L’Angolo de la Wanda – Aprile 2012 – “Adriana Lazzarini – ’Na pressiosa amicissia”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Adriana Lazzarini – ‘Na pressiosa amicissia

Go avù el piaser de védarla da viçin e de conóssarla durante un concerto a Vila Vento, l’ultima residensa del nostro celebre tenor Giuseppe Lugo, in onor del qual el comitato formà da i so amiradori e amiçi veronesi l’aveva fondà un premio destinà a i tenori che più de i altri i gavéa el merito de aver fato conóssar in tuto el mondo la lirica italiana. La cerimonia nel splendido parco de Vila Vento la finiva con un concerto lirico e un baleto. Tra i artisti presenti la spicava ela, Adriana Lazzarini, mezosoprano veronese, ’na figura elegante, giovanile, de ’na sinpatìa unica… ’na voçe splendida che à colessionà sucessi in tuto el mondo.
“N’artista straordinaria che rivà a la stassion d’arivo del so percorso, l’assiste silensiosa a i trionfi o a le sconfite de i altri con l’educata partecipassion de ’n spetator inparsial e conprensivo.” Con ’ste parole piene de stima, potenti, evocatrici e incisive come penelade de ’n impressionista, el grande maestro de spartito Ettore Campogalliani el ga reso onor a la bravura artistica e a la statura morale del mezosoprano Adriana Lazzarini, traciando quasi la “summa” de la so luminosa cariera. Lèsar el curriculum vitae de Adriana vol dir, citando ancora Campogalliani, ricordar “date e nomi, programi, eventi sacri de la lirica italiana”.
La nostra artista la scominçià i studi al Conservatorio de Verona con la prof. Carla Zilotti. El periodo de perfessionamento, con el soprano veronese Gilda Dalla Rizza (la cantante preferida da Puccini, Zandonai e Toscanini,) po’ con el maestro Franco Ferraris. El debuto la ghe l’à ’vudo a 22 ani, nel 1953 al teatro Bellini de Catania, ne la parte de Azucena nel Trovatore de Verdi.
Nel 1955 l’à debutà a l’Arena de Verona, interpretando Amneris, la fiola del Faraone ne l’Aida, prima de ’na serie de grandi interpretassioni verdiane in Nabucco (Fenena), Trovatore (Azucena), La forza del destino (Preziosilla). Autrice de interpretassioni memorabili, l’à cantà con i soprani Maria Callas, Renata Tebaldi, Leyla Gencer, Magda Olivero, Antonietta Stella. La ga ’vudo partner del càlibro de Mario Del Monaco, in Carmen de Bizet e in Sansone e Dalila de Saint-Saens. Franco Corelli el l’à afiancada ne la Carmen a l’Arena de Verona nel 1970, Giuseppe Di Stefano in Un ballo in maschera, Carlo Bergonzi nel Trovatore, Mario Filippeschi in Aida, Gianni Poggi e Bruno Previdi con i baritoni Tito Gobbi, Ettore Bastianini, Aldo Protti, Piero Cappuccilli, GianGiacomo Guelfi, Silvano Caroli, soto la diression dei maestri Tullio Serafin, Antonino Votto, Gianandrea Gavazzeni, Gabriele Santini, Herbert von Karaian e Francesco Molinari Pradelli.
L’ultima so presensa sul palcossènico de la nostra Arena l’è stà nel 1972 con la parte de Ulrica nel Ballo in maschera de Verdi a fianco de Luciano Pavarotti, e l’adìo a le sène l’è rivà nel 1975 con L’Adriana Lecouvreur, a fianco de Magda Olivero in una comemorassion fata al Maestro Francesco Cilea nel so paese nadal.
Memorabile el restarà ne la storia de sta stupenda arte el bis che ga dimandà a la nostra Adriana el pùblico de Parigi con un longo e proronpente aplauso dopo l’esecussion del raconto de Azucena nel Trovatore; un episodio rarissimo, se non unico, de un bis richiesto a un mezosoprano e dato con entusiasmo anca dal Diretor d’orchestra Paol Etuen.
Tanti e inportanti i è stadi i riconossimenti a l’Adriana specialmente ne la musica classica: ricordemo i du dischi d’oro vinti con “La betulia liberata” de Mozart e “La morte di Abele” de Leonard Leo.
Se voléssimo tegner conto solo de i nùmari de ’sta gloriosa veronese, par l’Adriana dovaréssimo tirar ’sti conti: 25 ani de cariera con diese stagioni areniane e 11 de la Scala con ben 41 opere in repertorio. Sentà su i scalini de l’anfiteatro, quantomai scomodi e roventi a spelarme le mane ghera anca mi nel 1953, sposeta da tre mesi. Ghera anca a bàtarghe le mane nel 1955 a la mèjo Amneris che abia mai sentì. Cusì nel 1970, ne la Carmen con a fianco quel fusto de Franco Corelli e, ultima so presensa nel 1972 tri ani prima del congedo da le sène, con un partner d’ecession, Luciano Pavarotti.
’Desso, con so marì la vive sul lago de Garda, a Desensan, e la ga un posto sicuro nel cor de ci ricorda el bel canto, el talento artistico e la grandessa de Adriana Lazzarini… par mi ’na pressiosa amiga de la qual vago orgoliosa.

Wanda Girardi Castellani