L’Angolo de la Wanda – Febbraio 2014 – “Altri zughi”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Altri zughi.
Quando èrene buteleti, èrene inpegnà a inventarse zughi e zugàtoli. Vedemo oncora altri zughi.

ALTRI ZUGHI DE I MAS-CETI I ÈRA:

a FIGURINE, a COERCIOLETI (i tapi a corona de le sanpagnete); a ASTICHETI e, soratuto, co’ i CARETINI DE LEGNO co’ i quài, a pansa in zo, i filava da la lasagna de San Matia (ghe n’avéa uno anca mi, fato da me nono marangon, con tanto de rude a sfere: el massimo de la perfession tecnica). Me ricordo che i gavéa tre rude: una davanti insieme col sterso e dó de drio. In parte ghèra el fren costituì da un legno montà su un perno che, assionado, el fregava par tera; ’sto qua però generalmente l’èra sostituì da la ponta de i pié (cusì le scarpe le andava a remengo). Ghèra po’ el zugo del TAMBUREL, quel del Minico Bardassa eternà dal nostro Barbarani, ecc.
A PILOTIN: se zugava con un stròpolo de sùgaro sul qual se metéa ’na “vespeta” (diese schei), che se dovéa centrar co’ ’na “bajardela”, overo un scheo più grosso o un boton: ci ciapava el “pilotín” vinséa “la posta”.
A GNAO: l’èra la stessa musica, solo che al posto de stròpoli e schei se usava de i sassi; uno pìcolo sora uno più grande e con ’n altro se ghe tirava incosto.
A BALINA: ’na spece de tanburel zugà co’ le mane, rebaténdose la bala uno con l’altro.

E PAR LE BUTELETE?

LA SOGA (de solito quela de la lissia): dó le la faséa giràr fin che le altre le saltava, a pié unidi, a ganbe larghe, a pié sòpo… “alè, alè, braghe, giacheta e gilè!”
A BALE (bala a muro o bala a rinbalso – bala a pié).
BALA A MURO: el podéa consìstar anca in più bale tirade una drio de l’altra sensa mai fàrghene cascar. Se tirava tegnendo un pié par aria, magari (secondo la braùra, spesso da farghe invidia a i saltinbanchi da circo), fasendo le giravolte: “Ino, pino, lajo-pajo…” – “Rinoceronte che passa el ponte / che salta e che bala, / tirando la bala. / Che sta su l’atenti / che fa i conplimenti / che dise bongiorno / girándose intorno. / Gira e rigira / la testa me gira / no’ ghe la fao più / bala, bala, casca giù!” – “móvarme, sensa móvarme / sensa rìdare / con un piede / con una mano / a battere / zigo-zago / sotoganba, giravolta… ecc.”
BALA A RINBALSO: la consisteva nel tirar par aria la bala, o più bale, ciapàndole al volo, magari dopo ’na giraòlta o dopo aver batù le mane, una o più òlte.
BALA A PIÉ: la bala se la faséa co’ la lana o con de le strasse. Se se la ligava a ’na caucia con un spago longo 60-70 cm. e po’ se la faséa girar verso quel’altra ganba, saltando el spago a ogni giro (spesso se faséa caoléa (rebalton)).
A L’OMO NERO (chi ha paura de l’uomo nero?)
A SALTAMOLETA – a SBERLETA (uno l’intreciava i brassi alsando la man drio la schena e se dovéa indovinar ci t’avéa dà la sberleta). Invece el DIÀBOLO (zugo antico) el ÇÉRCOLO (col so fereto par ’conpagnarlo) el JO-JO ecc.; i èra i zughi da far da soli.

Wanda Girardi Castellani