L’Angolo de la Wanda – Luglio / Agosto 2013 – “Re Teodorico”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Re Teodorico

Nel nùmaro de Q.C. de Aprile 2013, parlando de le batalie che s’à combatù vissin a Verona, ò nominà el re Teodorico e ’desso vorìa proprio parlàrvene un po’ de più.
Teodorico ne la memoria storica de i veronesi l’è restà bastansa presente: un po’ parché esiste ancora i ruderi del so castel, un po’ parché uno de i ristoranti più famosi de la çità l’è proprio intitolà al so nome, ma probabilmente parché a scola émo studià tuti la famosa poesia del Carducci, quela che la scominsia proprio con la frase “sul castello di Verona / batte il sole a mezzogiorno”.

Dunque, scominsiemo con dir che Teodorico l’era nato in Pannonia (più o meno l’atuale Ungheria) ne l’ano 454. L’era fiol del re ostrogoto Teodomiro e de una de le so concubine. A oto ani l’è stà mandà dal re a Costantinopoli, come ostagio in garansìa de pace tra la tribù de i ostrogoti e l’impero bizantino. Par el zóvane principe ’sto esilio de diese ani no l’è stà però tempo perso, parché così l’à podù imparar ben el greco e el latin e farse anca una cultura che dificilmente l’avarìa podù farse da “barbaro”. A 18 ani l’è tornà finalmente in patria e nel 474, a la morte de Teodomiro, l’è deventà re.
Intanto in Italia Odoacre (de la tribù de i sciti) calando dal nord l’avéa conquistà Ravenna, deposto Romolo Augusto (ciamà Augustolo parché l’era pìcolo), ultimo imperatore romano, e anca se uficialmente l’avéa fato ato de sotomission a Costantinopoli, in pratica l’avéa ciapà el controlo de l’impero de ocidente.
L’imperatore bizantino Zenone, preocupà de le conquiste de Odoacre e de la vicinansa de i Ostrogoti, l’à pensà ben de far in modo che Teodorico l’andasse anca lu in Italia a farghe la guera a Odoacre.
El re ostrogoto no el s’à lassà scapar l’ocasion e ne l’ano 489 con al seguito un esercito de 100.000 tra òmeni, done e buteleti, l’è entrà in Italia da est, atraverso el Friuli. El primo scontro l’è stà el 28 de agosto del 489 sul fiume Isonzo e l’è stà vinto da Teodorico. Odoacre con el so esercito el s’à mosso verso Verona con l’intension de trinceràrseghe, ma l’è sta fermà in tempo dal re ostrogoto vissin a Madona de Campagna, a le porte de la çità. Conta la legenda che a la fine de la batalia era restà sul campo centinara de soldà e de cavài morti… ’na delegassion de veronesi l’è andà alora da Teodorico a domandarghe un pochi de cavài par trasformarli in spessatin. L’è stà in sta ocasion che, dovendo conservar tuta quela carne disponibile, s’à inventà un modo de cósarla lentamente, insieme a vin e spessie, otenendo così la famosa “pastissada de caval”: piato tipico veronese.
L’è stà così che Teodorico l’à scominsià a afessionarse a Verona, tanto che dopo aver batù Odoacre in altre batalie (in giro par el nord Italia), aver finalmente vinto la guera e ciapà (in nome de l’impero bizantino) el controlo de l’Italia, l’à preferì volentieri sogiornar a Verona invesse de la capitale Ravenna. Bisogna dir però che la guera no el l’à mia vinta su i campi de batalia, ma solo grassie a un tradimento: nel 493 dopo aver invità Odoacre con tuta la so fameja, la corte e el stato magior a Ravenna par “farse ’na bela magnada insieme e métarse d’acordo”, sul più belo i Ostrogoti i à tirà fora le spade e i à eliminà el problema, una òlta par tute.
I trent’ani dal 493 quando l’è deventà re de l’impero d’ocidente al 526 quando l’è morto, i è stà par l’Italia (e par Verona in particolare) un periodo de pace e de stabilità. A lu se deve l’ampliamento de la cinta muraria in modo da comprèndar oltre che Verona anca la parte alta de le “Toresèle”. Le mure de Teodorico i è restade così fin al 1300, a i tempi de i Scaligeri. A lu se deve probabilmente la costrussion de la cesa de San Giovanni in Valle (da vallum), una de le più bele cese romaniche de la çità. Una curiosità: la cesa l’era stà fata par culto ariano: infati Teodorico (come tuti i goti) l’era de cristianesimo ariano; un’altra curiosità: i tedeschi i le ciama Dietrich von Bern, dove “Bern” l’è el nome “crucco-antico” de Verona.
Come tanti altri “potenti” prima e dopo de lu, anca Teodorico, vegnendo vecio, l’à scomincià a deventar paranoico e védar comploti e cospirassioni dapartuto. A fàrghene le spese (tra i tanti) ghè stà anca el so “consigliere”, el filosofo Severino Boezio, e parfin el papa Giovanni I, impresonà e lassà morir a Ravenna ne l’ano 526, el stesso ano de la morte de Teodorico.

Sul come el re el sia morto è fiorì legende par secoli, resta el fato che a Ravenna esiste ancora el splendido Mausoleo che el s’avéa fato costruir e che tuti conossemo. L’edificio, tondo, el ga par cùpola un’unica piera de 11 metri de diametro par un peso de 300 tonelade e el contien a l’interno un unico sarcofago de porfido rosso, sbecà e sensa querciolo. Che fine abia fato el corpo de el re, i se le domanda in tanti da almanco 15 secoli. Antichissima l’è la legenda riportada anca da la poesia del Carducci: Teodorico par inseguir un cervo meravilioso l’è montà su un caval nero che el se ghe à presentà davanti e che da Verona el l’à portà sempre più veloce atraverso tuta la Penisola fin a butarse a testa in zo nel vulcano Stromboli (oviamente la porta de l’inferno). Uno de i bassorilievi de marmo su la faciata de la cesa de San Zen el mostra proprio ’sta legenda, a provar che l’era conossuda za mile ani fà. Una curiosità: la piera del bassorilievo la contien zolfo e na volta le mame le ghe faseva sfregar sora la manina a i butini cativi parché i sentisse la spussa de l’inferno. Un’altra legenda la conta che el re el gaveva paura de i fulmini e che durante un temporal el s’avéa sconto nel mausoleo de Ravenna, ma un fulmine l’à spacà la cùpola, l’à crepà el sarcofago de porfido e el l’à incenerì.
Cissà, forse i storici o i archeologi un giorno i riussirà a risòlvar el mistero, comunque a mi me piase pensarlo come ne la famosa poesia: “Teodorico di Verona / dove vai tanto di fretta? / Mala bestia è questa mia, / mal cavallo mi toccò: / sol la Vergine Maria / sa quand’io ritornerò.”

Wanda Girardi Castellani