L’Angolo de la Wanda – Maggio 2015 – “L’isola “Isolo”
…a cura di Graziano M. Cobelli
gcobelli05@gmail.com
Quatro Ciàcoe: da Verona
L’isola “Isolo”
A Verona tra le tante màscare che sfila nel carneval una l’è el Simeòn de l’Isolo. L’origine del nome la vien dal lontan 1326 quando la nostra çità la gavéa ancora n’isola. Ne l’isola ghera sede la corporassion de i “radaròi” (traghettatori), con a capo un çerto Simeone. Ma no l’è de lu che vorìa parlarve, ma proprio de l’isola!
Ne i tempi antichi l’Àdese, dopo la curva de San Giorgio in Braida, el coréa drito rasente la colina de San Piero. No se sa ben quando, ma sicuramente prima de l’epoca romana, dopo ’na qualche inondassion el fiume l’à cambià strada, fasendo da alora in avanti un giro più largo. Del vecio leto però era restà, fin a fine ’800, un ‘ricordo’: un fiumesel che, destacàndose poco dopo el Ponte Piera, el se ributava ne l’Àdese un chilometro più avanti, incornisando così un’isola longa e streta: l’Isolo! A metà percorso el fiumesel el gavéa dentro anca n’altra isola più picola… l’“Isoletto”.
Fin al medioevo l’Isolo l’è sempre stà pòco abità… Verona a quei tempi, un po’ parché l’era pìcola e un po’ par motivi de sicuressa, la se ne stava tuta ne l’ansa de l’Àdese. Par trovar qualche riferimento a l’«insula episcopatus Verone» bisogna ’spetar el Mile… par esempio in un documento del 1171 ’na quarantina de veronesi i domandava al vescovo l’autorizassion de stabilirse lì: la viçinansa con l’Àdese la permeteva de ormegiar le barche e la corente del fiume la podéa èssar doparà par far giràr i mulini. Qualche ano dopo, tra le prime case de l’Isolo è nata ’na ceseta dedicà a San Tommaso Becket de Canterbury (fato santo nel 1173) e più tardi n’altra dedicà a la Madona (Santa Maria di Rocca Maggiore).
L’Isoleto intanto l’era doparà come orto e tra le isole e la sponda de l’Àdese era nati de i ponti: tuto rigorosamente de legno! Anca parché fin da subito l’Isolo l’è stà el regno de i marangoni: dal Trentin rivava zo i àlbari e le rude de i mulini le metèa in moto le seghe par tajar zo le asse. Nel 1334 l’Isolo l’è stà devastà da un incendio: ormai l’era deventà l’arsenal de Verona e oltre a cataste de legna se conservava anca pégola, soghe, cola e altro material che facilmente podéa brusar. Par fortuna s’èrimo ormai in piena epoca scaligera e grassie a l’aiuto de Cansignorio s’à podù ricostruir tuto quanto… e stavolta quasi sempre in muratura! In particolar el ponte “Delle Navi” l’è stà costruì con n’estremità fata a “Y”, cioè el gavéa ’na rampa che partiva anca da l’Isolo: ’na solussion che tra ’na ricostrussion e l’altra l’è stà sempre mantegnù fin a fine ’800. Ne i secoli dopo l’incendio l’isola la ga ’vù el so momento d’oro: prima è stà creà la Dogana par regolamentar le merci che rivava da l’Àdese e dopo, grassie al giro de afari, varie fameje de siori i è vegnù a farse la casa proprio lì. In particolare i “Della Seta” (indovinemo da dove ghe vegneva i schèi) i gavéa un bel palasso afrescà in riva al fiume, in compagnìa de quel de i “da Lisca”, de i “Pompei”, de i “Scalfo”, de i “Carteri”, ecc. Nel ’500 l’Isolo, strucà de case e con i palassi nobili che, tra un squero e l’altro, pociava i piè ne l’aqua, l’avarìa sicuramente ricordà a un venessian ’n angolin de casa sua. Sempre nel ’500 è stà incaricà el famoso Michele Sanmicheli de ingrandir la cesa de San Tommaso Becket… i lavori però i s’à arenà e quel che se pol védar adesso l’è un incrocio (par gnente raro a Verona) tra el stile romanico e un quasi gotico. “San Tomaso Cantauriense” (come la vien ciamà ancò) l’è famosa par du robe: una l’è el campanil del ’400 con 10 campane “alla veronese”, famose par i concerti, e l’altra l’è el grande organo dove el 7 gennaio del 1770 Wolfang Amadeus Mozart l’à tegnù un so concerto a l’età de solo quatòrdes’ani. Za che el ghera, con un cortelin l’à intajà nel legno de la tastiera le inissiali: W.S.M! (la “S” la sta par Salisburghese).
Ma tornando a l’Isolo, a nord dove l’Àdese, separandose, l’avéa lassà zo ne i secoli un deposito de giarin, ghera (oviamente) la “giarina”. Dopo ’sto spiasso triangolare (dove se tirava in sùta le barche) scominçiava l’“Isolo de sora”, la vecia patria de le segherie… e, passà la cesa de San Tommaso, vegneva l’“Isolo de soto”, el posto dove se laorava la roba inquinante, par esempio la pégola par calafatar le barche. A propòsito de le barche dovemo ricordar che fin a fine Otoçento su l’Àdese galegiava quasi sessanta mulini par masenar el gran, tuti in legno e sostansialmente de i barconi tacà a riva con de le sòghe.
Con el Setesento scominçia la decadensa: la dogana i l’à serà nel 1790, el fiumesel l’à scominçià a insabiarse (l’era ciamà l’“Aqua Morta”) e le fameje siore le s’à trasferì in centro. Inoltre ogni tanto l’Àdese el straripava massacrando proprio l’Isolo che, trovàndose drio la “curva”, el vegneva sempre ciapà in pieno da la forsa del fiume. L’ultima piena, quela più devastante, l’è stà nel setembre del 1882. Dopo l’inondassion ormai le case che dava su l’aqua le se mostrava verte come se le fusse stà bombardà. Verona staolta l’à dovù cambiar facia: el canal de l’Aqua Morta l’è stà interà del tuto, faséndoghe sora ’na strada. Anca l’Isoletto l’è stà interà e adesso ghe ciamemo “Piassa Isolo”. Su la riva de l’Àdese è stà costruì i “muraglioni” e sora adesso ghe core el Lungadige. La “giarina” l’è deventà un parco alberà e in ponta ga trovà posto la famosa statua de Paolo Caliari (el “Veronese”), sentà storto come se el gavesse problemi da maruele. I marangoni ormai no i ghè più e de le segherìe de ’na òlta resta el ricordo solo in çerti nomi, come par esempio “via seghe di San Tommaso”… un nome che fa restar a boca verta i turisti che i se domanda a che “seghe” avemo dedicà la via!!
Wanda Girardi Castellani
