L’Angolo de la Wanda – Aprile 2011 – “100 ani fà… Emilio Salgari”

…a cura di Graziano M. Cobelli

gcobelli05@gmail.com

Quatro Ciàcoe: da Verona

100 ani fà… Emilio Salgari

De Emilio Salgari, celebre scritor veronese tradoto in tute le lingue del mondo, ghe n’ò sentì parlar da che son nata. L’èra l’idolo de me papà che l’avéa leto tuti i so libri e ’l me li contava… a rate, quando che, da buteleta, el me portava in leto in coparela. La conossensa del me amigo Emilio l’ò fata però par me conto a 8 ani, quando santa Lussia la m’à portà uno de i so romansi: “Il tesoro del presidente del Paraguay”. El primo de ’na longa brìgola, che ò conservà par setant’ani anca se tasseladi e spaginà.
De ’sto grande concitadin ghe n’ò parlà su diversi giornài, anca su Q.C. e più volte! ’Desso, però, in ocasion del çentenario da la so tragica morte, voi tornar su l’argomento par i letori de la nostra rivista; quei novi che forsi no’ i sa e quei veci che forsi i s’à desmentegà. De solito le storie se le conta dal prinçipio ma mi cambio sistema e taco da la fine. Ècolo qua, el “nostro”, a la vigilia de quel teribile 25 april 1911, intento a scrìvarghe ai fiói, ai editori e ai pochi amiçi che ghèra restà, i so motivi e i so ultimi pensieri.
“Cari editori, a voialtri che ve si fati siori su la me pèle, ve domando che par conpenso de i guadagni che v’ò fato far, pensè almanco ai me funerài. Ve saludo ronpendo la pena.”
“Cari fiói, oramai mi son un vinto! La malatìa de vostra mama la m’à spacà el cor e consumà tute le enegie. Spero che i me milioni de amiradori che par tanti ani ò divertì e istruido i pensa par voialtri. No’ ve lasso che 150 franchi più un credito de 600. Feme sepelir par carità dato che son conpletamente rovinado.”
Dopo aver scrito óndese altre létere, Emilio Salgari, “el stacanovista de la pena” tribulà da mile disgrassie, deluso, straco, oramai quasi orbo, con in scarsela un rasojo l’è andà incontro a l’aurora su la colina de Val San Martin, nel Torinese e lì el s’à copà, fasendo harakiri in parfeta coerensa con i personagi de i so romansi.
El teribile gesto l’è stado la so estrema protesta contro el sfrutamento del qual l’è stà vìtima al punto che l’editor dopo aver messo in scarsela i 50.000 franchi de l’assicurassion fata su la vita de Salgari, no ’l ga dà gnanca ’na palanca sbusa a la disgrassiada fameja, restà conpletamente a la suta, sensa el papà e con la mama al manicomio comunal.
Emilio Salgari l’èra nato a Verona el 21 agosto 1862, in corso Porta Borsari al n. 7, come testimonia la targa che ghè stada murà su la fassada par l’interessamento de l’amigo Bepi Faccincani, giornalista de “L’Arena” e l’è stà batesà ne la cesa de Sant’Eufemia el 7 setembre col nome de Emilio, in omagio a la madrina, zia de Berto Barbarani e mama de Emilio Barbarani… anca lu poeta.
A 16 ani l’è stà ospità a Venessia in casa de parenti par poder frequentar el Regio Istituto Nautico, deciso a deventar capitano de gran cabotagio ma el corso l’èra longo e la passiensa del nostro Emilio… curta, cusì a un çerto punto l’à molà i libri e ’l s’à inbarcà come mozzo sul legno “Italia” in navigassion par Brindisi e quela l’è stà l’unica volta che l’è andà par mar. La so prima esperiensa de scritor el ghe l’à ’vù nel 1883 con un raconto in 4 puntade publicà a Milan: “I selvaggi della Papuasia”. Sul giornal L’Arena de Verona l’à colaborà par dies’ani, publicando a puntade (tra i altri) “I misteri della giungla nera” e “La tigre della Malesia”, pagadi solo con bele promesse.
Caratere spinoso, tacabrighe e pronto a menar le mane, a la vigilia del novo trasferimento a Torin l’à fato l’amara esperiensa de la galera nel forte de Peschiera par aver ferì in duel el colega Biasioli che ’l l’aveva ciamà da un taolin del Liston “mozzo” inveçe de Capitano, come che ’l pretendéa d’èssar ciamà. La singolar tenzone la gavéa ’vudo logo a Chievo el 25 setenbre 1885 e Salgari l’èra stà el vinçidor.
In ani de laoro l’à scrito ben 105 romansi e 130 novele, ma a conti fati l’à guadagnà in totale la miseria de 87.000 lire. El più de le volte i romansi i ghe vegneva pagadi 300 lire a l’uno, cusì, pur essendo amà da milioni de letori, l’à dovù lotar tuta la vita contro le più gravi ristretesse e spesso anca contro la fame.
Emilio Salgari, grande scritor tradoto in tute le lingue del mondo l’è stà pure un omo meravilioso, generoso e umano. El so unico vissio l’èra quel de uno tra i so più amadi personagi: Janez, amigo de Sandokan. El fumava anca çento sigarete al giorno, nel mentre sentà davanti al taolin sopo, che scuninando el ghe ricordava la tolda de ’na nave, el scriveva i so entusiasmanti raconti con la fida pena, più volte giustà col cao, che ’l pociava ne l’inchiostro sbiavo che lu stesso el se fabricava con çerte bache del so orto. Le furiose tempeste che ’l descrivéa ne i romansi el se le imaginava pestando su i tasti del pianoforte.
El gavéa ’na grossa fameja: la mojer Aida (finida in manicomio) e quatro fiói: Fatima, Nadir, Romero e Omar, più un pìcolo zoo: el can Niombo, un gato bon de rangiar la carne da la pignata, cavàndoghe el coerciolo anca quando l’èra trategnù da un peso, un’oca finida in pignata in un giorno de magra, una galina e ’na simieta. Spesso el se portava in campagna tuto l’entourage e con quelo el ricreava l’atmosfera de i so libri. Alora Niombo el deventava ’na tigre, el gato ’na pantera, ecc. Ma el can l’era ecessionale: Emilio el gaveva insegnà a bajar “grassie paron” e “par piaser”.
Spesso el diséa che se inveçe de scrìvar libri l’avesse esibì Niombo ne le piasse, sicuramente l’avarìa fato più schei! Tra l’altro so mojer la l’avéa adestrà a robarghe qualche sigareta ne l’intento de preservarghe un tantin de salute.
Salgari no ’l gaveva nessuna enciclopedia, né ’na carta geografica o topografica, epur el disegnava magistralmente i loghi descriti ne i so raconti. L’èra pura un burlon, bon de conbinar schersi memorabili. Al club Bentegodi del qual l’èra socio l’à sfidà ’na sera un amigo al tiro a la pistola (segretamente fate caricar a salve). Dopo el boto el s’à finto morto cascando in un mar de sangue, che po’ l’è risultà èssar de bo (serà in un sachetin e sconto dentro la camisa).
Quando l’ator egissian Kabir Bedy che al cine l’avéa inpersonà Sandokan, l’è vegnù in visita ai stabilimenti Mondadori de Verona, l’à dito de èssar stà a rèndar omagio a la tonba del nostro Emilio, a Torin. Naturalmente ò protestà che el “nostro” l’è sepelì a Verona in un canton nero e misero, che mi conossevo ben parché me papà, quand’ero butina, el me ghe portava spesso. Par darghe el posto che ghe vegnéa de dirito nel Famedio Ingenio Claris de i grandi de la nostra storia ò bonbardà de létere e de articoli tuti quei che i avarìa podù iutarme in ’sta batalia, partendo dal 1948. Po’ un giorno finalmente l’assessore ai cimiteri, dr. Pizzoli, el m’à mandà a ciamar e el 14 giugno 1986 a la presensa de le autorità citadine e de i parenti Salgari ancora al mondo, Emilio l’è stà traslado nel Famedio viçin ai grandi veronesi, lu che tra questi l’è stà, a me parer, el più grande. Ma el me amigo Emilio a difarensa de Berto Barbarani che ’l ocupa un arco intiero adornà da n’erma del Modena, l’è in coabitassion con altri manco noti e inportanti de lu.
Me ricordo che el primo libro che m’à portà santa Lussia quando gavéa 8 ani l’è stà “Il tesoro del presidente del Paraguay”, po’ ò seità a lésarghene. Ghe i ò ancora tuti… giustadi-sù con tassèi e strìcole de carta gomada, ilustradi dal napoletan Alberto Della Valle che dopo el suicidio de Salgari el s’à tolto da le spese anca lu co’ la pistola de Sandokan.
De ’sto grande ma sfortunado scritor no’ ghè monumenti; l’unica scultura che lo rapresenta l’è un busto messo in un canton de la Biblioteca Civica de via Capel, insieme a quel de n’altro scritor de aventure, Luigi Motta… questo in totale desmentegon. In conpenso, el bravo pitor e caricaturista Bruno Prosdocimi l’à fato a l’ingresso del celebre parco zughi Gardaland ’na fontana de ceramica adornà de sène a rilievo rapresentanti i più conossudi tra i romansi de Salgari.
’Sto parco, uno tra i mèjo del mondo, l’à anca indeto, con la casa editrice “Papiro-Thema” de Gianni Padoan un concorso de poesia. La manifestassion, coronà da un vasto sucesso l’è stà memorabile! Domìnica 21 april 1991 a presentar la cerimonia de premiassion è stà ciamà Maria Teresa Ruta e Claudio Angelini de la RAI.
Emilio l’è morto in miseria disperà, ma nel 1998, me fiol, apassionato astrofilo, diretor del novo osservatorio “Gelodi” del monte Baldo, l’à podù dedicar uno de i diversi asteroidi che l’à scoperto (el 2794 de Cima Ekar) a Emilio Salgari. El ga un diametro sup. ai 10 km. e ’l gira intorno al sol a una distansa de 400 milioni de km.

