L’Angolo de la Wanda – Marzo 2006 – “A CI NASSE SCAROGNA’…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

A CI NASSE SCAROGNA’ …

L’èra el proverbio preferì da me suocera Clara che, çerto co’ i só boni motivi, la ne lo ricordava almanco un par de volte al giorno:
“A ci nasse scarognà ghe pióve sul c… anca stando sentà”; el massimo! E gh’è da dir che l’è propio ‘na verità sacrosanta anca se la fortuna e la sfortuna, generalmente, le g’à le só varie sfacetadure cusiché uno el pól ‘vérghe ‘na gran fortuna in amor e ‘na scarogna nefanda par via de schei o de salute nel mentre che ‘n altro el pól èssar tuto al contrario: pièn de magagne come el cavàl de Gonèla e pitoco in cana, ma basà e strabasà da Cupido.
Che la dea bendada, pò’, la sia stranba e capriçiosa, a noialtri veronesi ne lo conferma  la scrita che gira intorno al bel rosón del Brioloto che campegia su la fassada de la basilica de san Zen:
“O tu, fortuna, governi sola i mortali, elevi, deponi, doni a tutti i beni o i mali. Vesti chi è nudo, spogli chi è vestito, chiunque in te confidi andrà tradito” e a condìr el tuto, gh’è de le figurine scolpide: in alto, un ometo sul trono che pò’ el taca a far caoleva fin a andàr co’le gambe pararia. Da li  pian a pian el se rindrissa e el torna sul trono e l’è el primo carton animado de la storia! Provè a inpiantàr un ucìn nel centro de ‘na foto del deto rosón e farlo pirlàr!!  Comunque, a ci no’ crede ne l’esistensa de la fortuna, son pronta a farghe cambiàr idea. Ciapemo le classiche pesche de beneficensa parochiali, quele andó i fedeli i porta le strafàntole de la só cantina parché qualchedùn, vinsendole, el possa ‘magasinarle in fondo a la sua. Mi, par esempio, posso crompàr anca 50 bilieti e al massimo me porto a casa: ‘na ciapeta, dú ciaparini da robe, ‘na cartolina, un piato descompagnà e ‘na brìgola de numari dela loteria finàl a la qual pò’, naturalmente, no’ ciapo gnanca l’aqua da lavarme i oci.  Gh’è inveçe ci con la spesa de un par de bilieti el vinse la bicicleta o quele dó-tre robe che g’à un qualche valor. ‘Na òlta son restà a boca vèrta da la sorpresa quando con un numareto ò vinto ‘na bossa de Valpolesela. Subito però ò capì che anca li la scarogna la m’avea parecià un trepo: infati ‘péna fóra son scapussà, la botilia la s’à róto e coi veri me son taià ‘na pùpola e sporcà el vestito bon tanto che pò’ quando ne la scatola de la colomba pasquàl ò catà la cartolina che concoreva a vìnsar ‘n automobile l’ò subito sbregà e infilà in sgauiara parché de sicuro se l’avessi vinta mi me sarìa stramencià la prima òlta che l’avessi messa in strada. L’ano passà, inveçe, a ‘na loteria i à ciamà uno dei me numari; avea ciapà un busto co’ le steche e i mudandoni infin ai zenoci, un articolo de antiquariato che a ocio el vegnéa da qualche cassa desmentegà in càneva dai tempi de le carosse a cavai. Quando che i l’à visto tuti i s’à messo a rìdar e mi, sdegnosamente, l’ò rifiutà rimetendolo in rifa. No’ ghe credarì ma ve giuro che’l numaro che i à cavà subito dopo l’èra ancora uno dei mei e me son catà in man n’altra òlta el busto co’ le steche, residuato de ‘na dota de l’otoçento.
Quando ero impiegatina e andavo a béar el cafè nel bar viçin a l’uficio, spendevo qualche franco su la machineta dai busi; se usava ‘na specie de matita ligà con un spago e selto un numaro se lo sbusava. Mai che ciapasse qualcosa al de là de’n qualche ciocolatìn ma seitavo con ferea determinassión parchè m’èro inamorà de ‘na pua vestida da marinareto che la fasea parte del monte premi. ‘Na matina, visto che la pua la gh’èra ancora e che, fato un fià de conti, avarìa podù con la spesa de ‘na vintina de busi, finalmente ciaparla, ò tacà a sbusàr de bruto. I numari restà i era 24 e mi g’avevo i schei par 22. Naturalmente la pua l’èra proprio in quei dú e ghe son restà de marmelata, tanto che al barista g’ò fato pecà e el me l’à dà istesso.
L’unica òlta che ò vinto al loto (70.000 franchi) quando che son vegnù fora dal tabacàr tuta contenta me son catà sul lunoto ‘na multa che passava i 80.000. Su la strada de Bussolengo dove che tuti i core come i danadi faséndola franca, mi son riussì a ciapàr ‘na multa par ecesso de velocità parché son passà a 65 ‘ndove che gh’èra i 60. La foto che l’autovelox la m’à scatà l’ò messa in cornisa co’ la ricevuda de la multa. Tegnendo presente che la me “127”del 1973, l’ò batesà “Va..lentina” parché passà i 70 ghe bala le portiere, l’è stà come che i g’avesse sbarà a la Croçe Rossa! A vardàr ben anca da buteleta ghe n’èra poche che le me andasse drite. O’ scominçià la “cariera” co’ ‘na matonada in testa! ‘Na siora l’avéa butà da la finestra del terso piàn ‘na borseta maròn che l’èra cascà su ‘n albaro. Mi e me cusina Wilma ne l’intento de butarla zó emo tacà a tirarghe sassi e tochi de quarèl. Tuto de’n colpo ò sigà “ècola!!” e son andà soto par ciaparla, solo che l’era, apunto, un meso quarèl e l’ò becà giusto in fronte. Me ricordo che m’èra vegnù ‘na nata grossa come un pomo con in meso un crepo. Me sia Rina l’à m’à fato inpachi de aqua e asedo par ore! Ci-sa, forsi l’era el bernòcolo de la poesia.
Però el colmo l’ò tocà  quando ò scortado ‘na me amiga al casinò de Venessia. Ela che fin a quel momento l’èra senpre riussì a portàr casa qualcosa, quela òlta l’à g’à rimesso meso milión cusì g’ò ‘vù la prova che la scarogna l’è anca contagiosa.
Beh, ghe sarìa da dir che la “Signora fortuna”, faséndo un strapo a le regole, con mi l’à ris/cià de far “l’en plein” parché no’ l’è che me sia andà ben almanco el resto! L’unico sbrego la l’à fato dàndome un bel caratere de quei che te fa dir che’l bicér l’è mèso pién quando che invesse l’è mèso udo, partanto contentèmosse che la podea anca andàr pèso.

Wanda Girardi Castellani