L’Angolo de la Wanda – Novembre 2014 – “La grande peste del 1630”
…a cura di Graziano M. Cobelli
gcobelli05@gmail.com
Quatro Ciàcoe: da Verona
La grande peste del 1630
Caressà da un bel ventesel de primavera, Verona la matina del 20 Marso de l’ano de (dis)grassia 1630 la se stava svejando come tuti i giorni tra el sbàtar de finestre, el sfregolar de la legna sul stagnà, el ciasso de i buteleti e el ciamar de i venditori ambulanti.
Quela stessa matina però, in una casa vissin al Ponte Novo stava morendo un soldà ’pena rivà da Brescia, un çerto Francesco Cevolini. El s’èra presentà la sera prima, domandando un leto par la note e, visto che el stava mal, ghèra stà dà ospitalità. ’Sto soldà el sarìa stà el primo caso de la più grande epidemia de peste bubònica in tuta la storia de Verona, ma prima che la malatìa la fusse riconossuda par quela che l’èra, dovéa morir da lì a poco anca la parona de casa, Lucrezia Isolana, e le so dó fiole.
El ricordo ancora vivo de la pestilensa del 1575 (con 13.000 morti) el dovarìa aver scadenà la paura ne la popolassion, ma invesse i du dotori (anca de lori savemo i nomi: Grazioli e Giordani) che, visitando i primi malà, i avéa subito riconossù i sintomi de la malatìa, racomandando de brusar el brusàbile e disinfetar el resto con l’asedo, da tuti i è stà ignorà se non adiritura tolti in giro.
Tre giorni dopo però, quando à tacà a malarse altre persone del quartier, la gente l’à finalmente scominsià a preocuparse sul serio… anca se nel 1630 Verona par la prima volta l’era pronta a combàtar l’epidemia, avendo inaugurà solo du ani prima el so Lazareto: nòvo, grande e fato ben!
De costruirlo s’avéa scominsià a parlàrghene za nel 1539 quando anca altre çità le se stava atressando con ospedài par le malatìe contagiose. La prima l’era stà Venessia che nel 1423 l’avéa fato far su l’isola de Santa Maria de Nazareth un posto (gestì da i padri Eremitani) dove tegnèrghe in quarantena i pelegrini che i tornava da la Tera Santa. El nome “Lazareto” el vien proprio da ’na storpiatura de “Nazaretum”, “de Nazareth” in latin.
Nel 1488 anca Milan l’à costruì un Lazareto (quel de i Promessi Sposi) e a i primi del ’500 l’è stà el turno de Verona. Anca alora però la realizassion de le opere pùbliche la se tirava par le longhe come adesso… tanto che ghè volù ben 8 ani par decìdar sia el posto che el progeto! Par el “posto” la selta l’è cascà su Porto San Pancrazio, dove l’Adese, dopo èssar passà atraverso la çità, el fa una grande ansa in un teren (alora) poco popolà. Par el “progeto” pararìa (a sentir el Vasari) che sia stà doparà quel de Michele Sanmicheli. Dir “Sanmicheli” a Verona l’è un po’ come dir “Palladio” a Vicenza: el “top” de i architeti! Probabilmente però el progeto sanmicheliano originale par le casse de la çità el costava massa, tanto che dopo la morte del Sanmicheli (nel 1559) l’è sta ridimensionà e rimanegià par la belessa de 90 ani.
Comunque nel 1628 el Lazareto a la fine l’era pronto, e nissuno avarìa pensà che da lì a du ani el sarìa servì così tanto. Visto dal de fòra l’edificio el paréa un castel, con le misure de ben 238 metri par 117. I muri de i quatro lati i finiva con de i merli e ne i àngoli ghèra de le torete (cosa che pensàndoghe adesso el ne ricorda un “campo de concentramento”… ma in fondo el d’èra!).
Dentro, el Lazareto el gavéa longo i muri 152 càmare rialsà da tera, più una serie de stanse al secondo pian par el personal religioso e de servissio. Al centro del cortil, ghèra un bel tempieto de marmo bianco, tondo e con un giro de colonine stile gazebo. El tempieto el gaveva la funsion de cesa par dirghe la messa (cosa che a l’epoca l’era l’unica cura possìbile par i malà de peste).
Ma tornemo al marso del 1630… Nel giro de pochi giorni altri veronesi i à scominsià a malarse e Venessia l’à spedì subito sul posto el cavalier Aloise Vallaresso con pieni poteri par fermar l’epidemia. Su so ordine s’à scominçià a isolar i quartieri a ris-cio e far portar con de le barche tuti i malà al Lazareto (l’era costruì in riva a l’Adese), tanto che in poco tempo s’è rivà a ricoverar ne la strutura più de 5.000 persone! Istesso no se riussiva a capir come mai l’epidemia la dilagasse così in pressia: adesso savemo che la peste l’è portà da i pulsi de le pantegane, ma alora se credéa che la malatìa fusse causà da qualcosa ne l’aria, come el comune rafredor.
