L’Angolo de la Wanda – Aprile 2010 – “Quando è sbarcà a Verona la troupe de la MGM”

…a cura di Graziano M. Cobelli

gcobelli05@gmail.com

Quatro Ciàcoe: da Verona 

Quando è sbarcà a Verona
la troupe de la MGM

Quela de Giulieta e Romeo, i du sfortunadi morosi veronesi, l’è la più conossuda e celebrada storia d’amor de tuti i tempi. Da quando el Conte Luigi Da Porto, dal so eremo de Montorso Vicentin dove che ’l s’era ritirà in convalessensa da ’na ferida de guera, el s’à trasformà in leterato e poeta, l’à scominçià col rèndar popolare ’na storia che gavéa contà un so conpagno d’arme; ’na storia che partida da lì l’à girà el mondo con diversi look: novele, romansi, opere liriche, baleti, ecc. I è stadi tanti e inportanti quei che l’à riscrita, primo fra tuti el grande poeta inglese William Shakespeare. A Verona, dove s’era svolto el drama, a métarlo in poemeto ga pensà Berto Barbarani e Bepo Spela. Po’ ’verso la fine del XlX secolo, con l’avento de la cinematografia el ga ’vù la so massima notorietà.
Dopo l’esperimento de ’na pelìcola de pochi minuti, girà nel 1908 par la regia de George Cukor, la tragedia scopià ai tenpi de i Scaligeri, soto la Signoria de Bartolomeo de la Scala, fradel de Cangrande, l’è stà girada a Verona nel 1935 da la casa cinematografica americana de Hollywood, la Metro Goldwyn Maier.

A inpersonar Giulieta l’è stà ’na diva bela e za celebre Norma Shearer, mentre el ruolo de Romeo el ghe stà afidado al biondo Leslie Hovard Steiner, de origine ungherese, ma nato a Londra nel 1893, quel stesso che 4 ani dopo l’à inpersonà el romantico Ashlei Wilkes, la passion de Rossella O’hara, nel primo fim a colori “Via col vento” par la regia de Victor Fleming; un monumento de la cinematografia de tuti i tempi incoronà da ben diese Oscar. A proposito de “Ashlei”… personalmente no’ ò mai capì come la protagonista, avéndoghe soto man un tòco de fusto de róaro come Clark Gable, l’abia smanià par quel morto de sono lì!
I du atori i avéa passà la trentina ma in quei ani el pùblico de le sale cinematografiche (de solito definide “cine-miola” par l’abitudine de tirarse drio scòrse de faoline, bagigi, moneghete, pop-corn, ecc.) l’era de boca bona e no ’l stava a pesar col balançin da farmacista. S’era ancora assè distanti da i miracoli del computer, bon de resussitar anca i morti.
La nova pelicola recità con i versi de Shakespeare, l’è stà dunque girada a Verona e l’incarico de alestir le sène e svilupar el progeto el ghè stà afidado dal Comune a Erik Hesselberg, american residente a Verona che de cine el se ne intendéa, anca parché so nono l’era l’ator american Melvy Douglas partner de la “divina” Greta Garbo. Durante la lavorassion de la pelìcola Hesselberg el s’à ocupado anca de alestir un museo par Giulieta ne la casa de via Capel e de darghe pure el massimo risalto, atraverso inteligenti restauri a la tonba de l’infelice butela, sistemada nel chiostro de san Francesco al Corso. A èssar sinceri, visto che no’ ghera gnancora l’inimitabile Zeffirelli, le sène i è stade fate in maniera discutibile tanto, par far ’n esenpio: sul sfondo de piassa Erbe, se podea védar la cesa de san Zen. Quanto al famoso pontesel, i à utilisà un tòco del pùlpito del domo de Pisa.
La “calada” a Verona de la troupe de la casa cinematografica americana l’à messo soto-sora i pacifici citadini. Me papà el m’à contà, da buteleta, almanco sento volte, del duel tra Romeo Montecchi e Tebaldo Capuleti, cusin de Giulieta, che s’avéa svolto sul ponte de Castel Vecio, parché me papà el ghera, tra i adeti ai rifletori.
El film el ga ’vudo in America, come in Europa, grande sucesso. Nel 1937 a la prima de Verona ghè stado un gran gala co’ la presensa parfin del ministro de la propaganda, conte Galeazzo Ciano.
L’è stà in quei ani che è scominçià la tradissional corispondensa de i maladi de amor: “Lettere a Giulietta” par dimandarghe consili e conforto.
A novo custode de la tomba è sta eleto Ettore Solimani ex acrobata, cameramen del muto soldà de ventura, che l’à subito scominçià a rispóndar a le létere che giornalmente se muciava ne la casseta de la casa de via Capel ! Dopo de lu à seità la bela esperiensa el prof. Gino Beltramini.
Ma tornando a l’ator inglese Leslie Hovard; l’è rivà al primo film a colori con ’na fama ben colaudà. Nel 1934 l’avéa girà con Bette Davis “Schiavo d’Amore” e subito dopo l’avéa vestì i eleganti pani de “la Primula rossa”.
Howard l’à perso la vita el primo de giugno del 1943. L’èra in viagio su un DC3 partido da Lisbona. Con lu viagiava el so agente Alfred Chenha, un omo grasso e pelà con un eterno toscan in boca; da distante se lo podéa scambiar par Winston Churchill. L’aereo l’è stà tacà al largo de la costa sul golfo de Biscaglia da l’aviassion tedesca e abatudo in mar.
Forse la causa l’è stà la somejansa de Chenha con el premier inglese, ma ghè stà anca el sospeto che l’obietivo de la Luftwafe el fusse propio Howard, un agente segreto inglese.
La verità, comunque no se l’à mai savuda!

La famosa casa de via Capel, l’8 lujo 1905 l’è stà comprà dal Comune de Verona col so cortileto ’ndove finalmente à podù trovar posto la bela statua de Giulieta opera del scultor Nereo Costantini che da ani, in atesa de ’na giusta sistemassion l’era confinà in un canton del Municipio.
Tuti i inamoradi del mondo i sèguita scrìvarghe a la nostra eroina e a rispóndarghe a so nome ’desso l’è el Club de Giulieta direto dal dot. Tamassia che el cura anca un giornale, dal 1993, un importante concorso che premia le létere più bele. La premiassion la vien fata a San Valentin.
Da qualche tempo l’è possìbile anca andarse a sposar ne la casa de i Capuleti (o Del Capel) con ’na spesa abordabile. In fine el dot. Franco Viviani dopo ’na longa ricerca ne le varie biblioteche citadine, l’è riussì a stabilir che Giulieta l’era nata el 16 setembre 1284. Ricordeve de farghe i auguri. L’indirisso l’è: Via Galilei n. 3 – 37133 Verona.

Mostra permanente de le létere a Giulieta
Donca, i è mejara le létere che riva ogni ano da tuto el mondo, indirissade a Giulieta Capuleti, fenomeno unico e sugestivo, riciamo internassional. El Club de Giulieta che da ani el risponde a tute, el vèrse i so archivi par mostrarghe al pùblico le létere più bele in una mostra permanente a ingresso libero.
Saloto de Giulieta: Via Cappello n°21, 1° piano – con entrata nel negozio de i ricami.

Wanda Girardi Castellani