L’Angolo de la Wanda – Maggio 2009 – “Destin o sfortuna? UN S-CIANTO CHE AVARIA PODU’ CAMBIAR LA STORIA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Destin o sfortuna?
UN S-CIANTO CHE AVARIA PODU’ CAMBIAR LA STORIA

Un mai desmentegado amigo, come mi apassionado fans del nostro grande Luigi Pirandello, l’usava far ‘sta considerassión: “se mi quel giorno inveçe de andàr a tór el cafè sul Liston fussi restado a casa o se ne l’andarghe avessi scapussà ronpendome ‘na gamba, la me vita l’avarìa ciapà tuto ‘n altro indirisso, forsi meio ma sicuramente non pèso” e ‘l se riferiva a l’incontro con la dona che la g’avea fato conóssar le pene de l’inferno su ‘sta tera.
Ciamémoghe “destin”… èlo o no’ d’èlo. Qua ghe sarìa da fàrghene ‘na discussión longa come el Pàssio sensa rivarghe a cao!

Qualche tenpo fa lesendo un vecio articolo de “L’Arena” dal titolo “m’è vegnù de farme la ‘stessa dimanda co’ le relative considerassioni sóra ‘na disgrassia che avaria podù cambiàr la storia.
L’era le 17,30 de Dominica 3 agosto del 1919. Le strade e le piasse in quel dopodisnàr de istà passà le ore de l’afa le s’éra inpenì de gente; mame co’ le carossine, butele co’i onbrelini da sol de tanti colori, omeni eleganti con tanto de paiéta in testa e bagolina e buteleti inboressadi de corsa co’l s/cianco, co ‘l monopatino, co’l çercolo. Tuto un alegro sigamento tra el piolàr dei usèi, el bisbiàr de le foie sui rami ninà dal ventesèl e ‘l concerto de le sigale inbriaghe de sol.
Tuto de’n colpo s’à sentì sora i tanti rumori el motor de’n arioplano. L’èra ‘na roba ancora pitosto rara a ‘n ano da la fine de la grande guera che avea visto sviluparse ‘sto novo corpo; l’aviassión. Tuti i à vardà in alto dove, nitido, come inpiturà sora un sfondo de’n blu parfeto sensa ‘na macia, a n’altessa de circa 2000 metri volava un arioplan. Subito s’à capì che’l doveva averghe qualche problema, infati da la coa à tacà vègnar fora del fumo nero. Subito dopo è piovù dei tochi de tela brusada. L’aparechio a ‘sto punto, soto i oci inoridì dei veronesi el s’à s/ciantà spacandosse in du tochi. Tra quei, insieme a i altri rotami s’à visto vègnar-zó i passegeri, praticamente in piè, sbatendo ganbe e brassi. Tuto; i resti de l’aereo e i pòri morti i è cascadi sul terèn andó che ‘desso gh’è la bela cesa de la Madona Pelegrina, de fronte a la stassion de Porta Nova. L’arioplan, tipo “Berlin” 11856, ridoto da no’ poderlo gnanca riconossar, l’èra smissià ai corpi martoriadi dei passegeri. Se ghe n’à contadi 14 ma altri i è vegnù-su, qualche giorno dopo dal canal Camussoni. Uno de questi l’èra el giornalista Giannetto Bisi marì de la modela del grande pitor futurista Umbeto Boccioni.
S’à savudo po’ che l’aereo, un “Caproni” biplano a 3 motori, 600 cavai, un residuato de guera rimesso in sèsto par el raid Milano-Venessia e ritorno, l’era partì da Milan a le 7,45 del giorno 3 par tentàr de stabilir un record de velocità. I passegeri i era tuti i più inportanti capi-redassión dei giornai italiani. Rivà a san Nicolò de Lido a Venessia, i era stà acolti con grandi festegiamenti. Conpresi i piloti e i mecanici i partecipanti i era ‘na quindesina: Oreste Cipriani del “Coriér de la sera”, Tancredi Zanghieri del “Secolo”, Giannetto Bisi del “Mondo”, Tullio Morgagni del “Secolo ilustrado” e del “Cielo” e Mario Bruni de “La sera”. Uno tra i giornalisti, el più fortunado, l’è desmontà a l’ultimo momento fermandosse a Venessia (forsi par un incontro galante). E’ circolà la voce che a restar ne la çità lagunare, abandonando el raid a “mèsa predica”, fusse sta’ Benito Mussolini che al tenpo l’èra diretór del socialista “L’Avanti”.
Se la notissia l’è vera, in quel ‘agosto de 90 ani fa bisogna dir che’l futuro Duce de fortuna el ghe n’à ‘vù gran tanta… noialtri italiani inveçe no!!
Ci-sa che altra piega la g’avaria avudo la storia se le robe le fusse andà difarente.
Qualche tenpo fa, ‘na sera su la tardosa, andando drio ai me ricordi che me parlava de ‘na targa de piera murada su la spaleta de uno dei ponti sul canal Camuzzoni de drio de la cesa de la Madona Pelegrina, scortà da Angelo Antoniazzi e con la machina fotografica son andà a çercarla par “Q.C.“ma no’ l’ò più catà!
In conpenso ò ris-cià de ciaparle nel muso dal picolo esercito de le “spurcis-puellis” che è vegnù a difèndar el so teritorio, convinte che g’avesse busarà un cliente (Angelo).

Wanda Girardi Castellani