A metà ano, con el caldo, l’epidemia la scopia completamente! El Lazareto l’è stracolmo e ormai no ghè più nissuno che scava le fosse comuni e porta via i morti, tanto che ormai i vien butà diretamente ne l’Adese! L’odor de ’na çità intiera che sta morendo no podemo gnanca imaginarlo! Se fermà tuto… no se trova più gnente da magnar parché mòre anca le bestie e nissuno coltiva più i campi! L’aqua l’è imbevibile parché la vien da l’Adese… così ci no mòre de peste el mòre de colera o de fame o copà da ladri disposti a farte la pèle anca par un tòco de pan! E visto che le disgrassie no le vien mai sole, in lujo passa par Verona anca l’esercito venessian in ritirata da Mantova, robando quel poco che era restà e portàndose a casa, invesse che el “botin de guera”, un poca de pestilensa. A Verona su una popolassion de 54.000 persone, la peste del 1630 la se n’à portà via più de 33.000! Quasi du persone su tre! Finalmente con l’autuno è scominsià a pióvar… e l’aqua, abondante, l’è riussida a fermar l’epidemia. Con el fredo de l’inverno ormai i casi i era deventà rari, ma la çità la paréa ’na çità de fantasmi: poca gente, magra, case ude e botege deserte parché ci no èra stà copà da la peste, o dal colera, l’èra scapà ne le case in campagna. Con i primi caldi del 1631 l’epidemia l’è tornà ancora, ma manco violenta rispeto a l’ano prima… ormai in çità la gente l’era restà poca e ci èra sopravissù o l’era particolarmente forte o ormai l’era imunizà.
Una cronaca de l’epidemia ghe l’avemo de prima man, grassie al dotor veronese Francesco Pona (1595-1655), che l’à vissù da medico la pestilensa, riussendo (par fortuna o par bravura) a no lassarghe anca le strasse. Nel so libro del 1631 “Il gran contagio di Verona” se trova una viva memoria de quei ani. Dopo, finì la peste el Lazareto l’è passà in abandono par èssar po’ usà da i militari come deposito de munissioni. A la fine del ’700 l’è stà usà ancora come un ospedal par i eserciti francese e austriaco. Un tedesco che se ciamava Carlo Steeb, ciamà al Lazareto a far da interprete a i soldà, el s’à ciapà così a cor la situassion da fondar aposta una congregassion: le “Sorelle della Misericordia” (Istituto che esiste ancora adesso) e da passar a la storia come beato.
Spostà ormai i malà in un posto mèjo, ne l’800 el Lazareto l’è tornà a far da deposito de munissioni, funsion che l’à mantegnù inalterà fin a durante l’ultima guera. La distrussion l’è vegnuda dopo, par la precision el 20 de magio del ’45, quando con un boato tremendo tuto l’edificio l’è saltà in aria come el fusse un vulcano in erussion! No s’à mai savù ben cosa fusse successo: probabilmente ghèra gente che andava a raspar in mezo a le munissioni, cercando roba che podesse servir. Se sa solo che par l’esplosion è morto una trentina de persone e che el numero de i feriti no se l’à mai stabilì. Nel dopoguera del Lazareto restava solo qualche rudere, ma nel 1958, par i 400 ani da la morte de Michele Sanmicheli (el progetista), è inissià un’opera de restauro: almanco par el tempieto centrale. I lavori però i ris-cia de andar avanti par altri novant’ani (come quando i l’avéa costruì) parché al momento, a distansa de çinquanta, s’à fato ancora poco.
Par conclùdar, come sempre sucede, passà la tempesta, la gente la s’à fato sù le màneghe e l’à scominsià a ricostruir. La grande epidemia de peste del 1630 par fortuna l’è stà l’ultima e l’è stà in pressia desmentegà, restando ne la memoria solo par èssar stà inserida ne i Promessi Sposi de Alessandro Manzoni. Però una diesina de ani fà, durante de i lavori de scavo a San Bernardin, le ruspe le à scomincià a tajar atraverso qualcosa che paréa marmo bianco… “El paréa mandorlato” à dito la gente. I èra ossi! Metri e metri de ossi! Talmente pressà insieme da parer marmo bianco. S’avéa trovà par caso una de le fosse comuni de la peste del 1630.
Wanda Girardi Castellani
