L’Angolo de la Wanda – Febbraio 2011 – “Na sfilsa de relichie”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Na sfilsa de relichie

Solo nel III secolo la religion cristiana l‘à guadagnà, grassie a l’edito de Costantino el Grande (313 d.C.) la parità de diriti co’ le altre religioni e libertà de manifestarse.
Col la fine de l’iconoclastia, soto el regno de ’sto iluminado monarca de l’impero romano d’Oriente è stà costruì splendide basiliche cristiane specialmente in Tera Santa grassie a la fede entusiasta de so mama Elena.
El Vescovo Macario in quel periodo l’identifica i loghi de la passion e de la crucifission e ’l costruisse la cesa del Santo Sepolcro. Propio in quel secolo se ga notissie ciare de la Santa Sindone che l’è stà de sicuro ne le mane de san Cirillo, Patriarca de Gerusalemme. Altre notissie le vien tramandade verso el 670 dal cronista pelegrin Arculfo. Par che a quel tempo el Sacro Lino el fusse abitualmente mostrà ai artisti che che ghe ne faséa dimanda. Da questo la tradission de rapresentar el Cristo con i cavéi longhi e la barba bipartida. Durante i 33 ani de la furia iconoclasta, tute le relichie, spesso pagade a peso d’oro, anca le più assurde, i è stà fate sparir. In diesine de cese se venerava pene de l’arcangelo Gabriele e na diesina e forsi più i era le fedi matrimoniali de la Madona. Le relichie le gavéa el so comercio e podéa capitar che le vegnesse robade o “rapide” come che l’è stà par el corpo de san Marco, portà a Venessia faséndolo passar soto el l naso de i turchi drento a ’na sesta, coerto de mesene de porco (parché ai turchi ghe faseva schifo tocarle).
El Vescovo de Verona, convinto da un sogno che par farghe serar al Padreterno i rubineti che dal cel sora la çità i seitava da mesi a butar aqua a sece roèrse, l’à mandà so sorela a Trento a comprar le relichie de i santi martiri Fermo e Rustico (du santi al costo de uno). I conta che ’pena tornà l’anbassiatrice a Verona, fin che la traversava el ponte Navi con le relichie in man, se sia desfà le nuvole, versendo finalmente le finestre al sol. El Vescovo par riconossensa l’à fato costruìr pena zo dal ponte la bela cesa de san Fermo, dove ancora dorme i du martiri che i à catà la morte in Arena.

Ne la cesa de san Nazar se vènera inveçe el corpo de san Biagio e ’na volta a l’ano le mame le porta i so buteleti a basar la relichia del Santo protetor de la gola. Ne la basilica de san Zen, in una pressiosa bara de vero, ghè esposto el santo Vescovo moro col so “pastoral d’argento incantador”… ma la più importante racolta de relichie l’è però sicuramete quela del “Sanctorum reliquis” de la cesa de santa Maria del Paradiso (in via Paradiso). La racolta, che i padri camilliani i à messo insieme nel corso de i secoli, la va da corpi intieri imbalsamadi o rivestidi de cera, a ossi, stofe, teche, custodie, urne, palioti (“preziosi broccati da paramenti”), sangue de vari santi, un tocheto de la Croce, el corpo de san Terensio, la fassa miracolosa de san Camillo, quela de san Placido e do reliquiari fati a piramide con le relichie de vari altri santi. Sta cesa che par varietà e richessa se podarìa, con rispeto parlando, ciamarghe “Relichia bazar” l’è visitabile col permesso de i Camilliani che i ghe n’à la gestion. Anca se pieni de fede no se pol evitar certe considerassioni: quanti tocheti de la Croce de Cristo ghè semenà par el mondo? A métarli inieme la vegnarìa alta almanco fin a la luna! In quanto ai tocheti de tònega de santi frati, questa la gavarìa da èssar stà, par contentar tuti, chilometrica. In una de le sale ghè una colona rosegà da l’aqua: quela de san Metrone. I conta che Metrone par far penitensa el se sia fato ligar co’ le cadene a ’na colona, fasendo butar le ciave in Adese. Dopo 7 ani de martirio un pescador l’à catà le ciave ne la pansa de ’n pesse… quando el Vescovo el l’à savù l’à assolto (e liberà) Metrone, rivesténdolo de santità. ’Desso el Santo el dorme soto la mensa de l’altar. Ma proseguendo la visita al reliquiario, trovemo relichie de san Claudio, san Francesco, san Bernardino… parfin le pantòfole de san Leonardo, la lengoa de santa Nominanda, un autografo de san Lorenzo da Brindisi, preziosi reliquiari del XlX sec., ceneri de santi e martiri, ’na strìcola de ninsol de san Zen, la testa de san Vitale e un déo de san Luigi Gonzaga. Comovente anca el tòco de mantel de sant’Orsola, la mónega copà da Attila, el “Flagellum Dei”. Ma par darve tuto l’elenco del tesoro de i relichiari no’bastaria tuto Q.C. parché i è diezine de mejari: l’è uno de i relichiari più grandi d’Europa e el se trova proprio qua, a Verona.
Quanto a la cesa del Paradiso, fabricà su i ruderi de n’altra cesa dedicà a san Apollinare nel 1517, dal 1842 l’è conservà da i Camilliani. La pala d’altar l’è de Antonio Balestra (1666-1740) L’Assunta l’è inveçe de Orazio Farinati. Le do statue esterne i è de Salesio Pegrassi (1517).
Bele anca le statue del Marinali e de Diomiro Cignaroli. Ultimamente la cesa del Paradiso l’è stà messa a disposission par le celebrassioni de le sante Messe de i fedeli del Srilanka.

Wanda Girardi Castellani