L’Angolo de la Wanda – Febbraio bis 2007 –”Carlo Goldoni: Treçento ani da la nàssita”.
…a cura di Graziano M. Cobelli
gcobelli05@gmail.com
Quatro Ciàcoe: da Verona
Carlo Goldoni: Treçento ani da la nàssita.
Premeto che personalmente le storie de “Arlechin batòcio; orbo da un pié e sopo da’n ocio, nonché de’l Todero brontolón e consimili, no’ le m’à mai entusiasmà, da quela pirandeliana acanita e convinta che són… e gh’è da dir che le compagnie amatoriali veronesi le usa mètar in sèna quasi esclusivamente Goldoni cusì a teatro ghe són sempre andà pocheto.
Paraltro, sicome mi no’ fasso testo, parlàr de ‘n autór italiàn e prima ancora veneto puro sangue che’l riesse ancora a inpenìr i teatri dopo tresento ani de onorado servissio, l’è doveroso e giusto!
Lassemo da parte l’amigo Dino Durante che al cognome del nostro comediografo el faseva seguìr un “con licensa parlando” par via del fato che’l ghe riciamava automaticamente a la memoria “hatù e “olla”,… par spassar via ‘na olta par tute ‘stó equivoco sarà meio che ve diga come che l’è nato. ‘Péna finì la guera, quando che i ‘mericani i è andà anca lori finalmente fóra da le scatole, de “scatole” piene e ude i se n’à lassà drio a çentenara. Tra le altre “caturade” dai buteleti de via santa Marta (streta tra 4 caserme) dove che stavo de casa, i ghe n’à verto un bàito de ‘n çerto tipo… fasendo co’i afari che gh’èra drento dei “gran pavese” da varo de transatlantici, picandoli via ai fili de la lissia dopo ‘vérli sgonfà a forsa de supioni. Sóra ‘ste scatole apariva a letare dorade : “GOLD-ONE”” che vol dir “oro uno” ma par quei come mi che l’unica lengua straniera che i parla l’è l’italiàn… el nome el restava “goldone” che al plurale el deventava po’ Goldoni; par la sfortuna, in secula-seculorum, de quel pòro Cristo de Carlo che zà in vita no’l ghe n’avea ‘vuda tanta e l’è po’ anca morto ne la miseria più nera.
Nato a Venessia el 25 de febràr del 1707, fiol de’n ”cerusico” de origini modenesi, nel 1719 l’à tacà i studi de retorica e gramatica nel coleio dei gesuiti de Perugia par pó’ nel 1723 trasferirse al Coleio Ghislieri de Pavia par studiàr giurisprudensa. Da li, però, dú ani dopo i l’à sbatù fóra par via de’n scandalo provocà da ‘na só satira su le done de la çità…
Riciamà a Venessia da só papà el s’à inpiegado, prima a la Canceleria de Ciosa e pò’ a quela de Feltre. Nel 1731, morto el papà, l’è riussì finalmente a laurearse a Padova ma più che par la cariera forense el só intaresse el se indirissava a quela del palcosènico e nel 1734 l’à scominçià cusì a colaboràr co’ la compagnia venessiana de san Samuele zontàndoghe tri ani dopo la diressión del teatro san Giovanni Grisostomo.
Evidentemente co’ i spini nel dadrio, dopo 4 ani l’à alsà da nóvo i tachi spostandose in quel de Genova co’ l’incarico de Console de la Republica de Genova a Venessia.
In seguito, cargo de “ciodi” più de nostro Signor su la croçe, l’à fato ancora fete stabilindose a Pisa andó l’à ripreso a far l’avocato.
Nel 1753, ritornà a Venessia e a la só vecia passión, dopo 5 ani de laoro in qualità de autór stabile del teatro Sant’Angelo l‘è passà al San luca e da li qualche ano dopo l’à ciapà el volo par Parigi co’ l’inportante incarico de diretór de la “Comèdie italienne”; l’ultimo inportante trasferimento parché, anca se ne la “Ville lumière” li no’l g’à ‘vudo ‘sto gran sucesso, el gh’è restà fin a la morte.
I generi dominanti del giovane Carlo i è stà’ ligadi a le forme espressive de la comedia de l’arte e del melodrama; infati, la só prima opera “Amalasunta” (1733) l’èra in musica… Pàr che Goldoni stesso el l’abia brusà.
Co’ la tragicomedia “Belisario” l’à inveçe inaugurà la colaborassión co’ la compagnia Imer al san Samuele par el quàl teatro, in esclusiva, Goldoni l’à seità a scrìvar un fià de tuto.
Solo dopo ‘sta esperiensa l’à catà la via de la comedia de l’arte creando el só primo personagio par “El mondo cortesàn” (1738) rimanegià nel 1755 col titolo “L’uomo di mondo”.
Có la comedia “Na dona de garbo” l’à menà in porto l’operassión de liberàr le “mascare” da le solite parti fisse.
Al tempo del sogiorno in Toscana la produssión goldoniana l’a fato stàl fin che no’ l’à incontrà quel Antonio Sacchi, tòco de “cao-de-roba” ma che el g’à ‘vu el merito de sugerirghe la conposissión de quel che’l saria deventà el só capolaoro: “El servidór de du paroni” (1745/1753).
Tornà a Venessia Goldoni colaborando con Girolamo Medebach nel teatro Sant’Angelo l’à invià el tentativo de rinovàr le forme espressive del teatro setecentesco metendo in sèna la realtà de tuti i giorni con el comune comportamento de la gente pur rispetando precise regole de rapresentassión. ‘Sto esperimento l’à partorì le “sedese comedie nove” (1750-51). Tra le più famose, in italiàn e in dialeto : “Le femmine puntigliose”, “La bottega del caffè”, “Il bugiardo”, “I pettegolezzi delle donne”. L’è stado con un altro celebre capolaoro: “La locandiera”, che nel 1753 Goldoni l’à serà la colaborassión co’l Sant’Angelo ma era ormai nata la nóva comedia goldoniana, fata de carateri autonomi, libari da la fissità de le mascare.
So’ “aque da pesca” el popolo de le “cale” e dei “canpièi”; el “só” popolo, quel de le meio comedie dialetali: “Le massere”, “Le done de casa soa e el campielo”.
Dopo ‘n fià de tenpo a Roma, Goldoni l’è tornà ancora ‘na olta a la só Venessia ando, dal 1760 al 1762 l’à scrito i “capolaori venessiani”: “I rusteghi”, “La casa nova”, ” Sior Todero brontolon”, “Le barufe chiozzotte”.
Ciamà a dirìger n’altra olta “La comèdie italienne” a Parigi, l’à saludà par senpre la çità lagunare; l’era el 1762.
A Parigi el gh’è stà trent’ani ma distante dal só vero mondo l’à segnà el passo scrivendo più che altro senari. La sola comedia degna d’èssar nominà, de quel periodo, l’è: “Il ventaglio”.
L’ultimo fior de la só arte l’è stado: “El burbero benefico” scrita in francese e rapresentà nel 1771 in Francia come i “Memoires”; l’ato prima de la morte avegnù, come più sóra ò dito, ne la miseria più nera, dopo che l’assemblea legislativa la g’avéa tòlto, qualche mese prima, pure la scarma pensión che g’aveva assegnà la Corte.
Wanda Girardi Castellani
