L’Angolo de la Wanda – Febbraio 2008 – “CI VOL VEDAR LA MAMA… EL FASSA UN PASSO AVANTI”!
…a cura di Graziano M. Cobelli
gcobelli05@gmail.com
Quatro Ciàcoe: da Verona
El dott. Mèngele; l’omo nero, l’angelo de la morte,
‘na matina de novembre del 1944 el s’à presentà
ai picoli internadi de la baraca n°11 ne l’ inferno de
Auschwitz-Birkenau, disendo :
“CI VOL VEDAR LA MAMA… EL FASSA UN PASSO AVANTI”!
Se g’à da inciodarlo ne la memoria e de fàrghene continua testimoniansa a le nóve generassioni che, ne l’orór de la shoah, è stà’ sterminado da l’odio nasista, tra i altri, un milion e meso de butini par la sola colpa de èssar nati ebrei!
A vinti di ‘sti qua ‘na professoressa veronese, Maria-Pia Bernicchia, con la pietà e l’amor de mama, sgonfo de ‘na poesia che esalta e comove, dopo lónghe e fadigose ricerche, l’è riussida a darghe un nome, ricostruendoghene anca el teribile calvario.
Dú i èra francesi, dú i èra olandesi, uno, de la ex Jugoslavia, quatordese i èra polacchi e uno l’èra italiàn, Sergio De Simone, nato a Napoli el 29 novembre 1937.
I nomi: Georges-Andrè, Jaqueline, W.., Roman, Lelka, Edo, Marek, Eduard, Bluma, Surcis, Ruchla, Alexander, Sergio, H.., Lea, Riwka, Roman, Marek, Eleonora, Mania.
L’è el 27 novembre 1944.
Auschwitz Birkenau – ne la baraca n°11 ocupada da buteleti rastreladi nei gheti de tuta l’Europa invasa da le trupe de Hitler, se presenta su la porta co’ un soriso da Giuda, acativante, el dotor Mengele’ autorisado a ‘doparàr, de quei campi imbugà de gente destinà a la “solussión finale”, tuto el material umano che ghe serviva par i só mati esperimenti… Rivolto a quele pòre creature, sbregà dai brassi de só mama, sradisà da la só tera, da la só casa… afamadi, impauridi e ransignadi dal fredo, el ghe dise “Ci vol védar só mama, el fassa un passo avanti!”… e a quele parole, nei coresini desperadi rinasse la speransa. Cusì, verso quela luce falsa se’ncaminava 20 de quei butini; diese femene e diesi mas-ceti de età compresa dai 5 ai 12 ani, che, caricadi su un camion da Birkenau i è stà scaricà a la stassion de Auschwitz dove a spetarli inveçe dei basi caldi de la mama i à catà quel ingiassà de la morte.
La tragica storia dei vinti martiri la rapresenta una tra le più teribili manifestassioni de la politica nasista decisa a l’eliminassion del popolo ebreo; un genocidio, forsi el più grande a memoria de omo!
Difficile par ci no’ g’à el pél de fil de fero su l’anima… imaginarse i longhi mesi de soferense, febri, abandoni, operassioni chirurgiche inutili a le ghiandole linfatiche e ci-sa che altro!
Da l’otobre 1943 a l’autuno 1944 i è stà sotoposti ai esperimenti più sbaladi. Trasportadi po’’ a Neuengamme, un lager viçin a Amburgo dove ‘n altro dotor, tal Heissmeyer el l’à pura infetà co’ i bacili tubercolotici vivi, fasendoli tuti malàr par po’ studiàr l’evolvarse de la malatia. El scopo, l’èra quel de scoprìrghene el vacino. L’esperimento però l’è andà mal e alora, deluso, anca ‘stó qua l’à ‘bandonà le creature inocenti,
El 20 de aprìl del 1945 ne la scola amburghese de Bullenhuser Damm, i 20 picoli martiri, testimoni de ‘n’altra cadena de teribili deliti, poco prima de l’arivo de i soldati inglesi i è stà ‘picadi, dopo èssar stà drogadi, su l’ordine vegnù da Berlino… ”Picadi come quadri tacà al muro”, secondo la spiegassión, al processo, de uno dei boia a la domanda: “come ei stà eliminadii?”
Insieme con altri giustissiadi la matina drio’ i è stà’ portadi ai forni crematori e le só ceneri po’ i è stà’ spampanade par i campi.
Quando i inglesi i è entrà in quela tragica cantina dei vinti angeli no’ era restà che qualche bambola… qualche umile zugàtolo.
A racontàr ‘sta storia che siga vendeta al cospeto de Dio, l’è stada la professoressa Maria Pia Bernicchia nel só libro “I 20 butini de Bullenhuser Damm”, un libro stampà nel 2004, recentemente andà in ristampa col titolo: “Ci vol védar la mama el fassa un passo avanti”…
El 5 marso de st’ano ne l’aula de tecnologia de l’I.C:10 Borgo Roma est, è stà’ verta ‘na mostra de le taole fotografiche e dei documenti storici in argomento. L’autrice, in ‘sta ocasión, l’à incontrà docenti e genitori parché ‘stó libro, al quàl l’à dedicado tanto del so tempo, le so energie e el só amor, el g’abia da èssar un valido strumento de insegnamento par le nostre scole.
Ogni ano çentenara de persone e soratuto, tanti buteleti, i ricorda i “nostri” butini vedendo el giardin de rose bianche de via Guastalla, a Milan, e in altre çità italiane.
El primo giardin de rose bianche l’è stado verto e intitolado ai 20 martiri davanti a la scola del massacro a Bullenhuser Damm a Amburgo.
Ai butini una caressa par tute le infansie robade
par i afeti sbregadi, par i fiori spicadi,
par i viagi sensa ritorno, par tuti i progeti-omo mai realisadi
par tute le feride de l ‘abandono,
par tuto el fredo, par tuta la paura
par tuto l’odio, par tuta la fame,
par tuto el non amore…
Personalmente, a nome de tute le mame voi seràr ‘sto ricordo con un grassie riconossente a Maria-Pia che, gratis… par motivi soltanto etici, con passiente, certosin impegno l’à ricomposto tuti i brandèi de ste vite distrute e su quei pòri corpi despersi l’à fato la promessa de andarli a saludar, i só butini ogni ano par… passàr qualche ora con lori, e caminando lóngo el sentiér de la baraca 4-a a Neuengamme, catàr-su un sasso da quel posto tremendo, desmentegà da Dio e portarlo a Amburgo, ne la cantina, sgonfa de teribili memorie, de la scola de Bullenhuser Damm… la, dove parfin el silensio l’è deventado polvar.
Wanda Girardi Castellani
