L’Angolo de la Wanda – Aprile 2016 – “Custoza no l’è solo un vin”
…a cura di Graziano M. Cobelli
gcobelli05@gmail.com
Quatro Ciàcoe: da Verona
Custoza no l’è solo un vin
Tra Verona e el Lago de Garda ghè de le coline. Su una, tra i cipressi che ghe fa da corona, spunta alto un monumento bianco a forma de obelisco. La colina l’è quela de Custoza e davanti se vèrse ’n incantevole pianura piena de vigne, dove se produse quel famoso vin color oro, ciamà, apunto, Custoza. Ma ’sto paradiso l’à visto anca l’inferno: el monumento l’è in realtà ’n ossario e el segna el punto dove è stà conbatù dó batalie, la prima nel 1848 e la seconda nel 1866, tute e dó tra Piemontesi e Austriaci e tute e dó perse da i ‘nostri’ in un inutile bagno de sangue. Demo alora ’na ripassadina al Risorgimento.
El ’48 l’è stà l’ano dove è scominçià in tuta Italia i vari moti rivolussionari… l’era ’na bonba che spetava de scopiar fin dal 1814, quando, col Congresso de Vienna, era stà riportà in Europa la situassion precedente a le guere napoleoniche… o quasi: parché se prima el Veneto l’era libero adesso ghera i austriaci, e stessa situassion i ghe l’avéa in Lombardia! Così nel ’48 à ciapà in man le armi sia Milan (le famose Cinque Giornate) che Venezia (vedi Q.C. 6/2015 “Ehi de la góndola”), ciamando a gran voçe in aiuto el Piemonte!
El re Carlo Alberto el se sentiva un po’ “Davide contro Golia” a farghe guera a l’impero austro-ungarico (la super-potensa de l’epoca) ma con l’esercito ingrossà da i patrioti vegnù da tuta Italia e i rinforsi rivà da Napoli e dal Stato Pontificio el s’à butà ne l’impresa. L’inissio l’è stà anca bon: la Lombardia l’è stà traversà facilmente e la prima grossa batalia contro i austriaci, a Pastrengo, l’è finì con ’na vitoria. Ma dopo è sucesso l’inprevisto: el re de Napoli l’à ritirà el so esercito e ’l stesso l’à fato el Papa. Carlo Alberto el s’à trovà così da solo ne la gabia del leon. La gabia l’era Peschiera e el leon el maressial Radetzky. I dó eserciti i s’à scontrà a Custoza… e anca se i Piemontesi i à conbatù ben e con corajo, el risultato l’è stà la ritirata… ritirata finì el 9 Agosto del ’48 con l’armistissio de Salasco e più tardi con l’abdicassion del re. Inoltre i austriaci, ’na volta “sistemà” el Piemonte, i à podù concentrarse su la Repùblica de San Marco, che però l’è riussì a resìstar eroicamente fin a fine Agosto del ’49.
Dies’ani dopo, nel 1859, ghè stà la seconda guera de indipendensa (quela con la batalia de Solferino)… finì staolta con la vitoria de i Piemontesi e la liberassion definitiva de la Lombardia. Par el Veneto inveçe s’à dovù spetar la terza: quela del 1866. Quasi ’na guera-lampo, l’è durà solo da Giugno a Agosto. El re adesso l’era Vittorio Emanuele II e ormai el podéa ciamarse “Re d’Italia” dal 1861. El primo scontro fra el so esercito e quelo austriaco l’è stà de novo a Custoza e, come era sucesso disdot’ani prima, l’è finì con un disastro che à lassà sul canpo quasi 1.000 morti. Dopo la batosta inissiale el resto de la guera no l’è stà mèjo… ma visto che a la fine i austriaci i à perso, che a vìnsar i è stà i prussiani, che l’Italia l’era aleà a la Prussia… come penitensa l’Austria l’à dovù cédar el Veneto a la Francia che “brevi manu” la ghe l’à girà a l’Italia. Così, anca se solo grassie a un “tramacio diplomatico”, a la fine del 1866 tuto el Veneto el faséa parte de l’Italia (ma mancava ancora Trento e Trieste) e se podéa dedicarse finalmente a onorar i morti. Vissin a dove s’à conbatù la batalia de Solferino (e San Martino) è stà costruì nel 1880 ’na tore/faro alta 74 metri… ma anca Custoza la ga ’vù el so monumento: quel’obelisco alto 40 metri che ve diséa a l’inissio.
Col gusto un po’ macabro che se usava a l’epoca, dentro la base circolare del monumento è stà creà ’na serie de “scafài”, dal pavimento fin al sofito, con sora in fila mejara de teschi. Sì, teschi… e al centro el resto de i scheletri, ben inpilà in maniera ordinà. L’efeto l’è a dir poco inquietante… e dopo ’na visita se ris-cia de no dormir mia massa ben la note. Visto però che vita e morte i è sempre ligà, vissin a l’ossario gh’è un famoso ristorante: Villa Vento. Nata come Villa Canossa nel 1872 (cioè qualche ano prima de la costrussion de l’ossario) l’è stà dal 1949 el “buen retiro” del famoso tenor Giuseppe Lugo. Nel 1959 la casa l’è stà trasformà nel ristorante-museo Villa Vento e dal 1994 l’è deventà anca la sede del “Premio Lugo”, un premio che vien consegnà ogni ano a i cantanti lirici più famosi e del qual ve n’ò parlà tante volte.
Custoza: bel posto, bele coline e bon vin… Quel monumento bianco però el ne ricorda che èssar “Italiani”, nàssar “italiani”, no l’è mia stà sensa sacrifici: l’è costà la vita a tanti giovani. Rispetémola alora, sta pòra Italia!
Wanda Girardi Castellani
Mirco Castellani
