L’Angolo de la Wanda – Giugno 2015 – “Ehi! della gondola…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Ehi! della gondola…

“Ehi! della gondola, qual novità? Il morbo infuria… il pan ci manca.. sul ponte sventola bandiera bianca!” Ci no à mai sentì ’sti versi? Nissuno, penso… almanco nel Veneto! Ma ci pol dir de conóssar a che momento storico i è ligà? Probabilmente pochi… perciò adesso ve compagno a far du passi ne la nostra storia.
La famosa poesia la se ciama “L’ultima ora di Venezia” e l’è stà scrita da Arnaldo Fusinato, poeta e patriota de Schio. La parla de quando i bombardamenti austriaci del 1849 i à messo fine a la breve esistensa de la Repubblica de San Marco. Ma par capir cos’era sucesso, bisogna scominçiar da ’na çinquantina de ani prima, quando Napoleone l’è entrà in Italia par contrastar le fòrse austriache e piemontesi de la Prima Coalission. Come un’onda de piena el so esercito, dopo èssar passà strategicamente da la Liguria, l’à traversà la Lombardia fin a rivar, nel magio del 1796, fin dentro a i teritori venessiani: formalmente neutrali!

L’è qua che se inserisse anca l’episodio de le Pasque Veronesi: ne la nostra çità i francesi i avéa scominçià fin da subito, comportàndose da conquistadori, maltratando la gente e robando tuto quel che i podéa. Dopo diese mesi de soportassion a Verona è scopià la rivolta! ’Na rivolta però destinada a finir mal: l’èra impossibile par la gente comune tégnar testa a un esercito che l’era stà in grado de fermar parfin i austriaci! La punission l’è stà dura: i capi i è stà fusilà, la popolassion l’à dovù pagar ’na “multa” esorbitante e la çità intiera l’è stà ripulì de tute le so opere d’arte, compresa la pala de l’altar a San Zen (opera del Mantegna: dopo la restaurassion i n’à restituì la parte principale, ma el resto l’è ancora al Louvre). Comunque par tuto el resto del 1796 l’esercito francese e quel austriaco i à continuà a combàtarse su e zo par Veneto, Trentin e Friuli, rivando sempre più pericolosamente vissin a Venessia.
La Serenissima intanto la podéa solo star a vardar… no essendo stà in grado de star al passo co i tempi ormai l’era solo l’ombra de l’antica potensa: i so armamenti i era vèci e politicamente no la contava più gnente. Così, quando Napoleone el s’à presentà a Marghera con i canoni puntà, al doge Ludovico Manin no ghè restà altro da far che cavarse la bareta a “corno ducale” e dichiarar finì par sempre la so milenaria istitussion. L’era el 12 magio del 1797.
Però forsi no’ tuto l’era perso… i francesi in cambio i prometéa de crear la “Repubblica Italiana”, con tanto de Tricolor e ideali rivolussionari de “egalitè fraternitè e libertè”! A crédarghe i era in tanti… coréa parfìn voçe che la çità la podéa tornar a èssar la capitale de qualcosa! Grande l’è stà così la delusion quando, qualche mese dopo, Napoleone con el “Trattato de Campoformio” l’à regalà Venessia (con tuto el Veneto) a l’Austria, in cambio de la so libertà d’assion nel resto d’Europa. Oviamente i napoleònici, smobilitando, i s’à portà drio un pochi de “souvenir”: i cavài de San Marco, el leon che ghè in piassa, un po’ de quadri, l’oro del Bucintoro ecc. I austriaci che gavéa dà el cambio però i s’à fermà poco, visto che nel 1805 i francesi i era za bei che tornà (parché a Venessia se ghe torna sempre) par èssar definitivamente parà via nel 1814 quando Napoleone l’è stà spedì a l’Elba! Così quando l’ano dopo el Napo’ l’à perso tuto a Waterloo i austriaci, za che i gh’era, i s’à incamerà oltre che el Veneto anca tuta la Lombardia! Dopo… passa trent’ani. Trenta longhi ani durante i quali la gente la ricordava con nostalgia: “co’ San Marco dominava se disnava e se çenava… co’ la santa libertà s’à disnà e no s’à çenà… co’ la Croce de Lorena no se dìsna e no se çena!”

Rivemo così al 1848, quando ’profitando de i moti rivolussionari che stava nassendo un po’ in tuta Italia (far un ’48 l’è deventà un modo de dir che se usa ancora) anca Venessia, soto la guida de i patrioti Daniele Manin e Niccolò Tommaseo, la dichiara finalmente la so indipendensa da l’Austria! Vien così creà la Repùblica de San Marco: la version moderna de la milenaria “Serenissima”. La speransa l’era che i piemontesi i desse na man, ma dopo la batosta de Custoza el re Carlo Alberto l’à dovù lassar che le çità de la laguna le se difendesse da sole contro la super-potensa autro-ungarica.
Un aiuto insperà l’è rivà invesse da Napoli: el re Ferdinando l’à spedì sul posto el general Guglielmo Pepe con al seguito un bel po’ de soldà a dar ’n aiuto a la resistensa. ’Na resistensa che, contro tute le previsioni, l’è durà più de un ano, ma che a la fine l’è deventà insostenibile: l’isolamento imposto da Radetzky l’avéa causà la carestia (il pan ci manca), contro i bombardamenti no ghera difesa e in più dilagava el colera (il morbo avanza). L’è durante ’sto periodo “fosco” che se inserisse anca la morte de Anita Garibaldi. Dopo aver perso a Roma contro i francesi, insieme a ela (incinta) e a un po’ de altri garibaldini, Giuseppe Garibaldi el çercava de portar aiuto almanco a Venessia, traversando, par rivarghe, le paludi de Comacchio. Ma anca ’sta impresa l’è finì in un disastro. Così nel triste 22 Agosto del 1849 la çità l’à dovù alsar sul ponte (de Rialto) la “bandiera bianca” e lassar che i austriaci i entrasse par la tèrsa e ultima volta. Però rispeto a i francesi ne le Pasque Veronesi almanco lori i s’à comportà mèjo, limitàndose a mandar in esilio Manin, Tommaseo, Pepe e i altri patrioti.
Dopo de ’sta data, par averghe la sodisfassion de védar i invasori andar via s’à dovù spetar quasi vint’ani: par la precision fin al 21 Otobre del 1866. ’Na sodisfassion che, al contrario de Niccolò Tommaseo, purtropo no l’à podù goderse Daniele Manin… morto in esilio dies’ani prima a Parigi (ma che el tornarà dó ani dopo par èssar sepelì con tuti i onori in San Marco). A i patrioti venessiani ghè stà dedicà vari monumenti in tante çità, ma el monumento più grande, quel che no rusenirà mai, el restarà par sempre la famosa poesia de Fusinato.

Wanda Girardi Castellani