L’Angolo de la Wanda – Giugno 2010 – “Ela… la “Carmen” Anca el mesosoprano GIULIETTA SIMIONATO l’à lassado la sèna del mondo.”

…a cura di Graziano M. Cobelli

gcobelli05@gmail.com

Quatro Ciàcoe: da Verona 

Ela… la “Carmen”
Anca el mesosoprano GIULIETTA SIMIONATO l’à lassado la sèna del mondo.

Nel studio del Maestro Luciano Pollini, “deus ex machina” del Premio Giuseppe Lugo del qual emo parlà par ani su Q.C., ghè un splendido ritrato del celebre meso­soprano Giulietta Simionato in costume spagnolo; pètene slusento piantà sul moro crucugnel, vestito a balse e ’na rosa rossa in boca. Cusì Luciano l’à volù ritrar la so vecia amiga; una tra le mèjo cantanti liriche che à calcà i più grandi palcossènici del mondo, ne la memorabile interpretassion areniana de la Carmen, a fianco de ’n altro grosso calibro de la lirica, Franco Corelli.
Giulietta Simionato, nata a Forlì el 12 de magio 1910, l’à bandonà el spartito sul legìo e serà par senpre el pianoforte che à compagnà la so inimitabile voçe par ’na vita, el 5 ma­gio 2010, a Roma. Ghe mancava ’na setimana a compir un secolo!
Dopo la morte de so mama che l’era contraria a la so passion par el canto, Gulietta la se ga dedicà ànima e corpo, studiando prima a Rovigo e dopo a Padova. El debuto la ghe l’à ’vudo nel 1927 con la comedia musicale “Nina no’ far la stupida” e l’ano dopo l’à scominçià con la lirica a Montagnana. Nel 1933 l’à vinto el primo concorso de “Bel canto” a Firenze, su 385 concorenti; un riconossimento che gavarìa verto le porte de la Scala de Milan, se el Maestro Fabbroni, alora diretor artistico del teatro milanese no l’avesse giudicà la voçe de la nostra Giulieta, non del tuto maura, consiliàndola a ripresentarse qualche ano più tardi.
Solo nel 1947 con la parte de la protagonista ne la “Mignon” de Thomas l’à con­qui­stà la Scala e Eugenio Gara el ga dedicà un articolo dal titolo “Laurea a Giulietta”.
Con una voçe particolarmente estesa, ’binà a forti qualità dramatiche, el nostro mesosoprano el s’à fato amirar su tuti i palchi del mondo dove la Giulieta la s’à dimostrà adata a un gran nùmaro de parte: Carmen, Leonora, Isabella, Cenerentola, Rosina, Azucena, Ulrica, Preziosilla, Adalgisa, Santuzza, Amners. L’à afrontà con sucesso anca partiture del passato, come “Gli Orazi e i Curiazi”, de Cimarosa, “Gli Ugonotti” de Meyerbeer e el “Tancredi” de Rossini.
Dise i giornài che ne la so cariera l’à interpretà 132 ruoli de oltre sessanta autori, ma secondo i critici l’à tocà la veta più alta con l’interpretassion de la parte de Valen­tina ne i “Ugonotti” de Mayerbeer.

L’è stà ben nota la so amicissia con la Callas. Insieme le à lassà ne la discografia de la Scala (1957) un dueto memorabile ne l’opera Anna Bolena de Donizetti
A l’Arena de Verona l’à esordì nel 1948 nel “Barbiere di Siviglia”. Nel 1957 l’à cantà la “Norma” de Bellini con Corelli.
El 1958 l’è stà l’ano de “La favorita” con Gianni Poggi, mentre el 1959 el n’à regalà ’na splendida Azucena in ’na memorabile edission del Trovatore, interpretà da Franco Corelli. Nel 1960 l’è stà Amneris in Aida. Nel 1963 l’à cantà con un partner del calibro de Carlo Bergonzi e nel 1961-1965 l’è stà ’na convincente Carmen viçin a Franco Corelli.
Giulietta Simionato la s’à ritirà da le sène nel 1966 dopo el so secondo matrimo­nio con un grande amore: el noto clinico Cesare Frugoni (scomparso nel 1976) che ’l l’avéa cortegià par oltre dies’ani.
Dopo el ritorno a la vita pùblica la s’à dedicà con passion a l’insegnamento.
’Na setimana prima che su l’orolojo de la so vita batesse el secolo, Giulieta l’à tolto sù la pesante valisa de i so ricordi e l’è andà a unirse ai celebri partner che i l’à preceduda, tra i tanti, Giacomo Lauri Volpi, Beniamino Gigli, Francesco Merli e Franco Corelli.

Wanda Girardi Castellani