L’Angolo de la Wanda – Ottobre 2014 – “El “Processo di Verona””

…a cura di Graziano M. Cobelli

gcobelli05@gmail.com

Quatro Ciàcoe: da Verona

El “Processo di Verona”

La matina de l’11 de Genar del 1944 nel poligono de tiro del Forte san Pròcolo, vissin a Verona, çinque òmeni i stava ligà sentadi su de le careghe, dando la schena al ploton de esecussion: fusilassion sensa onor riservà solo a i traditori. A le 9 el comandante Nicola Furlotti l’à sigà el “fuoco” e ’na scàrica de trenta fusili l’à messo fine a quel che è passà a la storia come el “Processo di Verona”.
Par capir come s’èrimo rivà a sta fusilassion bisogna far un salto indrìo de çinque mesi, par la precision al 25 Lujo del 1944. Pochi giorni prima de ’sta data, el giorno 9, i Anglo-Americani i era sbarcà in Sicilia e adesso i stava risalendo la Penisola, puntando verso Roma. Ormai l’era evidente par tuti che la guera l’era persa e i gerarchi fassisti, nel tentativo de salvar el salvabile, i s’à riunì a Roma, a Palazzo Venezia, nel “Gran Consiglio del Fascismo”: el primo che se tegneva dal 1939. La parola l’è stà subito ciapà da Dino Grandi che a quel’epoca l’era el presidente de la Camera… pochi però tra i gerarchi presenti, Mussolini compreso, i savéa che Grandi el s’avéa za messo d’acordo in precedensa con el Re par far votar al “Consiglio” la sfiducia del Duce. La riunion l’è andà avanti par ore, parché la decision l’era grave, ma a la fine s’è rivà a la votassion: su 28 persone presenti 19 i à votà par la sfiducia, 8 i à votà contro e uno solo no l’à votà.
El giorno dopo, Mussolini l’è andà dal Re a Villa Savoia par consegnarghe el risultato de la votassion e de conseguensa Vittorio Emnuele III el l’à informà che da quel momento el sarìa stà rimosso da tute le cariche (e el so posto de capo del governo el sarìa passà a Badoglio). A l’ussita dal coloquio, el Duce l’è stà arestà par ordine del re e portà in un posto segreto. El giorno 26 Lujo la radio e giornài i dava la notissia: Mussolini no l’era più capo del governo e del partito e tute le so cariche le passava a Pietro Badoglio.
Par tégnar calmi i tedeschi, tuti i comunicati i sotolineava però che la guera la sarìa continuà come prima e che l’Italia l’avarìa tegnù fede a i pati… come savemo ben, par fortuna l’era ’na busìa, parché da lì a poco più de un mese (l’8 Setembre par la precision) ghe sarìa stà l’armistissio.
Intanto a Roma el problema spinoso l’era cosa fàrghene de Mussolini… ghera pericolo da ’na parte che i partigiani i cercasse de farlo fòra e da chel’altra che i so fedelissimi i cercasse de liberarlo: a la fine s’à pensa ben de ospitarlo in un albergo de lusso a Campo Imperatore, in mezo al Gran Sasso de l’Abruzzo.
Tolto da i piè el Duce, el Re e Badoglio segretamente i à scomincià a averghe contati con i Americani par trovar el modo de far finir la guera (el più importante de ’sti coloqui l’è stà a Lisbona el 12 de Agosto) fin che a l’8 setembre del 1943 è stà firmà l’armistissio: uficialmente par l’Italia la guera l’era finida con la resa incondissio­nada.
La contentessa de la gente però l’è durà poco: la Penisola l’era praticamente divisa in du con el ris-cio de ’na guera civile. I tedeschi i era praticamente dapartuto e da un giorno a l’altro da aleati i s’aveva trasformà in nemici! E nemici cativi! Hitler no el gaveva nissuna intension de rinunciar a l’Italia (no el gaveva nissuna intension de rinunciar a gnente…) e par far questo ghe serviva Mussolini al potere: così al 12 de Setembre i tedeschi con un’operassion militare degna de un film i è andà a Campo Imperatore par liberarlo e portàrselo a casa (leteralmente, parché i se l’à portà a Monaco de Baviera). Pochi giorni dopo, el 28 setembre, con la tipica organizassion tedesca i ga creà aposta la Repubblica Sociale Italiana: ’na sorta de riedission de l’Italia fassista in version ultranazionalista che, fasendo perno a Salò, sul lago de Garda, la copriva tuto el nord del Paese.

