L’Angolo de la Wanda – Settembre 2003 – “10° Premio “Giuseppe Lugo””

…a cura di Graziano M. Cobelli

gcobelli05@gmail.com

Quatro Ciàcoe: da Verona

10° Premio “Giuseppe Lugo”

La sera del 2 luio 2003, za a le 19 la splèndida Vila Vento, in Custoza, ùltima dimora de Giuseppe Lugo, “el tenor veronese che à cantà el vento e le stele” e da dies’ani sede del premio a lu intestà, l’era stipà, drento e fora, da almanco un meiar de persone par l’inaugurassion de la mostra fotogràfica del decenal alestida nel giardin de ingresso del ristorante. L’interessante e elegante rassegna l’è stà òpara del maestro Luciano Pollini, ideator del premio con el comm. Giuseppe Pezzini (proprietario de Vila Vento e erede spiritual de Lugo) e deus ex machina de tuta la manifestassion.
Ricordemo che tra i grandi de la lìrica che in sti ani à ricevù el riconossimento gh’è stà: Placido Domingo, Josè Carreras, Franco Corelli, Giuseppe Di Stefano, Carlo Bergonzi, Giuseppe Giacomini, Nicola Martinucci. Due premi speciali ai soprano Magda Olivero e Alida Ferrarini. Premio speciale al soprano Mietta Sighele e premio dedicà al tenore Valeriano Luccheti.
St’ano el premio l’è stà assegnado al tenor Pier Miranda Ferraro. Nato nel 1924 ad Altivole (Treviso) l’à studià a la scola del Maestro Mirko Bonomi al Conservatorio Benedetto Marcello de Venessia e po’ al “Giuseppe Verdi” de Milan dove el s’à diplomà soto la guida del Maestro Aureliano Pertile.
EI tenor Pier Miranda Ferraro l’ è stà protagonista, in ‘na longa e prestigiosa cariera, de ben 45 òpere presentade ne i più grandi teatri del mondo. Considerado da la crìtica una tra le più bele voci tenorili de i ani d’oro de la lìrica, par tri lustri l’à imposto al mondo la so interpretassion de Otello con oltre 300 rècite; da ricordar quela difusa da la RAI in Eurovision dal palasso Ducal de Venessia. L’à cantado a fianco de le più cèlebri voci del mondo, come: Magda Olivero, Renata Tebaldi, Marcella Pobbe, Renata Scotto, Fedora Barbieri, Adriana Lazzarini, Tito Gobbi, Ettore Bastianini, Piero Cappuccilli, Nicola Rossi Lemeni ecc… e l’è stà direto da i più famosi diretori d’orchestra. Dopo vari impegni, in diverse altre cità, italiane e èstare, da 5 ani el tien Masterclass par giovani cantanti al Grande Festival de Lanciano. L’à ricevudo riconossimenti mondiali. Dal 1977 l’è pura Grand’Uff. a l’òrdine de la Repubblica Italiana.
Durante la serata è stà inoltre oferto un riconossimento speciale a la cariera, a l’amiga carìssima, mezzosoprano Adriana Lazzarini de la qual ò a longo parlado nel nùmero di giugno 1999 su Q.C., quando i g’à assegnado el premio “Una vita per la lirica – Giovanni Zenatello”. Ma par rinfrescarve la memoria: ecco le parole che g’à dedicà a la Adriana el grande maestro de spartito Ettore Campogalliani: “Ecession straordinaria de ‘na cantante che dopo aver colessionà successi in tuto el mondo, l’assiste silensiosa ai trionfi e ai tomboloni de i altri con l’educassion de ‘n spetator inparsial e conprensivo”. Dopo i studi al Conservatorio de Verona, el periodo de perfessionamento con Gilda Dalla Rizza, cantante preferida da Puccini, Zandonai e Toscanini, e po’ co ‘l Maestro Franco Ferraris, la g’a avù el debuto nel 1953 a soli 22 ani, al Bellini de Catania nel Trovator de Verdi. Nel 1955 l’à debutà in Arena ne la parte de Arnneris de l’ Aida; prima de le oltre 300 altre Amneris interpretade in tuti i teatri del mondo ne la so cariera. Interprete de esecussioni memoràbili, l’à cantà con Maria Callas, Renata Tebaldi, Magda Olivero,
Antonietta Stella e cantanti del càlibro de Mario Del Monaco, Franco Corelli, Gianni Poggi, Ettore Bastianini, Mario Filippeschi, Tito Gobbi, Giuseppe Di Stefano. Con ‘sto ùltimo, l’à cantà nel “Ballo in Maschera” a la presensa del Presidente de la Republica Giovanni Gronchi, al Teatro de I’Òpera de Roma. Gh’ è da zontarghe che l’ Adriana, veronese e sanzenata de sòca, più che passa i ani più la deventa bela e brava! Fra poco la festegiarà anca le nosse d’oro; raro esenpio de matrimonio riussido nel mondo del spetàcolo, e son sicura che tuto “Q.C.” el se associarà a mi nel farghe una montagna de auguri, a ela e al so Vitorino!
Al concerto comemorativo, po’, oferto in onor de i du premiadi, à partecipado: el soprano Lorena Campari, el tenore Rubens Pelizzari, el mezosoprano Maria Sandra Pacheco Quintero, el baritono Marco Camastra, el basso Silvio Tullio Falzoni e anca ‘na bella voce emergente: la soprano Lucia Scilipoti.
Ne l’intervallo s’è esibido el baleto “Centrepoint” direto da la coreògrafa Pia Sheridan.
Al pianoforte, la nostra sempre grande Prof. Michela Forgione.
À presentado brilantemente la serata la nota atrice Luciana Ravazzin.

Wanda Girardi Castellani