L’Angolo de la Wanda – Maggio 2006 – “COME UN DIAOLETO A MOLA (letera a l’amigo Dino Durante)”

…a cura di Graziano M. Cobelli

gcobelli05@gmail.com

Quatro Ciàcoe: da Verona

COME UN DIAOLETO A MOLA
(letera a l’amigo Dino Durante)

“In ‘na note da pàssio
che no’ paréa ‘vér giorno
da sóto le strafàntole
del calto manco usà
de le memorie
come un diaoleto a móla
con un sguìsso
te m’è saltà nel cór
faséndo n’onda…”

No’ podèr dormir, note drio notte, l’è ‘na tragedia a meno chè non se sia boni de ‘dòparàr le ore robade al sono in qualche piasoso, interessante laoro. Naturalmente va evità tutto quel che pòl disturbàr el meritado riposo dei condòmini, come: lustràr i paimenti con un stranfér del tempo de “Matìo-Cópo” che’l fà el bordèl de ‘n caroarmato… rusenìo (tipo el mio), far andàr la Tivu a tuta bira, andàr su e zó co’i sòcoleti che t’à portà tó fioi come souvenir da l’Olanda o far andàr la lavatrice, co’ la scusa de risparmiàr (viste le ore picole) la corente. Mi, che de noti bianche ghe ne infilo almanco tre su çinque, ultimamente, stufa de fruarme oci e “dedrio” davanti al P.C. me són inventà de métar ordine nel’oceanico casoto del’archivio de letere, documenti e retài de giornài racimolà in quasi sessant’ani de onorado servissio nel mondo de la poesia (ecc…) e no ve digo quel che è saltà fóra; robe amare che m’à tornà a roersàr el sangue ma anca robe bele che no’ è finì, grassie proprio al me vissio de no’ butàr mai via gnente, sul granàr del Papa.
Cusì t’ò catà anca ti, Dino, co’ i tó biglieti spiritosi, i tó inmancabili “autoritrati” co’ i oci da pésse straco, el naso a patata, i mostacioni de pingolón e i tó versi… quei che te ghe mostravi solo ai amiçi  boni e mi, a  quanto te me scrivéi e te me disévi, ero una de quei!
Me ricordo le “brisolade” nel giardìn de la tó vila de Cesuna, ne l’altopiano de Asiago, dove mi, me marì e me fioi èrimo spesso ospiti e me ricordo le passegiade nel bosco, drio casa, ‘ndove tra el bon udór dei pigni e dei fonghi che, sconti in qualche lógo, co’ i gnomi e co’ le fade i ne sghimava, parlàimo par ore de poesia e de tante robe nostre! No, a vardàr ben no’ me són mai desmentegà de ti anca se ghe voléa le tó letere par rinfrescarme completamente la memoria su la nostra cara amicissia… vera, anca se spolvarà un fiantìn de romanticismo.
In fameia emo remenà par ani, con amiçi e conossenti, el raconto dei schersi che te ghe combinavi ai pòri Cristi che te ciapavi de mira; quelo dela rènga tacà co’l ceròto, in pieno lùio, soto la carega de guida de la machina nova-noventa de’n tó amigo. Dopo ‘na setimana, convinto de ‘vèrghe l’auto strià, el s’avèa ormai deciso de mandarla a rotamàr, quando, inpietosìdo, t’è descuerto “l’altarìn”!
“E quela òlta che, stufo dei “mostrici” (buteleti) che, propio nela casa de Cesuna, i sèitava a rònparte le suste, zugando el balòn e faséndo, a tute le ore, casìn… t’è pensà de crompàr un scartosseto de sasseti de ciocolata, de andarli a comodàr ‘rènte a la mòta de giara ‘péna drento el cancèl par po’, fasendo finta de gnente, mètarse a magnarli de gusto, come se gnende fusse. Naturalmente, sconto drio la macia, te t’è godù “un pasto” a védarli, ‘péna che t’avei voltà el c… a scassarse i denti çercando de rosegàr i sassi. N’altra òlta t’è impiturà un sasso tondo come un balón da “fùbal”; beh, figuremosse  quando che i l’à pessatà!
De schersi memorabili te ghe n’è fato tanti altri e uno più geniàl de l’altro; quelo de l’auto che andava a… aqua, par esempio. Però no’ me vièn in mente ben come che t’è fato a dirotàr el tubo de la bensina, sò che te gh’è fato végnar un mèso acidente a quel del distributór quando, tuto serio, te gh’è dimandà de farte el pièn de… aqua par po’… inviado el motór soto i oci spalancà come du feràì da timonèla del pòro bensinàr, partir fis-ciando  par el vasto mondo!
