L’Angolo de la Wanda – Settembre 2012 – “Verona in tola”
…a cura di Graziano M. Cobelli
gcobelli05@gmail.com
Quatro Ciàcoe: da Verona
Verona in tola
Penso de poder dir, come ò za dito altre volte, semo in tanti a èssar convinti che la mèjo cusina del mondo l’è quela italiana e, in particolare, quela veronese.
L’è un fato garantido che a Verona se magna ben, forsi parché podemo vantar ricete celebri e un cogo, ormai riconossudo da tuti, Giorgio Gioco, che davanti a i fornèi no ’l conosse rivali.
Cussì continuo co un poche de ricete veronesi… in versi, sperando che le sia ben acolte e soratuto realisà.
***
I CIÒCOLI COL PIEN
(mèjo de i tranquilanti)
Nételi… tàjeli… spónteli… làveli
slàrgheli in çima, méteghe el pién
fato de ajo, pan e formajo
ojo, parsémolo… e pévara ben!
Pòceli in aqua fin le leséne
sàleli in quela e querciola tuto.
Lassa che i pipa co ’l fogo basso
fin che sul fondo no’ i resta al suto.
Mételi in tola e fója par fója
piànteghe i denti… ciùceli a pian
con qualche bossa de quel che maca
e ’na sestela par drio de pan.
***
EL PIATO FORTE DE ME ZIA
(overo: le crochete col capel)
L’è ’na riceta che à lassà me zia
insieme a ’na scaldina e qualche ciodo;
mi, come farle qua ve spiego el modo
(ciàmeme po’ a magnarle in conpagnìa).
Fetine de vedel, dorà e inpanade,
frite, se le destende in ’na padela
e se ghe s-ciafa sora ’na capela
de fóje de formajo inbriagade.
In testa del parsuto inbonbegà
de bon ragù con seola pestà fina,
pomodori e parsémolo pestà.
Du déi de vin… po’ in forno e in quel momento
el parfumo inbugando la cusina
se spande a simentar el casamento!
***
LA PUTANA
Quando l’èra el camin el re de la casa
e ghèra senpre un nono su la soca…
çerte fogasse cote soto brasa
i èra ’na consa da desfarse in boca.
Fate co’ l’ojo, el struto o quel che toca,
l’onto de codeghin pescado a rasa
el grasso infin ras-ciado via da l’oca,
ovo, farina e sùcaro (’na presa).
Fata de tuto e usà da tuti quanti
par questo i la ciamava “la putana”;
dolçe pitoco, bon par tuti i santi.
Onta, bisonta, alta e senpre sana
co’ ’na fetina se tirava ’vanti
quando bastava poco a far ’na mana!
Wanda Girardi Castellani
