L’Angolo de la Wanda – Ottobre bis 2004 – “LA GROTA DEL MONTE CAPRIOLO” (A Roverè 1000)

…a cura di Graziano M. Cobelli

gcobelli05@gmail.com

Quatro Ciàcoe: da Verona

“LA GROTA DEL MONTE CAPRIOLO” (A Roverè 1000)

“Una spelonca profonda
fu che spaventosa s’apre, scogliosa;
la difendono il padule nero
e le tenebria delle foreste
su la qual non potevano gli uccelli
stendere il volo imponente…”

(Eneide Vl 305-310)

Cusì Virgilio descrive le grote, un tenpo gnari de mostri, inparentà co’ l’inferno. Par quanto riguarda la nostra provincia, podemo ricordàr el “Bus dela Tonba”, el “Covolo dela strega”, quel de “Canposilvano” (dove è stà’ catà i resti de l’ultimo orso preistorico), la “Grota dela stria”, “l’Abisso dei scheletri”, la “Busa del diaolo” ecc… Ma la più bela e conossuda l’è sens’altro “la Grota de Monte Capriolo”, overo “la Grota de Roverè 1000” o “Grota del sogno”, che la se vèrse a l’interno de una tra le più inportanti unità morfocarsiche del Veneto; i Monti Lessini.
‘Sta grota, svilupà a l’interno dei calcari del Giurassico, l’è stà esplorà par la prima volta nel 1957 dal grupo GES-Falchi è l’è stà verta al publico du ani dopo.
L’è l’unica grota turistica del veronese e atualmente l’è gestida in colaborassión col Comune de Roverè veronese, dala Comissión Speleologica Veronese che de garantisse la possibilità de visita par tuti i weekend estivi e, su prenotassión, tuto l’ano.
La “Grota del sogno” (e mai un nome l’è stà’ più adato) la se snoda nela montagna par circa 240 metri tra cunicoli bassi, streti e a fessura, sale e possi. El fenomeno dal quàl g’à ‘vù origine le grote e le concressioni che la decora l’è fruto de l’assión conbinada de l’aqua ne le só proprietà solventi e mecaniche. Le roce calcaree i è particolarmente sensibili al fenomeno carsico. Stalattiti e stalagmiti le orna i muri, el sofito e ‘l paimento de ‘sta maraveiosa  grota, dele òlte coloradi e altre bianchissimi, i è de’n splendór da rosaria, tanto che te te speti de vèdar spiàr da drio, da’n momento a l’altro, gnomi, fate e foleti. Le forme i è le più  svariade e ogniuno ghe da l’interpretassión a seconda dela só fantasia. Forme coniche anca de grandi dimensioni, opur forme a tenda, sotili e trasparenti, quasi come spagheti, a tapessàr el sofito; depositi calcarei bandonadi da l’aqua durante el lóngo stilicidio.
Durante la visita se riva a loghi spetacolari. La temperatura (10-12 gradi), però, la ciama ‘na bona giacheta de lana!
L’ingresso l’è stretìn e la scaleta che porta ale “sale” pur no’ essendo pericolosa no’ l’è Çerto “comoda”, specie par ci g’à qualche chileto in più, comunque la picola fadiga, ‘na olta zó la vien ben ripagada.
Roverè 1000 l’è facilmente ragiungibile, sia passando da  Montorio che da Cerro. La strada che porta ala grota la parte a l’inissio del paese (seguendo el cartèl de indicassión).
Rivà al parchegio (bastansa grande) se se pèrtegà el sentièr, a scala, dureto ma miga longo, fin a l’ingresso dela grota dove se trova i adeti ala bilieteria e le guide (la visita la g’à da èssar sempre ‘compagnà dai speleologi).
Periodo de visita: dal terso sabato e dominica de giugno al primo sabato e dominica de setembre.
Orari:
sabato, dale 15.00 ale 19.00
dominica dale 10.00 ale 12.00 e dale 15.00 ale 19.00

La visita guidada la dura circa mes’ora.

Par prenotassioni e informassioni: 045 918484 (Bruno Pellegrini) opur 045 8079415 (Roberto Zorzini).

Wanda Girardi Castellani