L’Angolo de la Wanda – Settembre bis 2006 – “A CACIA DE METEORE SUL MONTE BALDO”
…a cura di Graziano M. Cobelli
gcobelli05@gmail.com
Quatro Ciàcoe: da Verona
A CACIA DE METEORE SUL MONTE BALDO
“Io lo so perché tanto di stelle nell’aria tranquilla arde e cade… perché si gran pianto nel concavo cielo sfavilla…”
Cusì el scrivéa el Pascoli ne la bela poesia “10 agosto”, ma più de lu ghe ne savèa el grande astronomo dei “canali de Marte”; Giovanni Virginio Schiaparelli che poco dopo la metà del XlX secolo za l’aveva capì l’origine de le meteore. Infati, primo fra tuti el s’èra reso conto che ‘sti ogeti i mostrava un moto intorno al sol simile a quel de le comete e calcolando alora l’orbita de le cosidete “stele cadenti” de l’11 agosto l’avea stabilido che ‘ste qua le corispondeva a la cometa Swift-Tuttle passà ne l’ano 1862, cusì el nostro astronomo l’è rivà a la conclusión che el materiàl rilassà ne le coe de le comete el formava de le nuvole o dei anei simili a quei de Saturno ma tanto assè più rarefati… non “stele cadenti” ma ‘na qual pólvar semenà da le comete; “sgaùie” spassiali a la deriva che nel só eterno pelegrinàr intorno al sol, la tera ogni tanto la incontra come un auto in corsa che se infila in un nùgolo de moschini. In ‘sti incontri la “pólvar de cometa” la penetra ne l’atmosfera a diesine de chilometri al secondo brusando in pochi atimi e lassandose drio ‘na scia, lónga chilometri, de gas caldissimo e luminoso. Le meteore alora pàr che le se iradia da ‘na zona particolar del cel ciamada, apunto, “radiante” che de solito la ciapa el nome de la costelassión da la qual la provién: ”Leonidi” (Leone), ”Geminidi” (Gemelli), “Draconidi” (Drago).
De radianti ghe ne tante e i ghe ne scopre sempre de nove. I è ative par periodi che pol andàr da qualche giorno a un mese, con scadense anuali.
Nei miliardi de ani passà moltissimi sciami de vece comete i s’à consumadi o i s’à diradà nei spassi tanto da creàr ‘na spece de rumór de fondo fato de meteore dete “sporadiche” che le pól vègnar da ogni diressión co’ ‘na scadensa de 5 o 10 meteore a l’ora. Anca se l’è possibile osservarghene a ogni ora de la note, ‘ste qua i è più vissine dopo la mesanote, dato che, par la rotassión terestre, osservando verso Est se guarda ne la diressión de rivolussión de la tera intorno al sol; diressión da la qual le meteore le riva con aparente magior velocità (vedi esempio de l’auto in corsa).
El più famoso dei sciami meteoritici l’è quel de le Perseidi, le cosidete “lagrime de san Lorenso” che le provién da la costelassión del Perseo e che i è al só massimo ne la note fra el 12 e el 13 de agosto.
CACIATORI DE METEORE SUL MONTE BALDO
‘Desso par osservàr e studiàr ‘sti maraveiosi fenomeni celesti se pol andàr al bel osservatorio astronomico del monte Baldo “Angelo Gelodi” (località Novezzina de Ferrara de Monte Baldo); importante, modernissimo impianto curà da me fiol Flavio, dove, apunto, una de le funsioni previste l’è propio quela del continuo monitoragio de le meteore, grassie a un programa ciamà “MetRec” che l’è bon de esaminàr l’imagine fornì da un sistema video e riconossar automaticamente i eventi meteorici distinguendoli da i altri ogeti in moimento (aerei o sateliti). Note dopo note ‘na telecamera la sorveia ‘na zona drio l’altra de cel registrando su un computer el film de ogni meteora insieme ai dati fisici de l’evento.
Da novembre 2005, quando è partì el sistema, a ‘dèsso, la ghe n’à caturà ben 1600!
Tuta ‘sta carga de dati la vièn messa pò’ a disposissión de la comunità sientifica tramite l’invio dei dati a l’International Meteor Organization.
Ma prima de rivàr a ocuparse del monitoragio de le comete, grassie al recente osservatorio del monte Baldo entrà a far parte dell’IMO VIDEO NETWORK a fianco dei più importanti osservatori amatoriali e professionali riconossudi…
In ‘sta me fameia de apassionadi astrofili, praticamente tuti i ani nei giorni dal 10 al 13 de agosto se andava, col scuro, su par i nostri monti, armadi de binocoli e telescopi portatili… nonchè de coerte (bibite, panetini e altri viveri de conforto) a l’apuntamento co’ le “stele cadenti”. I posti meio i era i pascoli alti ‘ndo de giorno inperava le vache… cusì qualche olta semo messi a pansa in su sora i plaid destesi non precisamente su le margarite. Me ricordo po’ che ‘na olta, inveçe, dopo aver ricaricà la roba su la machina gh’emo ‘vù la sorpresa de dovér viaiàr co’ la poco simpatica compagnia de un esercito de ragni, ma tanti che par liberarsene gh’emo messo pò’ ‘na setimana. Comunque, picoli incidenti a parte, emo godù spetacoli memorabili; Dentro el schermo più panoramico che se possa imaginàr, sul sfondo de’ n oceano de stele cusì “vive” che paréa poderle spicàr co’ le man come tanti graspi de ua da le tirele, piovéa, intreciandose in te ‘n magico cotillon, da tute le diressioni, a çentenara le “lagrime de san Lorenso” e noialtri, persi, incantà… fóra dal mondo e dal tenpo se catavimo ogni olta a farse le eterne dimande che a miliardi, prima de noialtri i omeni i s’à fato e a mliardi, dopo de noialtri e fin che durarà ‘sto “atomo opaco del mal” i seitarà a farse… sensa catàr risposta;
“ci semo… da ‘ndo vegnemo… ‘ndove ‘ndemo?”
Wanda Girardi Castellani
