L’Angolo de la Wanda – Giugno 2009 – “HOSPICE san GIUSEPPE”… L’INTROL del PARADISO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“HOSPICE san GIUSEPPE”… L’INTROL del PARADISO”

O’ senpre provà ‘na streta al cór al pensiér de tanta pora gente che va a morir in una de quele camarone a più leti de ospedàl, sconta ai oci dei altri maladi e dei só parenti e amiçi in visita, da un paravento.

Almanco la morte la dovaria ‘verghe dirito a la só privaçi!
La soferensa par la perdida de ùn che n’èra caro l’è quanto de più bruto se possa imaginàr e solo la pietà, che senpre nasse da l’amor, la pol darne un poco de conforto; ‘na caressa legera come le ale de ‘na farfala sóra la piaga verta e sanguinante del nostro dolor.
A Verona, a ‘na diesina di chilometri dal centro, a Marzana nela verde Valpantena, gh’è un ospedal che fin a poco tempo fa l’èra un manicomio.
Nei ani “50” in conpagnia del mai desmentegado atór, l’amigo Toni Beltrami, son andada spesso a intratener quel particolarissimo publico con le poesie dialetali. Me ricordo che’na sera mentre che Toni el me riaconpagnava a casa, l’à comentà: “Eto sentì? I sganassava come mati!” (e lo credo ben!)
In una de quele recite, un dopodisnàr del 1952, ò rivisto la me vecia maestra de le elementari. L’èra malà de alzhaimer, ’na gran bruta malatia che ai me tenpi i ghe ciamava “demenza senile” o arteriosclerosi. Quel’incontro el m’à lassà ‘na ferida ne l’anima, tanto che non son più riussida a revédar co’ l’obietivo dela memoria la me maestra Eugenia, bela e bersaglieresca, così come l’èra nei ani trenta.
Dunque, ne l’ospedal de Marzana trasformado, dopo la legge Basaglia, 180/1978, in uno tra i meio nosocomi dela çità, da tre ani è sta’ creà ‘na strutura che val la pena de conóssar. Se trata de ‘n conplesso ciamà: Hospice san Giuseppe (el santo patrono dela bona morte). La costrussion tuta colorada de rosso e de gialo su bianco l’è a un solo piano con dei giardineti interni verso i quai varda le camare (tute singole) a “far spesa” de luce, de sol, de profumo de fiori e concerti de sigale.
Ogni camara (ghe n’è 14) la g’à el so bagno privato, el divano-leto par ci assiste el malà e anca un angolo cotura modernamente atressado dove l’è possibile cusinàr. Però, a richiesta, l’ospedàl el serve anca a ci fa assistensa i tre pasti de la giornada.
La strutura rivolta prevalentemente ai maladi gravi definidi “terminali”, l’è nata par darghe a lori e ai parenti el conforto dela vicinansa continua.
A l’interno gh’è ‘na bela, originalissima ceseta tuta sofusa de azuro. De sora al Cristo de l’altar, da ‘n alto camin, vièn-zó un toco de cel a vestirlo de luce!
Gh’è inoltre un saloto con la television e diversi angolini andó sostàr in meso al verde.
Sui muri a ralegràr i oci gh’è diversi bei quadri e torno-atorno dapartuto dele piante. Nel coridór ‘ndove gh’è la ceseta, tre porte le dà su stanse adibide a camere ardenti che le vien preparade par l’estremo saludo al defunto prima del trasferimento al camposanto.

Nela nostra provincia ‘sta inissiativa la sta avendo un seguito; altre 7 stanse i è stade messe a disposission (senpre par i maladi più gravi) a Cologna Veneta e, a quanto s’à podù capìr dala bela trasmission dedicà a l’Hospice da TeleArena, altre presto se ghe ne zontarà.
Ma tornando a Marzana, bisogna dir che el personale medico e paramedico con tuti i assistenti e i infermieri che ghe opera, par competensa, umanità, passiensa e gentilessa i è quanto de meio se possa incontràr e par rèndarsene conto basta lésar, sul librón parecià ‘péna dentro a l’ingresso, le tantissime testimonianse dei fameiari che i à podù trascórar in quel lógo de pace cusì viçìn a l’intról de “l’al-de- la”, i ultimi giorni ‘rènte a un genitór, un marì, ‘na moiér, un fradèl, un fiol, trovando in ‘stó lógo de pace e ‘sti angeli dal camise bianco, conforto nela desperassión.

Wanda Girardi Castellani