L’Angolo de la Wanda – Settembre 2004 – “Costumi da BAGNI DE MAR”

…a cura di Graziano M. Cobelli

gcobelli05@gmail.com

 

Quatro Ciàcoe: da Verona

“Costumi da BAGNI DE MAR”

A sguassàr, de sti tenpi, su ‘na qualche spiaja de mar se g’à l’inpressión de catarse, el più de le òlte, in un canpo nudista: tete al vento e ridotissimi tanga che coèrse ‘na s-cianta el davanti ma lassa conpletamente descoerto el de drio tanto da farlo someiàr a un bel pèrsego… (se el de drio l’è belo!). Ma purtropo… sicome tuti, bei e bruti, giovani e veci, grassi e sechi, i g’à dirito al só posto al sol… càpita spesso de védar anca robe che fa da piànzar o te revolta el stòmego. Ma che canbiamenti l’à fato el costume da bagno nel giro de’n par de secoli!
Gh’è da premétar che solo dosento ani fa nissuno s’avaria insognà de bagnarse in mar. Daltronde, nei zughi olimpici istituidi nel 776 prima dela nostra era, da Ite, re de l’Ellade, el nodàr no’l fasea parte dele dissipline sportive, cusì come no’l ghe ne fasea parte nela nova versión dele olimpiadi riprese nel 1896.
Dale corse co’ le bighe, dal pugilato a le corse dei atleti, gh’èra de tuto… de tuto manco el nodàr.
Traverso i secoli el bagno de mar l’è restà ‘na roba riservà a pochi che lo dovea far par necessità come nel medioevo quando el vegnea prescrito solo come cura contro l’idrofobia.
S’è dovù rivar ai primi deceni del 19° secolo parché qualche coragioso el se asardasse a butarse tra le onde.
In principio no’ se nodava. Le persone anemiche intorno al 1820 le se calava solo in aqua, vestide dala testa al pié, co’ l’aiuto dele camariere. Anca i omini par bagnarse i dovea star vestidi! Comunque, soto el regno de Carlo X de Francia (Conte D’Artois – 1757-1836) a Parigi un figurinista la osà inventàr i costumi da bagno par la dona: un vestito conpleto (nero… o comunque scuro), ‘na scufia gomada par protégiar i cavei, scarpe co’ la sola de corda e i cordoni ligadi a rivàr fin ai zenoci. Le spiaje più conossude le à visto entràr nele gabine eleganti signore par pò’ védarle vègnar fora coerte da grandi gabane de fanela. Sotovosse, po’, tra de lore, le parlava scandolesà dele done scandinave che le se butava in aqua sensa gnente indosso. Anca i omeni i g’avea la so moda balneare; le gambe coerte fin soto al zenocio da dele ridicole braghete e la maieta co’le maneghe e el girocol. Par impossibile ma certi i protestava istesso considerando sti indumenti “scandalosi” specie ai oci dei buteleti… che i zugava con paleta e seceto su la sabia, vestì co’ ‘na mudandina longa fin ai piè, cotoline de raso e coletoni ala marinara. Ala fine del XlX secolo in campo de costumi da bagno s’è rivà a tocàr el fondo; a l’abondansa de merleti e ricami, ala pesantessa dele stofe de lana, s’à zontà longhissime calse nere che le scompariva soto l’oridèl dele braghe scondendo anca el più pìcolo toco de pele. A completar tuto ‘stó magasìn, un par de guanti in maia de seda… naturalmente nera.
Secondo Shakespeare, Ofelia l’è stà mantegnuda a gala dai vestiti che, slargandose a velada, i l’avaria sostegnù come ‘na sirena. L’è però più probabile che i paludamenti dele bagnanti fin dopo la prima grande guera, i ghe servisse, più che a mantegnèr el pudor, a farle andàr a fondo come un fero da stiro! Comunque, quando che le vegneva su da l’aqua le presentava un spetacolo pietoso, imbombegà come spugne e co’ le strasse de pingolón!
Intorno al 1920, eco altri costumi manco castigà ma ancora distanti dai odierni come da la tera a la luna. Costumi tuti de’n toco co’n tocheto de manega e de bragheta. Nauralmente anca in spiaje come quele americane se se fusse presentà ‘na bagnante col tanga l’avarìa provocà ‘na scariolada de infarti!
Sempre intorno al 1925-30 la parola d’ordine l’è restà “costume intiero”, tutalpiù ai giovanoti l’èra concesso de portàr la maieta e le mudandine anca separade cusì da poderse cavàr la parte de sora a fine bagno par poder ciapàr meio el sol. In linia de massima però la moda la prescriveva: braghe fin a mesa cossia con cintura bianca in vita e, tuto ‘n toco, petorina co’ le spaline.
Ancò, come emo za dito, in spiaja se ghe ne vede de ogni color e nissuno se scandalisa più. Anca i butèi, oramai bituadi a vèdar de tuto, i scavalca le butèle sensa gnanca inacòrsare che i è quasi nude.
E pensàr che ai tenpi de me nona bastava che ‘na dona la tirasse su un fià la còtola mostrando la caùcia parché par strada saltasse a sbaro… i botoni!

Wanda Girardi Castellani