L’Angolo de la Wanda – Luglio / Agosto 2016 – “Santi veronesi…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Santi veronesi…

Cos’elo un santo? Sicuramente ’na persona speciale! Ma anca Einstein e Colombo i era persone speciali… la difarensa l’è che un santo l’è “speciale” nel métarse al servissio de i altri, riconossendo in ogni persona, par quanto umile che la sia, l’imàgine vivente de Dio. Anca Verona la ga i so santi… el più famoso l’è San Zen, ma el nostro patrono l’era nato in Africa e ancò vorìa parlarve solo de i santi nati proprio ne la nostra çità.
Scominsiemo alora con un vescovo de l’VIII secolo: Annone.
El so nome l’è ligà principalmente a dó eventi storici: el primo l’è la traslassion de le relichie de i santi protocristiani Fermo e Rustico da Trieste a Verona… el secondo l’è l’aver calmà Carlomagno quando nel 774 l’è vegnù qua a çercar el principe Adelchi dopo la vitoria sul re longobardo Desiderio.

Par trovar el secondo santo dovemo far un salto de çinque secoli: Pietro da Verona. Nato nel 1205 in ’na fameja càtara, fin da subito el se destaca da l’eresia de i soi, deventando (’na òlta messo el sajo da frate domenican) uno de i più forti predicatori anti-eretici del so tenpo. Purtropo Pietro el farà ’na bruta fine: nel 1252 el vien sassinà vissin a Seveso, piantàndoghe ’na rengaja ne la testa… Così da alora ogni olta che i à volù rafigurarlo i l’à senpre fato, meténdoghe (apunto) ’na rengaja de traverso a la cèrega.

Fasemo ancora ’n altro salto de çinque secoli par trovar ’na dona: Maddalena di Canossa. Nata a fine Seteçento, fin da giovane la sente la vocassion de farse mònega e nel 1791, a disisète ani, la próa a entrar tra le Carmelitane scalse. Però la pace del chiostro no la ghe dà la serenità che la çerca: in giro la vede continuamente miseria, gente sbandà, sensa casa… così nel 1808 la crea a Verona l’istituto de le “Figlie della carità”, con el scopo de dar assistensa a tuti i poareti e i malà che ghe n’avesse ’vù bisogno. In poco tenpo, grassie anca a le so conossense tra la nobiltà, la riesse a far saltar fora i schèi par vèrsar altri istituti a Venezia, Milano, Bergamo e Trento. Nel 1828 Papa Leone XII el conferma la regola de le “Canossiane” e dó ani dopo nasse anca el ramo maschile de la congregassion. Maddalena di Canossa l’è stà anca ’na persona coltissima: nel 1835, dopo la so morte, è stà riunì un epistolario de oltre 3.000 létere… con tante indirissà anca a i potenti del so tenpo.

Contemporaneo de Maddalena l’è Don Gaspare Bertoni. A lu ghe vien dà nel 1808 la diression del primo istituto canossiano de Verona… però la so idea de come jutar el prossimo el le porta a fondar nel 1841 la congregassion de i “Stimatini”: un ordine de preti specializà ne la predicassion, ne l’insegnamento e ne le missioni in giro par el mondo (un po’ come i Gesuiti). Purtropo i ultimi ani de vita de Don Bertoni i è stà tormentà da ’na grave malatìa, con dolori al limite del soportàbile e l’inpossibilità de lassar el leto.

Se finora v’ò parlà de santi vissù in altre epoche, Don Giovanni Calabria l’è ’n omo de i nostri tenpi. Nato nel 1873 e morto nel 1954 l’à visto tute e dó le guere, l’à visto l’evolussion dal caval a l’aereo e, come Maddalena de Canossa e Don Gaspare Bertoni, anca lu l’è stà un santo “manager”: de quei che se fa sù le màneghe, che domanda schèi a chi i schèi ghe l’à e con quei “costruisse” istituti religiosi. El suo el se ciama “Poveri servi della Divina Providenza” e l’è nato par dar casa e assistensa (ma anca la possibilità de studiar) a fiòi poareti, orfani e abandonà. Adesso par strano che ghe ne fusse così bisogno… ma ricordémose che i è proprio i buteleti che le guere le lassa sensa casa e sensa fameja.
Con l’ultimo ò elencà çinque santi… Se çerchemo sul calendario, troveno però anca Sant’Euprepio, San Felice, San Lupicino, San Massimo, San Silvino e San Teodoro… tuti con un bel “da Verona” tacà al nome: però o no i era mia nati a Verona (come el nostro San Zen) o de lori in pratica se sa poco o gnente.
Cos’elo un santo? Uno che sa métar el so “èssar speciale” al servissio de i altri. Cissà quanti che ghe n’è in ’sto momento a Verona… a Verona, in Italia e in tuto el mondo. Nojaltri no lo savemo e forsi no lo savaremo mai… ma Dio el le sa!

Wanda Girardi Castellani
Mirco Castellani