L’Angolo de la Wanda – Settembre 2007 – “L’Abisso”, un film par la “Spluga de la Preta“

…a cura di Graziano M. Cobelli

gcobelli05@gmail.com

Quatro Ciàcoe: da Verona

“L’Abisso”, un film par la “Spluga de la Preta“

‘Stó ultimo aprìl, ne l’auditorio Modigliani de Padova, par inissiativa del Grupo Speleologico Padovan, del CAI de Padova e có ‘l sostegno del vicesindaco Carlo Sinigaglia, è sta’ proietà, in seconda presentassión dopo la premiere de Verona, el film “l’Abisso”, fruto de dú ani de riprese con trenta dissese da parte de ‘na setantina de speleologi, el tuto par racontàr l’interessante storia de le esplorassioni in uno tra i più dificili abissi del mondo ; la Spluga de la Preta, sul fondo de la quàl, a quasi 900 metri, nel luio del 1963, s’à podù védar la “Sala Nera”.
El celebre abisso, secondo solo al Gouffre Berger, el g’à el só unico ingresso sui monti Lessini veronesi e el penetra fondo ne la pansa del Corno D’Aquilio che ghe fa corona al paeseto de Fosse, poco più ‘vanti del comune de Sant’Anna d’Alfaedo.
A l’inbóco, guardà da la ceseta dei speleologi, se ghe pol rivàr praticamente in machina.
L’esplorassión l’è scominçià otant’ani fa, nel 1925 quando un grupo de alpinisti de la sessión universitaria del CAI Verona el s’à calà in quel che po’ el deventarà el famoso posso “131”. La primavera dopo ‘stó Grupo el s’à calà da novo scoprendo un secondo posso, batesà “Cabianca”; un buèl profondo 108 metri e convinti de aver batú el vecio record mondiàl de profondità i s’à rivolto al giornàl fassista “El popolo d’Italia” par organisàr n’altra spedissión più massissa. ‘Sta olta i è rivà a 300 metri ma fóra è girà la voçe che i veronesi i era rivà inveçe a 500 metri cusì la Spluga l’è stà’ dichiarà l’abisso più fondo de la tera; un primato che po’ l’à perso nel 1953 co’ la scoperta in Francia de la Pierre Saint Martin.
Ma la Spluga de la Preta l’è restada la grota più conossuda; praticamente el sinbolo ‘stesso de la speleologia, celebre anca parché, dopo çentenara de dissese e esplorassioni da parte de speleologi de tutto el mondo, el mistero del svilupo de le só galerie nel cór de la montagna, verso la luce, ancora ‘dèsso lo conosse solo i barbastrèi (o signàpole come ghe ciamemo a Verona).
De ‘stó impressionante abisso l’è interessante anca l’aspeto biologico. Al só interno è stà’ trovado inseti che vive solo ne le grote (troglobi), e che i è dei veri fossili viventi; come l’Italaphenops Dimaioi, el più grande carabide orbo del mondo scoperto ne la Spluga nel 1963.
Nei ani 50 scominçia le grandi spedissioni del Gruppo Grotte Falchi de Verona.e nel 1958 Lorenzo Cargnel (13 ani) fiol del capospedission, noto oltre che par la speleologia, per èssar uno dei meio fotografi de Verona (con studio in via xx Setembre) el riesse a trovàr, passando traverso ‘na stretoia de la misura, apunto, de’n buteleto, la prosecussión de l’ abisso.
E rivemo ai ani sessanta. El 10 luio del 1963, sete speleologi, dopo ‘na permanensa in grota de quasi nove giorni i toca par la prima volta la “Sala Nera” a 875 metri de profondità.
A quel tenpo, durante ‘na nova spedissión organisà da la Società Amiçi de la Natura de Verona, con permanensa in grota de dó setimane, ‘na disgrassia l’è vegnù a coloràr de nero tuti i entusiasmi; la moiér de’n nostro parente; MARISA BOLLA CASTELLANI, una de le dó coragiose speleologhe che ‘iutava i compagni nel canpo base de profondità, l’è precipitàda perdendo la vita. Dificile l’è stà’ anca riportàr el só corpo in superfice.
A l’inboco de l’abisso che’l se vèrse nel verde dei pascoli alti de la Lessinia, ‘dèsso gh’è ‘na picola lapide a ricordo de ‘sta vitima, par fortuna l’unica, de la Spluga de la Preta; un ricordo che è ripetù anca ne la ceseta li da rènte.
Po’ finalmente el Grupo Grotte Falchi de Verona l’è riussì a realisàr el sogno a lóngo perseguido de rivàr sul fondo de l’abisso. A la guida de Mario Cargnel: Lorenso Cargnel, Luciano Boni, e Ugo Stocker, monfalconese, i è rivadi anca lori a la Sala Nera, el 10 agosto del 1967.
In seguito gh’è stà’ altre inportanti spedissioni che à fato altre scoperte, stabilì altri record. Nel 1969, una de queste, composta de bolognesi, faentini, veronesi e torinesi l’è restà blocada da ‘na piena a 620 metri de profondità, sóto el pósso ciamà Torino e s’à credudo el pèso. I speleologi i è pò’ riussidi a vègnar fóra ma solo dopo ‘na permanensa in grota de ‘na diesina de giorni.
In seguito se g’à messo, spedissioni organisade in tuto el mondo e la Spluga de la Preta l’è deventà forsi la più ambida de le conquiste. La profondità fin’ora acertada la va, oltre la Sala Nera, fin a 985 metri e se podarà andar ancora più in zó.
Intanto co’ l’operassion “Corno D’Aquilio” a la guida de ‘na celebrità nel mondo de la speleologia; Giuseppe Troncon, s’à fato pulissia ne l’abisso de quatro tonelade de “sgaùie Speleologiche” bandonà nel corso de le spedissioni passade.
Inoltre è stà’ fato varie ricerche sientifiche con altre importanti scoperte.
Nel 2001 la Preta l’è tornà sul palco de la cronaca grassie a l’inpresa del bressiàn Matteo Rivadossi che in “solitaria” con corde de 8 e 5,5 milimetri de diametro l’è riussì a rivàr a la “Sala Nera” e tornàr indrio in sole 20 ore.
Ne l’inverno 2003 i è riprese le esplorassioni e gh’è sta’ fata n’altra scoperta; le vie “Antika” e del ”Baratro”. Ma come emo più sóra dito; la Spluga de la Preta la riserva de sicuro altre sorprese.
El mistero l’è ancora… in volta!

Personalmente, sofrendo de ‘na forma de claustrofobia tale che se de note me va el ninsól su la facia me meto sigàr “aiuto”, g’ò sempre avudo par ‘sti “alpinisti a roèrso” ‘na grande amirassión e ò seguì, fin che ò podudo, l’atività dei “Falchi” de Verona, tanto più che i conossevo e de Cargnel-fotografo ero anca cliente. L’ultima volta che son stà’ a la Spluga, nel 2000, l’è stà’ anca l’ultima volta che ò podù caminàr par i me monti. Ero in compagnia de don Alberto Benedetti, el notisssimo prete-archeologo de Ceredo, da poco scomparso. Con lu, nela ceseta quela matina inondada de sol, ò pregà par la pora Marisa e par tuti quei che, inamorà dei abissi, i seitarà a ris-ciàrghe sóra la vita.

Wanda Girardi Castellani