E qua tornemo a i çinque òmeni con le spale al ploton de esecussion che ve diséa a l’inissio. Par legitimar el novo governo bisognava dimostrar a tuti che sfiduciar Mussolini l’era stà un sbalio, ansi un tradimento, e che tuti i traditori i deve far ’na bruta fine!
El 13 Otobre s’à verto el primo “Congresso di Verona”, tegnù a Castelvècio (in pieno centro), con el scopo de definir la strategia de la RSI. Al contrario de quel de tri mesi prima, stavolta i èra i gerarchi più estremisti a averghe in man la situassion, tanto che Mussolini stesso no l’èra presente. Come za tante volte è capità ne la storia, uno de i obietivi de i novi capi l’èra far piassa pulita de quei vèci, così uno de i punti che è stà discusso e votà nel congresso l’è stà quel de far processar quei gerarchi che tri mesi prima i avéa “tradì” el partito.
Qualche giorno dopo, al 17 Otobre, è inissià la ricerca e i aresti de quei che aveva votà contro Mussolini… ma, visto che el mondo l’è de i furbi, su 19 persone la RSI l’è riussì a ciapàrghene solo siè: Cianetti, Gottardi, Marinelli, Pareschi, De Bono (che l’era un vecio general col péto pien de medaje) e Galeazzo Ciano… che l’era anca el genero del Duce, avendo sposà so fiola Edda. Tuti i altri, sentendo l’aria de brusà che tirava, i èra scapà in tempo el più distante possibile.
L’8 Genar del 1944 è scominsià a Verona el processo, tegnù sempre a Castelvècio e con la presensa del pùblico. El risultato l’èra scontà fin dal principio, tanto che in tre giorni s’è rivà a la sentensa: su 19 persone processà ben 18 i è stà condanà a morte (s’à salvà solo Cianetti condanà a 30 ani, ma che dopo pochi mesi con la la caduta del fascismo l’è stà liberà). De tuti i altri la magior parte l’è stà condanà in contumacia parché non se savéa dove i fusse…
Al ploton de esecussion così i ghè rivà solo in çinque: Ciano, Gottardi, Marinelli, Pareschi e De Bono che quando l’à savù de la condana l’à dito seraficamente: “Tanto, i me frega de poco… go za 78 ani!” Dino Grandi che l’èra el “colpevole n.1” (essendo quel che l’aveva proposto e fato votar la sfiducia a Mussolini) l’è stà uno de quei che è scampà de più: l’è morto nel 1988 a la bela età de 93 ani.
Galeazzo Ciano el merita un discorso a parte… anca se no el ghèra mai stà tanto simpàtico, Mussolini almanco par rispeto a so fiola Edda l’à tentà in tuti i modi de salvarlo, però lu stesso ormai el s’è trovà a no poder far più gnente: tuti i so poteri i vegneva da i tedeschi e Hitler in persona (furioso parché el stava perdendo la guera) el voleva a tuti i costi che i “traditori” i fusse messi a morte. Inoltre l’èra stà proprio Ciano che come ministro de i afari esteri l’avéa tegnù l’Italia fòra da la guera par i primi diese mesi (cioè fin al giugno del 1940)… guadagnàndose così l’antipatìa sia de Mussolini e l’odio del Furer. Così rivemo a quela freda matina de l’11 genar del ’44.

Quel che è sucesso veramente incredibilmente se pol ancora védarlo: Hitler l’avéa mandà aposta un cineoperator par farghe far un film e averghe la sicuressa che l’esecussion la fusse stà eseguida. El film, desmentegà par ani, l’è saltà fora recentemente e adesso l’è facile trovarlo parfin in internet: l’è curto ma el fa vegner la peldoca: se vede rivar i condanà, po’ la gente invità a goderse el spetàcolo, po’ el ploton de esecussion… Se i vede sbarar e a la fine se vede distintamente anca l’uficial che dà el colpo de grassia. Se vede el prete che passa vissin a i corpi a darghe a uno a uno la benedission.
Come savemo ben, ’sto processo l’è stà solo l’inissio de quel tremendo ano che l’è stà el 1944… l’ano dove la guera l’è rivà ne le nostre case: tra bombardamenti, assioni de i partigiani e reassioni de tedeschi e fassisti. Un incubo che è finì solo a metà del 1945.

Wanda Girardi Castellani