L’Angolo de la Wanda – Marzo 2009 – “I RAGNI DEL KING ROCK”

…a cura di Graziano M. Cobelli

gcobelli05@gmail.com

Quatro Ciàcoe: da Verona

I RAGNI DEL KING ROCK

Ne l’imaginario popolare l’alpinismo l’è ligà a inpervie roce, altissime çime afrontade anca in sesto grado, in cordada o in solitaria, cioè da un solo alpinista armà de corda, picossa, ramponi e moschetoni. Stó sport l’è scominçià a la fine del XVIII secolo e tra i nomi che la só storia la ne tramanda gh’è Cesare Maestri, Walter Bonatti e più de reçente Reinhold Messner.
L’alpinista se lo imaginemo cusì… un “Superman”; ‘Na rocia a sfidar le roce con l’arfio de la morte senpre ai calcagni tra l’urlo del vento e le tompeste de neve.
Beh… se ghe ne inpara una ogni giorno! Par esempio… Avaressi mai pensà che se podesse ranpegàr al coerto, su par i muri come che fa i ragni a testa in zó… ’na sata qua e n’altra la, tirandosse drio ‘na corda co’ n’inbragadura e basta?
Eh, si che se pol farlo; un alpinismo da palestra che par via de difficoltà el ghe n’à la só parte. Fin che el ranpegadór el va in “parete” un “conpare” el lo tièn co’ ‘na soga de sicuressa, po’ quando che l‘è straco de andàr su e zó par muri e sofiti el se lassa andàr longo el cao come un novo Tarzan o come che fa i ragni tacà al fil d’argento de la só bava.
Sto sport l’è ‘na roba ‘bastansa nova partanto no’ l’è gnancora dissiplina olinpica ma a la prossima gh’è da giurarghe che’l de sarà.

Fin a poco tenpo fa de sti tipi de palestre par ranpegàr savea che in funsion da le nostre parte ghe n’era solo una ; quela de Arco. ‘Dèsso, finalmente, ghe l’avemo anca a Verona, fresca de bateso; la “KING ROCK” in via Cà di Mazzè n°21 37134 PALAZZINA veronese. Info 348 1463700 (www.kingrock.it info@kingrock.it) ‘Sto centro l’è nato dal desiderio de dù amiçi; Nicola Tondini e Giovanni Strapparava (un rampegadór veronese) de crear finalmente un logo dove i clinber veronesi i podesse scalàr anca quando che’l tempo l’è bruto. La proposta l’à catà entusiastico consenso anca fra i altri amiçi clinber cusì, sensa nessun finansiamento da parte de istituti statali, è nata la “Società “Verona clinber srl” composta da ‘na trentina de soci. ‘Sto moderno conplesso l’è costituì da dó sale: quela superiore “Boulder” dove che se se rampega sensa corde (dotada de stramassi par n’eventuàl “caduta morbida”, l’è alta 4,50 metri con 350 mq de muri e oltre 3000 atachi (prese).
La sala inferiore, ciamada “Vertical”, (ma za soranominada “Catedral”) l’è alta 14 metri , con la belessa de 150 vie servide da moschetoni e rinvii con dificoltà che parte dal terso grado fin a rivàr oltre l’otavo dove forse anca ‘na sìmia la tacaria a far fadiga!
La palestra de soto dove se se ràmpega con le corde e i moschetoni, par la più alta dificoltà oviamente la riciama i esperti.
I muri da scalàr i è tuti trapontadi da curiosi atachi de varie forme e colori andó se mete le man e i pié par andar avanti e indrio.
I scaladori che se cimenta in ‘sto sport pitosto difcile i seglie in partensa el color de i só atachi . Come g’ò ‘vudo modo de dir, sti scaladori i se fa dar aiuto da un “conpare” che’ l tien in tiro la corda infin che st’altro el fa la só rampegada .
A l’ingresso de la palestra gh’è un ben fornido bar dal qual ‘na grande vetrata la consente la vista su la sala “Vertical” e ve assicuro che l’è proprio un spetacolo meio de quel da circo!
Se sa che par praticàr ‘stó sport se ga da èssar leggeri e elastici, qualità che dificilmente le va a brasseto, con quei dei “anta” par quanto che i possa çercàr aiuto dal formaio da gratàr.
In conpenso l’è adato anca ai buteleti da 5/6 ani. Me neodo Alessandro (7 ani) el “rànpega” da du ani e l’à zà ciapà un par de premi. Anca só sorella Alice (13 ani) la se la cava ben. A tegnér la soga de sicuressa in tiro ghe pensa so papà (me fiol Flavio) servendoli a turno.
Sto sport l’è racomandabile ai buteleti parché, oltre a rinforsarghe i muscoli el ghe rinforsa anca el caratere infondendoghe la fiducia in sè stessi. Tuto questo el ghe consente de afrontàr la “ranpegada” come ‘na sfida par scoprìr le proprie capacità e i propri limiti vivendo in tuta sicuressa le difficoltà a l’aparensa quasi inpossibili del muro.

Wanda Girardi Castellani

Orari del centro:

dal luni al vènardi da le 10 a le 23,30 (par le scole la sala grande la verse a le 8.)
el sabato : da le 9 a le 21,30
a la domenica : da le 9 a l3 19,30

Gh’è in funsion el servizio de noleggio atressature – biblioteca de montagna – spogliatoi – docce e grande parchegio esterno.

***

Foto da Google

***