L’Angolo de la Wanda – Dicembre 2011 – “El miracolo del “campo 60””

…a cura di Graziano M. Cobelli

gcobelli05@gmail.com

Quatro Ciàcoe: da Verona

El miracolo del “campo 60”

Confesso che tra le materie scolastiche quela manco simpatica par mi l’èra la geografia. Acanida letrice de Emilio Salgari, come lu viajavo ne i libri sul treno de la fantasia. Perciò no’ steme a dimandar andó i è le isole Òrcadi, tema de ’sto articolo. Mi sò solo che le deve èssar pito­sto foraman. Bona che me fiói i ghè stadi e ò podù cusì racimolar, tamisando lori, qualche notis­sia.
Tanto par scominçiàr sto teritorio l’è costituì da ’na setantina de isole de le quale ghe n’è de abitade solo 18. Le se trova sora la Scozia, circondade dal Mar del Nord dal qual le spunta sù con alte scoliere. I è un vero paradiso naturale, tapa preferida o nido abituale de tante spece de usèi marini, come Urie, Gabiani, Sterne artiche, Cormorani e Pulcinelle de mare. Nonostante el clima no’ çerto cle­mente (12 gradi a lujo) i è stade sempre abitade, tanto è vero che qua se trova qualche­dun de i più antichi insediamenti de tuto el Regno Unito, come Skara Brae: un vilagio perfetamente conservà, vecio de 5.000 ani.
Ne i ultimi tempi de la seconda guera mondial diverse sentenara de prisonieri italiani, caturadi durante la campagna del Nord Africa i è stadi mandadi in ’ste Òrcadi (in inglese Orkney Islands) a laorar a le bariere Churchill: ’na serie de strade rialsade in cemento, messe a difesa da i atachi de i U-boot, trovàndose su le isole la base navale de Scapa Flow.
I nostri da prinçipio i era stadi “ospità” in trèdese barache ridote in miseria e cusì le sarìa restà se al posto de i italiani i gavesse messo chiunque altro. Ma i nostri i à tacà subito a piantar fiori, cambiàndoghe facia a l’ambiente. Tra ’sti prisonieri ghèra un artista, un çerto Domenico Chioc­chetti, un artista original che l’à messo in centro de la piasseta ’na statua de San Giorgio, costruida con un scheletro de fil spinado rivestì in cemento. I “nostri” i à provedù anca un teatrin con tanto de senario. ’Na baraca l’è stà po’ adibida a la ricreassion e nel so aredamento i ga messo anca un taolo da biliardo.

Al “campo” però mancava ancora ’na roba assè inportante: ’na capela, e par questa i à fato do­manda a l’ispetor de l’uficio de guera de i campi de i P.O.W. (prisonieri de guera), che l’à fato rece da mercante. È passà diverso tenpo e a la longa s’à incontrà el novo comandante del “campo 60” e i alti papàvari inglesi co ’n capelan entusiasta, e altri interessadi con in prima fila el nostro artista Domenico Chiocchetti. Chi l’avarìa mai dito che sarìa nata cusì, fora dal mondo, ’na cesa che la riciama par la so belessa tanti visitadori da ogni canton de la tera?
Verso el 1943 Domenico Chiocchetti, dopo aver adatà do barache; una a uso scola e l’altra co­me magasìn de material par la cesa costruenda, l’à tacà a métar a fruto le so tante e brilanti idee par la sognada capela. La squadra riunì soto la diression de Domenico, formà da cementisti, fabri, eletrici­sti, fra cui diversi veneti, come el Micheloni e el stesso Maggiore G. Fornasier, comandante italiano del campo, l’à tacà a laorar con entusiasmo e disemo subito che è vegnù fora un capolaoro!

L’abside l’à richiesto diverso tenpo, cusì l’altar, la cancelada, el lavel de l’aqua santa. Dedrìo a l’altar è sta messe do finestre de vero istorià con san Francesco d’Assisi e santa Caterina da Siena. La Madona col Bambin l’è stà anca ela òpera de Chiocchetti, copià da un santin che l’artista sol­dà el s’avéa portà drio par tuta la guera. El legno del tabernacolo l’è stado ricavà da ’na nave naufra­gada. La volta del santuario l’è stà afrescada pure dal Chiocchetti.
Quando nel 1945 i prisonieri italiani i à lassà l’isola, Chiocchetti l’è restà là ancora a finir la pi­dela de l’aqua santa e po’ l’è ritornà a la so Moena. L’inaugurassion de la bela cesa l’è stà compa­gnà da un disco che ’l riproduse el concerto de le campane e del coro de San Piero a Roma.

Dopo la guera el “campo 60” l’è stado abandonà… le barache demolide, le latrine interade, la strade cuerte in pressia da la vegetassion. Solo la “Cappella italiana” l’è restà al so posto, deventando in poco tempo mèta de pelegrinagi par la so sugestiva belessa.
A la fine de i ani ’50, però, el stato de conservassion del santuario l’era deventà preocupante e i citadini de le Òrcadi, riunidi in comitato e iutadi da la BBC, i è riussidi a trovar i fondi par riciamar el Chiocchetti el qual, aiutado da altri artisti e muradori, l’à restaurà la so òpera. A la Messa par la nova inaugurassion, dopo el restauro, à partecipà catolici è protestanti e el servissio l’è stà trasmesso da la BBC in quìndese stassioni.
Da alora è passà altri sessant’ani, ma la fama de la capela italiana de le Òrcadi no’ l’à perso el so lustro anca parché i abitanti i se tol amorevole cura de ’sta strana e splendida ceseta, costruida partendo da ’na baraca par i prisonieri de guera con l’altar posado su blochi de cemento par sbaramenti navali e sorvejada da la statua de San Giorgio, fata de cemento su ’na intelajadura de fil spinado.
Lassù nel Mar del Nord el genio italian l’à lassà la so impronta, trasformando ’na preson in un capolavoro e ’na sconfita in guera… in ’na vitoria!

Wanda Girardi Castellani