dopo andarli a magnar a la Fontana del fero o a quela de Somaval, al seguito de qualche goto de vin slongà con la sampagneta (quela co la picia de vero che andava su e zo).
Ma el ricordo par mi più belo l’è ligà al “fioreto de la Madona”, a Magio. Dal primo del mese, dopo çena se inviàimo a la cesa de San Nazar dove, finì la rècita de le litanìe, un “camilian” del viçin santuario del “Paradiso” el tegnéa i “fedeli” inciodà su le careghe con le so prèdiche infiorà de storie alegre… del tipo: “M’è vegnù in confessional ’na veceta che la m’à dito de védar Sant’Antonio ’pena che la va in leto. Go domandà: − Cosa ùsela béar a la sera? – Risposta: − Dó-tre sgnapete!…− Beh, nona, la ghe ne béa ’n’altra e la vedarà anca San Francesco!” Par scoltarlo, de le òlte, se portàimo da casa el sgabel o ’n cussin, par èssar sicuri de sentarse zo. Finì la funsion, dopo ’na sosta ne la “rotonda” fòra da la cesa, se tornava a casa. Ma pian a pian…. par darghe modo a fiói e parenti de scambiarse quatro ciàcole. Po’… nel prà davanti a casa, co’ l’ocasion le mame e più ancora i papà, i ne lassava ’ndar a far el zugo de le “cucuce”, diséndose tra de lori: “Granfati che proprio dopo el ‘fioreto’ i fassa qualcosa de mal?”
Par tute le bone robe, verso ’na çerta ora da le finestre partiva el coro de le mame: “Vègni-sù! Che l’è ora!!!”… e ci fasèa finta de èssar “sordo” el vegnéa recuperà de persona a colpi de “stropa”.

Sensa scomodar la tradission americana de Halloween (rivà a métar radise anca qua, se no’ altro par farne spèndar un po’ de schèi in màscare e suche de plastica), noialtri usàimo far la ”lumera” (o crapa da morto) con ’na suca baruca! Se la udava scavàndola con un cuciar, dopo se ghe intajava oci, naso e boca e a la fine se la sistemava, con drento ’na candela impissà, su la finestra de casa o su un mureto. Se faséa a gara a ci le faséa più spaentosa. A nojaltri buteleti de ’sto mondo che el par inventà, no ne passava gnanca par la testa de andar a ore pìcole a sonar i campanèi de le case, sbarando un minacioso “dolcetti o scherzetti”. Al du de novembre, dopo la visita al çimitero (ciamà a Verona “albergo a i du leoni”) ghera la rituale fermada a la laterìa “Zocca” par el “cào de late” più bon de la çità…. e visto che ghèrimo, se faséa anca scorta de caròbola, tera-catù, legneti dolçi, cordoni de rigolissia e altre specialità in vendita dal bon “Checheto”, andove, spetando de èssar servidi se podèa far el passìssego sul coriman dorà fissà al banco.
Ma continuando par via XX Setembre dove adesso ghè l’uficio postale, ghera ’na òlta un “bazar” ciamà “paciugo” dove inmucià par tera, e su scafài carghi de pólvar, ghera in vendita de tuto. Diese nùmari più avanti de “paciugo” ghera la botega del “bòle”… I paroni (che i vegnéa da la Toscana) oltre a la vendita al banco i girava co ’l caretin anca par le strade. La “bòle”, drento ’na grande teja de rame sistemà su un sgabel pieghevole, la vegnéa vendù, sigando in toscano: “È calda… la bòlle!” (eco parché a Verona al castagnacio ghe ciamemo “bòle”). El presso l’era de diese schèi a feta, compreso l’inmancabile “pesseto” (’na zonta che, par la forma, la ricordava proprio un “pesse”).

E come l’èra bona, ’sta “bòle”… la gavéa un gusto che no ò mai ritrovà in quela che çerte pastisserìe, o panetierìe le mete in vetrina su un elegante centrin. La farina de castagne te pol ancora troarla ne i gandi magasini… mi, paraltro, no son mai riussì a far ’na “bòle” decente, usando el forno de la stua de casa.
De boteghe de “bòle” in borgo Venessia ghe n’era dó: una in via XX Setembre e una in via San Nazar dove oltre che la “bòle” i vendéa anca el “papassin” (ua passa e pignói) e tuta ’na serie de altri dolçi confessionà con la farina de castagne.
Mi da butela gavéa l’uficio davanti a una de le dó boteghe… e ogni tanto traversava la strada, andando fóra de scarafon, par po’ métar nel calto de la scrivania el “malopo” conquistà. El me “paron”, sentendo el profumo che come un penel magico l’avéa inbonbegà i muri de l’uficio, el me minaciava: “Dàmene un tòco, senò te licensio.”

Da butina me papà el me diséa: “Se te fè la bràa, te porto in Bra a védar i siori che magna el gelato” In realtà con me mama al seguito el me portava in ’na gelateria che la stava ’drio el “Liston” dove che i gavéa la specialità de la “cassata siciliana”. El ghe ne ordinava du più un piatin udo… drento al qual i me ne scudelava mèza paromo; e a dir la verità, ripensàndoghe, me fa rìdar la spartission che i faséa: lori i ghe ne magnava metà, par dàrmene una intiera a mi.
E come no proar nostalgia par i bancheti de Santa Lussia che me papà el me portava a védar stando in coparela la sera de la vigilia. El “tacuìn” l’era magro ma ghe scapava senpre el balonçin o el “ratin de cartapesta”: te lo faséi partir tirando un fil e dopo el coréa de qua e de la par la casa. El vendidor (ciamado con quela famosa parola usà da Cambronne a Waterloo…) el te proponéa anca “Tonino-sta-sempre-in-piedi”. Quanto al balonçin, de solito el me scapava de man andando a “far contenti i angeleti” (come cantava Rascel), e tuti i ani me papà el giurava che no’ el l’avarìa crompado più… e invesse tuti i ani el me lo crompava istesso!
Ma quanti i è i ricordi che i se inmucia, sbrissiando dal sbaceto de la finestrela verta nel me sarvel: sento che podarìa ’ndar avanti fin doman matina. Son come un cassador de farfale che col so retin el çerca de ciapàrghene almanco una da la nuvola colorada che ghe rùgola inboressà intorno a la testa. Vorìa fissarli tuti con un ucin parché no i scapa via e poderli cusì ritrovar tuti intorno a mi quando vegnarà note.

Wanda Girardi Castellani
Mirco Castellani