L’Angolo de la Wanda – Marzo 2013 – “Verona in tola”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Verona in tola

Concludo co sti versi la serie de ricete veronesi, in onor de la mèjo cusina del mondo e, in particolare, quela veronese che la vanta celebri rapresentanti e coghi, come Giorgio Gioco che a i fornèi no ’l conosse rivali: la so cusina l’è poesia!

EL RISOTO INFRUSINÀ

I dise “el riso in aqua el ga el so nìo!
Ma po’ la morte el se la cata in càneva
maridado co i fonghi o la lugànega
e bison dir che l’è un magnar da Dio!

Ma mi fasso cusì le me partìcole:
un batudin de séola, ojo e buro
e pa’ insaorirlo e piturarlo in scuro,
radecio trevisan tajado a strìcole.

Consumo tuto quanto a pian-pianin
e par darghe più siera e più sostansa
me lo bateso co’ un bicer de vin.

Tiro col brodo el riso e par la stansa
fin sul pato se spande un profumin
che me contenta i oci co’ la pansa.

I BÌGOLI NERI

I bìgoli i ghe vol de pasta nera
che coti i resta al dente e no’ i se incola!
S’i è da Treviso… basta la parola!
Ghè gusto, consistensa e bela siera.

I cata bona morte in le sardele
e i ciama el bianco a seci a farghe strada.
No’ i è par stomegheti da butele…
Ghe vol quei mas-ci e forti da parada.

L’è belo farne fora ’na terina
ciassando co i amiçi in compagnìa…
Smolarse la cintura ’na s-ciantina

e po’ sentirse al mondo da paron
beato, a pansa al vento… dando el via
a un san, sonoro e placido “crenton”!

(ma tàpete la boca a man e brassi
senò ci te ghè inansi… te lo massi!

I TORTÈI CO’ L’INTREMISIA
(riceta un fià canaja)

Se qualche dona, malgrado i tramaci
la se lamenta del nìo disertà
o la se lagna de spire e calori
magagne “basse” che tute se ga,

alora serve catar l’intremisia:
pestar le foje fin farde pastela
missiarghe un ovo, du déi de farina
sùcaro, late, (’na mèsa scudela).

Sbàtar la pasta co ’l lièvito, mola,
e farla frita ne l’ojo a muceti.
Po’ se la incarta, che l’onto la scola…

Ciaparde un piato e portàrselo in leto.
Ma de ‘sta cura stè ’tente a i efeti:
cronpè la cuna o metive el “lucheto”!

Wanda Girardi Castellani