Ma el tó capolaóro, a parte la vintina e più de libri, ùn più spassoso de l’altro, i celebri calendari del “Stròlogo”, i dissionari etimologici del dialeto veneto e via discorèndo, l’è stà’ la costitussión de la “Republica de Valpiansio”, ‘na Republica “etilica”, severamente vietà ai astemi e costituì (usando le tó parole) “da n’associassión de bagolóni par i quali tute le ocasioni i è bone par divertirse e desmentegàr el cesso che gh’émo intorno” Quanto a la tó elessión a Presidente, uso ancora le tó parole: “Me són riunìo in assemblea ordinaria e democraticamente g’ò votà a l’unanimità me medesimo”.
Ne l’intervista che i t’à fato t’è specificà quali altri scopi se prefige la “Republica”. “volerse ben, far amicissie nove, darse ‘na man al de sora e al de fora del censo, ceto sociàl e altre bale”. Costitussión aprovà el 19 setembre a Cesuna (me par nel 76) ne la sala de l’hotel Jok, dal Ministro Baffo Vitulo. Quel giorno, dichiarà “festività nassionàl religioso-etilica”, l’è stà festegiado dai Soci, riunì quei de l’Emilia Romagna con quei del Veneto, con tanta intensità che a la sera i èra tuti imbriaghi spolpi! Gh’è da dìr però, che, a metà del pranso, gh’è stada ‘na rivolta armada da parte del 1° Console che con’ le trupe mercenarie crompà con dù litri de graspa i à rapì el Presidente tra la generàl indifarensa de tuti, impegnà a mastegàr e a béar.  Fortuna che se g’à messo un s-ciapo de fedelissimi (veramente se tratava de ”l’invitto esercito in assetto de guera” costituì da un çerto Buba Coa, pagà con un fiasco de vin a l’ano) che al comando del Ministro Gerardo Sanpietro i t’à liberà inpresonando el vìl tradidór ai “piombini”.
In una de le tó alegre missive (regolarmente sensa data) te me conti, apunto, ‘stó avenimento e te me informi che te gh’è dichiarà subito guera a tuti i stati. Unico rispetà, ansi, al qual ghe stà oferto l’aleansa, l’è stàdo “Amin”, mato ‘bastansa par ritegnerlo degno de tanto onór soratuto in quanto el g’à ‘vudo el merito de aver roto la monotonia dei raporti internassionali!
La “Republica” De Valpianzio (Galzignano de Padoa), el cui unico scopo l’è quelo de andàr a far “asagi” (abondanti) dei vari “scabi”… o vini, prodoti in òlta, sia ‘rènte che distante, l’à batù moneda co’ la scrita “un scheo de… mona” (più “moneda” de cusì!!) e l’à eternado, pure, in ‘na celebre foto el Presidente; naturalmente Dino Durante, “giornalista, ex spermatozoo”, con in testa un elmeto, residuado de l’ultima guera, in man la siàbola de banda e su le spale el glorioso siàl de la nona drapegià a la messicana, in sela al Primo Console e fido destriero, Nane Bragheto co’ la sata, secondo la regola dei monumenti equestri, postà su ‘na bala.
Gh’è da zontarghe che, sicome a un vero Presidente de sòlito se ghe fa dei atentati, la costitussion al “5° par. la comanda che ogni ano el 1° console el dovarà ciapàr a rasoiade (con un rasoio eletrico) el Presidente sigando  “a morte el tirano!”.
Ma che bel nùmaro che te èri!!
Quando che ò savù che te avevi passà ‘n operassión pitosto grave, co’ ‘na frase che se usa dir da le me parti, in ‘ste ocasioni, t’ò racomandà: “adesso fa pulito!” e ti te m’è riposto: ”ma mi me són sempre lavà… prima!”.
L’ultima òlta che te m’è scrito (sempre sensa data) l’è stà però, dal timbro de le poste, nel 2002, poco prima che te ne lassassi, al 22 de magio, nel colmo de le rose, par andàr a combinarghene qualcheduna de le tue anca a san Piero; “Són stado in ponta de morte ma pàr che ghe l’abia fata anca ‘sta òlta! Me sento scassà nel fisico ma g’ò el spirito sempre alto! O’ sorvolà Verona quindese giorni fa e t’ò pensada. Me són ricordà un bosco stupendo… le tó poesie bele come el primo supión de la primavera…” E mi me ricordo ‘desso, tuto d’un colpo, ciare, le tue, caro amigo, par tanti bón solo de contàr barselete ma, come che l’à scrito ne l’editoriàl de giugno (ano xx) el nostro Mario Klein, par ci à savù lésar drio quel soriso sornión, quela batuda pronta, “un poeta da l’animo umanissimo, sensibile e Malinconicamente dolçe”  …quel che à scrito:  ”Vorìa…
Vorìa che tornasse ancora primavera
che finisse ‘stó inverno
che me rùmega drento
par butarme
e restàr cussì, su l’erba
a respiràr la tera,
a sentìr i fiori che bala…
e’l vento che me caressa
Restàr cussì… a brassi larghi
a bévare ‘sta aria
a bevare ‘stó sole…
Cussì… co’i oci serà
come ‘na lusèrtola
indormensà su ‘na mura
sfogonà dal sole.”

