L’Angolo de la Wanda – Luglio / Agosto 2010 – “El Galelito”

…a cura di Graziano M. Cobelli

gcobelli05@gmail.com

Quatro Ciàcoe: da Verona 

El Galelito

“El Galelito”, cusì se ciamava uno de i tanghi de ’n 45 giri che me mama la faséa andar da la matina a la sera sul vecio fonografo a manovela. La guera l’era finida da poco e tuti se se industriava a ritornar a la normalità. A fine de setembre me papà e me mama i gavéa vendù a uno de Lugo ’na cardensa fata a man da me nono marangon. Schei ghe ne girava pocheti cusì dopo ore de discussioni emo dà via un capolaoro che personalmente rimpianso ancora, par 30 ovi e un galeto. Questo, paraltro l’era ’na bela bestia, co’ un portamento regale tanto che me papà el lo voléa batesar col nome de Cesare. Beh a la fine l’emo ciamà “el Galelito”, titolo del tango che ghe piaseva a me mama.
L’arivo del novo ospite l’à creà subito un probemin: dove lo metemo par sti tri mesi che lo tegnemo a l’ingrasso par le feste de Nadal? La casa l’era pìcola e po’ me mama l’era maniaca de i paimenti incerà e al pensiér de catàrseli pieni de schiti ghe vegnéa afano!
L’unica solussion possìbile l’era de métarlo al cesso, visto che el spassio lì el ghera. Ghemo ligà ’na cordesela a ’na sata, fissàndola soto al lavandin e co’ ’na scudela de aqua e n’altra de mangime el Galelito l’è entrà a far parte de la fameja.
’N altro problema l’è stà che me fradel Silvano (4 ani) da quel momento el s’à rifiutà categoricamente de andar al gabineto parché “quando che ’l faseva la caca el gal el lo vardava co’ un ocio cativo.” La solussion l’è stà quela de comprarghe un bocaleto!
Serto che tri mesi i è bastansa par afessionarse a ’na bestia quasi come a ’n cristian e a ’na bestia; can, gato e parfin un galeto quel poco de tempo el ghe basta a imparar a rispóndar a çerti comandi… o almanco a córar quando te la ciami. El nostro Galelito l’avéa inparà parfin ’ndove che me mama la tegneva i grani de polenta tanto che apena che la verséa la sportela soto al seciar el coreva co’ la gresta drita in bandiera.
Ne i ultimi tempi, verso la fine de novembre, el Galelito liberà da la cordesela (ultima, dovuda consolassion a un condanado a morte) el girava par casa, somenando schiti dapartuto, brao, paraltro, a scansar le spassadorade de la me vecia.
Solo de note lo tegnévimo ligà nel so canton de cesso dove che avéimo pura fodrà de tela nera la porta e la finestra par impedir che a le prime luci de la matina el cantasse, svejando, non solo la fameja, ma anca i altri inquilini de la casa… ’na roba che po’ la sarìa stà pitosto antipàtica specialmente de dominica! Ne i altri giorni (quei lavorativi), inveçe, el sostituiva egregiamente la vecia svelia, anca se con un fià de anticipo.
A ’sto punto, l’era tanto considerà che al 13 de dicembre, Santa Lussia, la gaveva lassà, come ai tri de casa, el “piato” de pan, polenta e varie, con el cartelin “al Galelito”.
Co’ l’aviçinarse de le feste natalissie l’atmosfera l’à scominçià però a farse pesante. Se parlava poco e se se tirava, uno con l’altro, ociade piene de ’na teribile domanda: “Ci gavarìa ’vù el corajo de tirarghe el col?” Daltronde no’ se podéa miga tegnérselo in casa in eterno!!
A risòlvar la question ga pensà la siora Anita, ’na donona nativa da Sanguineto che la stava de casa sul nostro stesso pato. Quando che l’à sentì la storia, sensa gnanca star lì a discùtar l’à brincà el poro Galelito e el giorno dopo, previgilia de Nadal, la ne l’à portà morto e pelado, pronto par èssar messo in pignata. Mi son andà de corsa a serarme in càmara… me mama, mutolida, l’à cambià siera e me fradel l’à tacà a piànsar e a ciapar a pessatà ne le cauce la siora Anita… “l’assassina”! Solo me papà no’ l’à fato ’na piega. A lu un arosto de galeto el ghe stava più che ben!

Comunque… visto che me mama gnanca la l’à voludo tocar, la siora Anita la se l’à riportà a casa par portàrnelo da novo el giorno dopo… coto a puntin co’ le patatine de contorno. Naturalmente po’, a la fine, la se l’à anca magnà e son più che sicura che el “luto” de la fameja Girardi no ’l ga inpedì de gustàrselo e digerirlo alegramente, sensa bicarbonato!
Noialtri, malinconicamente, al pranso de Nadal emo messo in tola i soliti capeleti in brodo, e el solito lesso co’ la pearà, evitando de vèrsar la porta parché el profumo de l’arosto da la tola de l’ Anita el passava i sete muri come la benedissión!
Quanto a me fradel… l’à seità ancora par un tòco a scansar el cesso, parché quando el vardava soto al lavandìn… el se meteva a piànsar. Naturalmente, ogni òlta che l’incontrava la siora Anita “assassina e canibala” del Galelito, ’na pessatà ne le cauce no ’l ghe l’à risparmià par un bel tòco… manco a morir!

Wanda Girardi Castellani