L’Angolo de la Wanda – Settembre 2011 – “El Santuario de la Corona”

…a cura di Graziano M. Cobelli

gcobelli05@gmail.com

Quatro Ciàcoe: da Verona

El Santuario de la Corona
El primo ex voto l’è ’na tela del 1522, che la conta come la Madona l’à salvà ’na sposa cascà in Adese

“L’era ’na note nera… nera… nera come el carbon…” Con ’sta filastroca la scominçiava me mama quando par l’enesima volta la invitavo a contarme la storia del Santuario de la Corona… e l’era stà propio cusì! Secondo l’antica legenda dunque, in ’na note scura, sensa gnanca ’na stela a
s-ciarar el sentier, du pastori i ’rancava strachi drio le pégore quando tuto d’un colpo i à visto cascar dal cel sul coston del Baldo qualcosa de luminoso. Spaentà ma più de tuto incuriosidi, i du pastori i è corsi a védar el prodigio e, rivadi sora ’na gran busa, i à sentì un concerto che ’l paréa vegner dal paradiso. Sicome no’ i vedéa gnente, i à pensà de andar zo con una soga ligada a un àlbaro. Figurémose come i ghe sarà restadi quando, rivadi in fondo, i à visto ’na statua de la Madona: ’na figura difarene da tute le altre: Maria, vecia, rugosa, vestida de nero, con el fiol morto su i zenoci. L’èra riparà in ’na grota e tuto intorno ghèra ’na luce candida che la faséa de la note scura un giorno con el sol a pico.
La notissia del miràcolo l’è rivà a Venessia dove s’à savudo che quando i turchi i era riussidi a torghe a la Serenissima l’isola de Rodi, la Madona da là l’era scomparsa, lassando i invasori co’ ’na spana de naso. Da la Grecia Maria col fiol streto ne i brassi l’avéa fato “samartin” nel Veronese, dove la popolassion orgoliosa e felice de la preferensa l’à pensado ben di costruirghe intorno un bel santuario; uno tra i più arditi e originali del mondo.

I laori, tra el far e ’l desfar, ingrandir, abelìr e restaurar i è andà avanti par tanti ani, realisando un progeto da fantassiensa. In principio s’èra tratà solo de ’n capitel, po’ è nato el santuario incastonà ne la rocia… e, infine, eco srodolarse da lì la longa scalinada de 790 scalini che, dal paese de Brentino, ne la Valdadige, la porta sù fin a la cesa. El nome del santuario: “Madona de la Corona” el ghe vien, contrariamente a quanto se crede, da i pichi a pètene che i fa çércolo intorno a la grota dove la statua l’è stà trovada. La devossion par quel’imàgine cusì vera e cusì viçina a le soferense de la pora gente l’à continuà a aumentar e i pelegrini a rivar lì da ogni canton.
Co’ l’andar de i ani s’à somà miràcoli su miràcoli, come testimonia i tanti interessantìssimi ex voto che se pol amirar durante la visita. I raconta storie distanti, tragedie scansade grassie a l’intervento de la Mama del Signor. La Mama ne la qual tuti i pol riconóssar la propria: bela, sì, ma de ’na belessa interior che fa parer ogni ruga segnà su la so facia ’na trincèa de guera che ’l tempo galantomo à coerto de erba e de fiori.
Da alora la devossion par quela imàgine cusì vera e viçina a le soferense de la pora gente l’è continuà a aumentar e i pelegrini i è vegnù a çercarla da tute le parte de la tera. A quel tenpo, ispiràndome a ’sta Madona go proposto a Pescantina un concorso de poesia dal titolo “Maria in bianco e nero”.
El primo premio l’è stà oferto dal Papa Giovanni Paolo II che in quei giorni l’èra a Verona. El nostro Vescovo l’à oferto el secondo.
Ma tornando ai ex voto, Giorgio Maria Cambiè, ne le so “tradissioni popolari veronesi” dopo aver precisado che questi i vien da l’usansa latina de ofrir un ringrassiamento tangibile in cambio de grassie ricevude, el ne informa inoltre che el più antico de la nostra provincia, de l’era cristiana, l’è del 1522 e el se trova, apunto, al Santuario de la Madona de la Corona. ’Sto nostro storico za da diversi ani a l’albergo “Ai du leoni”, el n’à lassà ’na statistica de i miracoli che è sucesso: al primo posto ghè la “Madona col Bambin”, a bona distansa vien el “Cristo in croçe” e subito dopo vien i “Santi” con particolar preferensa a Sant’Antonio, el predileto da i veneti (e da la fameja Girardi).
Ma tornando al Santuario, par ’rivarghe bisogna rivar al bel paese de Spiazzi, a un punto prima de Ferrara de Monte Baldo (dove ghè ’na fonte che a quanto i dise la ga el poter de far ringiovanir ci la beve) e a un par de chilometri dal novo osservatorio astronomico de Novezzina.
Da Spiazzi se pol rivar al Santuario comodamente con ’na corierina che la fa la spola da la piassa del paese a l’ultima curva del sentiér da dove con pochi passi se varca la galerìa scavà ne la rocia che la te consente l’ingresso al picolissimo borgo streto ai pié de la cesa. Qua, par i apassionadi de “ricordini” è possibile far spese. Volendo se pol anca magnar “al saco” in locali apositamete atressà par i pelegrini.
La galerìa l’è stà verta nel 1922. Fin a quela data l’unica maniera par rivar al Santuario l’èra pertegarse el sentiér da Brentino in Val d’Adige. Par ci se la sente, l’è possibile da Spiazzi rivar a la “Corona” sul “caval de san Francesco” con ’na passegiata poco fadigosa (almanco in dissesa). Da la cesa superiore se pol passar a quela inferior dove ghè la famosa “scala santa” da far par penitensa co’ i zenoci (ci no ga l’artrosi) tra un’Ave e un Paternoster.

Da la balconada sul sagrà se pol spassiar fin zo, distante su la Val d’Adige, fin a oltre Cerain e se pol pure gustar viliacamente, ridendo soto i mostaci, el spetàcolo de quei “muli da sengi” che i ga ’vu el corajo de vegner sù da Brentin!
Da segnalar: ’pena dentro in cesa, sul muro de destra, se pol amirar el bel quadro donà a la “Madona de la Corona” dal nostro bravo pitor, el maestro Luciano Pollini in ocasion de la memorabile visita de Papa Giovanni Paolo II, rivà al Santuario in elicotero.
In finis, par ci ai panetini inbotidi consumà ne le salete a uso de i pelegrini preferisse un bon piato de spagheti o ’na bisteca, a Spiazzi l’è possibile magnar ben co’ ’na spesa abordabile.
Volendo se pol conpletar la gita, zontàndoghe qualche chilometro par rivar a Ferrara de Monte Baldo e po’ a Novezzina dove, ’rente al rifugio e a l’orto botanico, se pol amirar el novo Osservatorio Astronomico “Angelo Gelodi”, direto da me fiol Flavio, in colaborassion col Circolo Astrofili Veronesi.

 Wanda Girardi Castellani