L’Angolo de la Wanda – Dicembre 2014 – “Castel San Pietro”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Castel San Pietro

Se a sud de Verona se vèrse la Val Padana, a nord la çità l’è come incornisà da i monti Lessini. Una de ’ste coline la se infila decisa tra el quartier de Veroneta e quel de Borgo Trento fin quasi a tocar l’Adese. Sora, adesso ghè ’na costrussion in stile austro-ungarico ciamà Castel San Piero. Pochi tra i turisti che i se intrupa in Piassa Bra par fotografar l’Arena i sa che con poca fadiga se podarìa rivar anca lì: un posto da dove védar in un colpo d’ocio tuta la çità! L’è un spetàcolo unico!
Così stavolta ve parlarò de Castel San Piero. Tanto par scominçiar, la colina che ghe dà el nome al castel l’è uno de i siti tra i più anticamente abità de tuta Verona, visto che lì s’à trovà reperti che i ga anca più de tremila ani (se pol védarli al museo de Castelvecio). Da sempre ne la parte più bassa ghè ’na sorgente (la “fontana de fero”) e l’aqua l’à sicuramente contribuì, insieme a la posission facilmente difendìbile, a far sì che la popolassion fin dal neolitico la se sistemasse preferibilmente lì. In età romana sora la colina ghera un imponente tempio sacro e fortificà, ciamà “ARX”, ligà probabilmente al teatro che i romani i avéa costruì più in basso, vissin a l’Adese. Tra l’altro el “teatro romano” l’è ancora ben conservà e el vien usà tute le està par comedie e spetàcoli. Ne i primi secoli del Cristianesimo su i ruderi de l’ARX era stà costruì ’na ceseta dedicada a San Piero, santo che da alora in poi el ga dà el nome a tuta la colina.
Nel V secolo el re ostrogoto Teodorico l’à costruì el so castel nel punto più alto (Ve ricordè? “Sul castello di Verona batte il sole a mezzogiorno…”) e nel stesso castel pochi ani dopo, dise la legenda, el re longobardo Alboino el ga dà da béar el vin a so mojer Rosmunda in un bicer ricavà da la crapa de so pare. La legenda la continua disendo anca che Rosmunda l’à spetà par ani el momento giusto e a la fine l’è riussida a vendicarse. La tradission la vol che Alboino el sia stà sepelì soto la scala principale del castel con la spada, l’armatura e tesori vari.
Un’altra tradission la riporta invesse che el sia stà Teodorico a èssar sepelì nel castel… fato sta che una tomba l’è stà çercà par secoli! Qualche ano fà era corsa voçe che i archeologi, grassie a una telecamera miniaturizà, i avesse trovà soto al castel un sarcofago con dentro un re che dormiva el so sòno eterno (ghe n’avéa parlà parfin el giornal) ma, visto che la notissia l’è circolà el primo de April, s’à capì che più che un re l’era stà un “pesse”!
Tornando a la storia, el castel dopo èssar stà abità da Teodorico e da Alboino ne l’ano 890 l’è stà doparà anca da Berengario (un friulan: l’era de Cividale!). Essendo lu un “imperatore”, un castel usado no el ghe andava mia ben e così l’à butà zo tuto par rifarlo più belo e più grande. Pecà… parché de la ceseta de San Piero adesso no resta che el nome e del castel de Teodorico resta solo qualche muro. Tra l’altro come el so predecessor Alboino, anca Berengario l’è morto de morte violenta: copà a tradimento proprio qua a Verona. Qualche secolo dopo ’sti eventi, el castel l’è stà ristruturà da Cangrande quando l’à messo man a tuta la cinta difensiva de la çità.
Anca la version scaligera però l’è durà poco, parché nel 1393 Gian Galeazzo Visconti el l’à ingrandì, dàndoghe ’na fisionomia che è sta conservà fin a poco prima del 1800. Se pol védar come l’era el castel visconteo grassie a i quadri del 1700… ne le vedute de la Verona de alora se vede la çità dominada da un castel complicato, grande e pien de tori, tuto diverso da quel che se pol védar adesso. A demolir el castel de Gian Galeazzo ga pensà ben Napoleone nel 1801: forse el çercava qualcosa da portarse via anca da lì! Fato sta che a metà del XIX secolo el Castel San Piero l’è stà demolì e rifato par l’enésima e ultima volta.

Quel che vedemo adesso sora Verona l’è stà costruì da i austriaci tra el 1852 e el 1858 par volontà del maressialo Radetzky su progeto de Conrad Petrash. Bisogna proprio dir che i austriaci i à fato un bel lavoro: el castel (ma ormai bisogna ciamarlo “Forte” o mèjo ancora “Caserma”…) el ga ’na pianta retangolare de 100 metri de longhessa par 25 de profondità, con la parte centrale più bassa rispeto a quele laterali che i è un po’ più alte e grandi. El forte l’è alto tre piani e l’è tuto fodrà da ’na miriade de finestrine rosse. Sora l’è piato e coronà da de i strani merli tondi. Nel complesso el colpo d’ocio no l’è mia mal: par èssar ’na costrussion militare la se integra ben, anca grassie al color rosso maton con bordature bianche, con i vari edifici de època scaligera che gavemo a Verona.

Spetacolare però el resta el piassal che ghe gira intorno: l’è abastansa grande da podèrghe parchegiar la màchina e de lì se pol gustarse el panorama de la çità.
Se la giornada l’è bela Verona la par un modelin, con tuti i campanili che i spunta sù che par de poderli tocar con du déi. Che el posto el fusse belo se lo savéa anca prima ghe fusse l’invasion de i turisti, visto che nel 1941 è stà inaugurà una funicolare che da la Valdonega, vissin a l’Adese, la riva fin su al castel. La funicolare però l’è restà in funsion solo pochi ani parché poco dopo, come savemo, è scominsià la guera e passà che l’è stà ghera altro da pensar che rivèrsarla.
Nel 2013 dopo quasi 70 ani de abandono s’avéa finalmente scominsià un laoro de recupero, ma un incendio nel cantier l’avéa fermà tuto.

Comunque, notissia recentissima, par che i laori a la funicolare i sia riscominsià e se parla del 2015 come data de riapertura! Anca al castel adesso è stà verto un cantier: è partido un importante progeto che el dovarìa trasformarlo in un museo, trasferéndoghe tra l’altro anca la colession de storia naturale che al momento l’è ospità nel cinquecentesco palasso Pompei. Comunque el piassal el restarà sempre libero: ci vol rivarghe, oltre che con l’automobile (e spetando che i finissa i laori a la funicolare), el pol andar sù a piè.
La caminada l’è a la portata de chiunque: ghè ’na scalinata che la parte da de fianco al Teatro Romano e con una serie de zig-zag la riva fin in çima. Se rivè a ora de pranso (o de çena) e gavì disponibilità de schèi, apena soto al castel ghè uno de i ristoranti più rinomati e famosi de Verona, che (oviamente) el se ciama “Re Teodorico”. Però se ve ciapè ’na pelada no’ stasì darme la colpa: v’ò avisà!

Wanda Girardi Castellani