Wanda Girardi Castellani

Par i “ultimi” che no’ l’à conossudo.

Ci èrelo… DINO DURANTE ?

Nato a Padova nel 1923. Ne la só longa cariera, senpre costelà de sucessi, l’à publicado varie opere sia in italiàn che in lengua veneta. Giornalista dal ’51, l’à colaborado con Guareschi, Mosca, Montanelli e tanti altri giornalisti e scritori. Dopo el primo, sucesso nassionàl con “Un maestro ride”, el s’à inposto a l’atensión del publico e de la critica come el meio umorista de la cultura veneta, andove che, con un patrimonio di ben 100 opere de vario genere, l’è considerato, efetivamente, l’autór più amado e afermà. L’à alternato publicassioni umoristiche a altre, senpre ligade a la nostra cultura, usi e costumi, passà e presente,  dissionari, libri de gastronomia, enologia e altro. L’à fondato “El strologo” che par 39 ani l’è stà’ l’almanaco veneto par ecelensa, deventando ‘na vera e propia istitussión. Anca se non destinade al grande publico, Dino l’à scrito tante valide poesie, sia in italiàn che in veneto, rivelando ‘na sensibilità non comune spesso mascarà ne la só produssión umoristica. L’à fato anca qualche incursión nel mondo del teatro e de la musica.
Scomparso el 22 de magio delassado in tuti quei che  lo à conossudo e stimà un posto udo nel, dificilmente colmado soratuto par le só grandi doti de sensibilità e onestà.

LE OPERE  PIU’ INPORTANTI
Tra quele in italiàn:

Un maestro ride
Tre pazzi e un cane fesso
Pallini nei rognoni
Incontro (poesie)
Poesie
Una lunga primavera (poesie)
Un brevissimo aprile (poesie)
S.Valentino (poesie)
El goto
El bicerìn
El pirón

In veneto
Serie storica:

Catilina daghe un taio
Messalina sul paión
Va a remengo Lucressia
Napoleón, corni e gloria
Adolfo… tàchete al penelo
La Bibbia, secondo Nane Speronelo

Serie libera:

El libro de le monade
El libro de le monade 2.
El fesso in confessionàl
El manuàl del màsaro
Robe turche
Rosina, femina bicilindrica
Quatro sganassade con Dino Durante
El prof. Luigi Bacello
A Lucrè’… te pòssino…
Vinti ani de barselete
El stròlogo (39 edissioni)
Dissionario etimologico del Veneto (andó ghe són anca mi)
L’arte de parlàr onto
Gigeto el mona
Dove si ataca la signora Luigia?