L’Angolo de la Wanda – Ottobre 2006 – “Doone… è rivà el paaaaaroloto!!! …che el giusta un buso e ‘l de fa oto!!!”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Doone… è rivà el paaaaaroloto !!! …che el giusta un buso e ‘l de fa oto!!!

“Un stagnà, ‘na padela, un calçirel co’ la só cassa,
un minestro, ‘na scaldina, ‘na cógoma, un stanpo,
un brasér… i èra i ”rami”, l’antiàn picà via de fronte
al camìn, sempre lustri come oro a forsa de polenta,
asé e oio de gombio;
orgolio de la casa, censo de la fameia”.

I “rami” un tempo i era veramente roba de la qual andàr fieri… ‘na dota de lusso!
Par i poareti, ma propio poareti, inveçe, gh’èra el fero, il fero smaltà, e el zingo. La plastica l’èra ancora de-là-da-vègnar.
Gh’è da dir che çerti arnesi i era però fati tuti del stesso materiàl, come le gratacasole che i era de fero e le mastele che i era o de legno o de zingo… de ‘sto ultimo materiàl i era pura generalmente i comuni seci mentre inveçe i calçirei par l’aqua potabile che dindolava picà-via a la stafa sóra el seciàr, tuti coredà de la só “cassa” (un minestro fato come un bicér col mànego da banda) i era de rame. Quanto al fero smaltà, generalmente i d’èra fati i cosideti bocài o vasi da note plebei, parchè nele case medio-alte te gh’i catavi de ceramica o adiritura de porcelana decoradi con angeli, cherubini, ninfe e girlande de fiori. Me ricordo, a ‘stó proposito, che ‘na olta ò mandà me sio Gino (quel de l’articolo su Q.C.-otobre 2000) intensionà a regalarghe a la moiér par el compleano un pàr de ‘sti nobili bocài, a dirghe a la comessa de UPIN de ‘star ‘tenta de darghe i màneghi giusti ; uno a la destra e uno a la sinistra… che no’ i se córesse drio! Naturalmente ‘sta racomandassión l’à fato sbondolàr dal rìdar tuto el personàl del magasìn.
Ma parlemo del stagnà. L’indispensabile atresso par far la polenta, l’èra inveçe sempre de rame ma con l’interno rivestì de stagno (eco parché se ghe ciamava ”stagnà”) parché no’ se formasse a contato co’ la roba da magnàr el velenosissimo ossido de rame. In tute le case dei me tempi pingolava dal camin ‘na cadena e su quela se ghe picava el stagnà o ‘l paról (simile al stagnà ma più greso, adato par far bóiar l’aqua de la lissia). Se ghe penso revedo me mama che, con un zenocio impontelà su la piera, la menava l’oro fumante co’ la méscola inpugnà nela destra, nel mentre co’ la sinistra la se tirava ‘rènte el vecio arnese de fameia, brincandolo dal mànego co’ ‘na ciapeta fata a crossè.
A netàr po’ la cadena del camin ghe pensàimo noialtri buteleti portandola in strada ‘andó la strapegàimo con gran divertimento, avanti e indrio su la giara par cavarghe l’onto e el calùsene. Se la memoria no’ la taca a tradirme, ‘sta funsión se usava farla ne la setimana santa e par mancia i ne dava qualche ovo che, sicome alora no’ esistea la “Viaria”, se lo bevéimo sedutastante (ma anca in pié) de gusto dopo averlo sbusà co’ ‘n ucìn e condì co’ ‘na gossa de limón.
Ma, tornando al rame; el catava impiego anca ne la costrussión dei grandi parói fati par contègnar le grandi lissie, par quei andó se ghe netava, dopo la “matansa”, el porsèl da le sèdole e quei par inpastàrghe drento el formàio, ne le malghe.
I paroloti, overo i “calderai” pro-pro-pro-neodini de Vulcano, i era dei brai artigiani, boni de modelàr el rame solo a colpi de martèl. I parói i era fati de’n corpo unico, sensa ‘na saldadura, partendo da ‘n lingoto che, desfà su la fiama, l’èra po’ udà in un stanpo de materiàl refratario da dove, tirà fora co’ le pinse, el vegnéa batù su l’ancùsene fin a ridur le pareti sotili al punto giusto. El fondo però el g’avèa da èssar più spesso. ‘Na olta che i g’avea dà la forma giusta i ghe sistemava sul bordo un çércolo de fero e da le parte le dó “reciare” col buso andó far passàr i màneghi. In fine se rebatéa a fredo el tuto par darghe la cosideta tenpra.
Par ‘sta inportante operassión el paroloto el g’avéa ‘na fila de arnesi: martei driti e storti, longhi e curti, tenaie, morseti, çesore, massete de legno o de fero ecc.
Gh’èra boteghe andó i faséa riparassioni ma anca i vendea, tanto ogeti semplici quanto capolaori… vere opare d’arte laorade a sbalso.
Gh’èra po’ i paroloti che andava de paese in paese, de contrà in contrà e che i faseva solo riparassioni. ‘Sti qua generalmente i laorava in copia; uno el batea su l’ancusene e l’altro el manovrava el mantese. I tacava tassei fissandoli con dele borchie batù e rebatù e de solito i era fature destinade a duràr ani e anori. A farghe concorensa gh’èra i séngali che con manco spesa i ghe rifaséa al paról el fondo novo, tacà cusì ben che gnanca se distinguea la congiunsión tra el toco vecio e quel novo. Solo che podéa capitàr… come gh’è capità a me mama, che a mesa cotura, franasse sul fogo del camìn cul del stagnà… polenta e tuto !
A ‘sto punto l’èra inutile andàr a çercàr el séngalo-paroloto parché quel, con tuta la só caravana, l’èra ormai andà par el vasto mondo lassandote la busarada.
A Verona l’arte dei calderai o paroloti la g’à ’vù granda rinomansa nel medioevo. La fasea parte de la “Corporassión del misterium calderariorum de civitate et burgo Verone” ma dopo el XV sec., andà in decadensa, l’è stà’ incorporada in quela dei ferari, maniscalchi ecc… condividendo con ‘sti qua anca el santo protetór, San Alò (o san Eligio) festegià el 25 de giugno in santa Maria de la Scala.
Nel seteçento è stà’ rifati i Statuti de l’Arte e par èssar amessi a la categoria se dovéa passàr n’ esame che’l consisteva nel far davanti a ‘na comissión de esperti ‘na bacinela “a pansa” co’ la só secia “a pansa” del peso de libre oto, opur ‘na pignata a pugno de libre oto, el tuto, naturalmente, de rame.
Dèsso me vien in mente che da buteleto a me fiol Mirko, come regàl par la festa de la mama, i g’avéa fato far a scóla ‘na candela sbalsà su un foiéto de rame. Ci-sa che rumando par casa no’ finissa col catàr anca quela!
Par intanto… scavando ne l’abissàl miniera dei me ricordi stamatina è saltà fora… portà nel vento mato che sbatacia i scuri… alsa le tende al pàr de rande sul mar e sperucia le rondini comodàde sui fili de la luce come tante note su ‘n pentagrama… ‘na voçe distante: “ doone… è rivà el paaaaroloto !!!”
a la qual mama Ada rispondéa de remando:
“…che’l giusta un buso e ‘l de fa oto!”

Wanda Girardi Castellani