EL FAMEDIO INGENIO CLARIS del cimitero monumentale de Verona ospita 29 ilustri; questa la lista: Francesco Zantedeschi (fisico), Salesio Pegrassi (scultore), Gaetano Pinali (acheologo), Giuseppe Venturi (storico e e archeologo), Giuseppe Zamboni (fisico), Luigi Zandomeneghi (scultore e meccanico), Carlo Tonini (chimico e naturalista), Pietro Maggi (matematico e fisico), Carlo Pedrotti (musicista), Paolo Perez (filosofo e poeta), Jacopo Foroni (musicista), Giacomo Franco (architetto), Franco Faccio (musicista), Alessandro Torri (letterato), Ciro Pollini (medico naturalista), Bartolomeo Giuliari (achitetto), Bartolomeo Lorenzi (poeta), Grazioso Spazzi (poeta), Francesco Angeleri (filosofo), Antonio Pompei (archeologo), Giovanni Battista Giuliari (letterato), Torquato Della Torre (scultore), Isabella Scopoli Blasi (letterata), Aldo Fedeli (sindaco di Verona), Giuseppe Zamboni (filosofo), Emilio Salgari (scrittore), Giovanni Uberti (sindaco di Verona), Picotti e Mardersteig.

 Wanda Girardi Castellani