L’Angolo de la Wanda – Ottobre bis 2006 – “El premio “Lorenzo Calabrese” 2006 a Vittorio Ingegneri
…a cura di Graziano M. Cobelli
gcobelli05@gmail.com
Quatro Ciàcoe: da Verona
El premio “Lorenzo Calabrese” 2006a Vittorio Ingegneri
L’ormai ben conossudo, prestigioso riconossimento, invià nel 1989 da la prof. Alda Coatto Calabrese in memoria del marì, prof. Lorenzo Calabrese, assessor a la cultura par la provincia de Verona, l’è stà assegnado par el 2006, da la giuria del 29° Premio trivèneto de poesìa “La Madonina” de Pescantina, in sen al qual anualmente el vien dado a ‘na personalità de spico nel panorama de la cultura de la nostra region, al Presidente de Quatro Ciàcoe, rag. Vittorio Ingegneri. La motivassion l’è stà leta dal Presidente de la Comission del Premio, prof. Michele Gragnato: “AI Presidente del mensile de cultura vèneta, Quatro Ciàcoe, Vittorio Ingegneri. La bela rivista nata nel 1983, oltre a l’instancabile impegno de tegner vive la nostra parlada e le tradissioni, I’à portado e la porta in tuto el mondo, ‘na ventada de cultura vèneta che mantien e rinforsa ne i emigradi el senso de apartenensa a la tera de origine. EI premio ‘Lorenzo Calabrese’ el voI segnalar ‘sta importante realtà.”
Ma, rivista a parte, el nostro Presidente, anca par conto suo, l’è ben meritevole del Premio! Dal 1982 al 2001 l’à dado a le stampe diese raccolte de poesìa e prosa. Diverse so lìriche i è po’ inseride in più volumi antològici. Come giornalista-pubblicista, inoltre, I’à colaborado a importanti giornài e riviste, dirigendo, pure, par 15 ani el periodico comunal de informassion, èdito dal Comune de Noventa Padovana. Dal 1983, cioè fin da la so fondassion, l’è Presidente de l’Editoriale Padova Scarl , editrice del nostro amado Quatro Ciàcoe, incàrico che ga valso la nòmina de “Padovano Eccellente”, riconossimento otegnù dal Sindaco de Padova nel 1995 par avercontribuido a valorisar la cità de Padova e del so teritorio tra le comunità vènete che vive a I’èstero. Nel dicembre del 2005, inoltre, l’è stà insignido de medaja d’oro dal Presidente de la Càmara de Comercio de Padova: “Per aver onorato I’ltalia nel mondo”. In finis… come poeta el ga ‘vudo diversi riconossimenti regionali e nassionali, anca recenti. Farghe a Vittorio, in ‘sta ocasion, un, sia pur ristreto ritratin, m’à parso doveroso… anca se (almanco par quei che come mi lo conosse da oltre vint’ani) forse non necessario.
Quanto a la crònaca de I’avenimento, la bela ceseta de la Madonina, sede de la cerimonia de premiassion, l’era, malgrado el tempo de vento e aqua, piena fin fora da la porta. EI premio “Calabrese” l’è stà consegnà, come i altri ani, a metà “prèdica”, tra el premio de poesìa de i poeti trivèneti e quel de i buteleti de le elementari e medie. EI Premio de Pescantina l’è I’ùnico, almanco ne la nostra provincia (e forse anche nel Vèneto) che da 29 ani porta avanti ‘na session, la “B”, rivolta ai buteleti de la 4a e 5a elementare e medie. L’è con orgolio che podemo dir che da ‘sta session (grassie a tante brave maestre, sempre fissa de concorenti) za s’à destacado qualche poetin, passando a la session “A”, de i adulti. Questo voi dir che la semensa I’à scominçià a dar fruti! Tegno inoltre a far notar che i premi, sia par i adulti che par i buteleti, qua i è sempre oferti sensa economia… bei e de bon gusto tuti, fin a I’ùltima de le segnalassioni a difarensa de çerti altri concorsi dove, salvo i primi du-tri premiadi… tuti i altri i va via co’ le man piene de vento e, diograssia almanco se ai segnaladi (che de solito ne la votassion i se distansia de poco da i primi premi) i ghe fa dir la so poesìa. Ogni ano vien racolte in un volume, arichido da bei disegni, tute le poesìe premiade e segnalade.
Un’altra bela abitùdine de ‘sto premio: a la fine, nel sagrà, vièn parecià un rinfresco che ‘l par stà organisà da Trimalcione, in quanto ghè de tuto e par tuti. Sia par i splèndidi premi che par l’elegante, abondante rinfresco, ghè da ringrassiar principalmente I’instancàbile, generosa “deus ex machina”… la prof. Alda Coatto Calabrese.
Wanda Girardi Castellani
