L’Angolo de la Wanda – Dicembre 2013 – “Quando èrene buteleti”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Quando èrene buteleti.

Al tenpo de la nostra infansia, èrene inpegnà a inventarse zughi e zugàtoli. Stavolta passemo in rassegna on pochi de zughi.

La SFIONDRA: la consisteva in un legno fato a forca sul qual se ligava un toco de àstico o de camaradaria. Co’ ’sto arnese se tirava i sassi (tuti èmuli de Davide!).
La ÇERBOTANA (da l’arabo zambotana): un ramo de sanbuco udà da la miòla. Se tirava frecete fate de pagine de quaderno. Con du rami, un dentro de l’altro, usadi a stantufo, se podéa sbarar distante de le balete fate de mol de pan o altro.
Le OLANDE: un zugàtolo storico parché Beniamino Franklin nel 1752 el ghe n’à lancià una drento ’na nuvola tenporalesca par dimostrar la natura del lanpo e inventar po’ el parafulmine. Marconi, a so volta, nel 1894 el 1’à ’doparà par inalsar l’antena ch’è servì a trasmétar traverso el Pacifico el primo segnal radio.
Se podéa farle in tanti modi, ma l’èra indispensabile ’vérghe almanco dó canete longhe (mi andavo tórle in riva a l’Adese). El massimo del lusso l’èra la carta oliada o quela velina. Un spago e magari un rocheto da fàrghelo-sù. La coa l’èra tuta de anèi incolà e passà drento uno de l’altro e la gavéa da èssar longa, tonda o a dó, tre file.
El MÓSCOLO e la so SCURIA (in Francia i ghe ciama Sabot parché i lo faséa co’ i tachi de veci sòcoli): se crompava el móscolo da i sestelari. L’èra ’n afàr cònico a righe incavà dove se ghe intorcolava atorno el spago de la scuria che serviva a farlo pirlar; su la ponta ghèra un ciodo ciamà “brocheta”.

El S-CIANCO (un zugo del qual se parlava za nel ’600): ocoreva un mànego de scoa dal qual se tajava du tochi, uno de 30 cm. e uno de 10. El primo el deventava el manganel e quel’altro el s-cianco vero e propio (apuntì a le do estremità). Col manganel se ghe dava ’na svìrgola a una de le dó ponte e, ’na olta che ’l s-cianco el saltava par aria, se dovéa rifilàrghene n’altra al volo, mandàndolo più distante possibile.
La PÒRCOLA (’na spece de base-ball a la bona): ’na bala, el manganel e la pòrcola, overo la pedana de lancio.

Wanda Girardi Castellani