L’Angolo de la Wanda – Luglio 2003 – “CANPANE E CANPANARI; storia de n’arte e ‘na tradissión del milenoveçento”

…a cura di Graziano M. Cobelli

gcobelli05@gmail.com

Quatro Ciàcoe: da Verona

CANPANE E CANPANARI; storia de n’arte e ‘na tradissión del milenoveçento

La “rama” de l’arte l’ò sens’altro eredità principalmente dai Pomari; la faméia de me mama. Infati, me nono materno Angelo Pomari, oltre a èssar un artistico marangón, bon de far anca de ‘na cassa da morto, un capolaóro, el sonava la chitara (pura opera sua, tuta a intarsi e rissi) e ‘l faseva parte dei grupi che andava in òlta par le cese a far i concerti co’ le canpane.
Proprio in ‘sti giorni una “colega” del corso de ginastica; Laura Sancassani, la m’à fato un graditissimo omagio; el volume che ela e la só fameia i à stampado, postumo, e che l’è apunto el diario de só nono Pietro Sancassani (1881-1972) che dei concerti co’ le canpane l’è sta par tuta la vita l’organisadór, Maestro conpositór e sonadór a sistema veronese. Proprio tra le pagine de ‘stó elegante volume, stanpà da la Offset Print Veneta (Verona) e entrà in circolassión nel febràr del 2001, g’ò trovà el nome anca de me nono Angelo e subito m’è tornà in la mente quando che, pién de entusiasmo, el me contava ste esperiense sensa che mi, buteleta, ghe dasse un minimo de péso! A dirvela tuta, più che altro me interessava che’l me mandasse dal tabacàr a tórghe 10 schei de “Santa Giustina”, de “rassa macuba” o el mèso toscano che, taià a tocheti, l’usava par “cicàr”, perché de solito pò’ el me rifilava la manceta che spendevo a “moreti” de rigolissia.
A curàr l’opera de Pietro Sancassani, ricavà dal manoscrito lassà a la faméia dal Maestro e che el porta el titolo “Le me canpane”, i è stà’, come ò dito, la neoda Laura, Luciano Rognini e Giancarlo Tommasi.
El libro el se divide in dó parti: la prima l’è el diario storico nel quàl l’autór el descrive l’atività de le só squadre canpanarie par oltre meso secolo e la seconda la parla, oltre che dei só canpanari, dela fabrica dei canpanili, l’origine dele canpane, la só musica e i sistemi de sonàrle, in uso in Italia e a l’estaro. Gh’è inoltre la storia dei fondidori e tuta ‘na serie de curiosità inprontà su l’argomento.
Pietro Sancassani l’è andà a sonàr i “bronsi” del paradiso circa 30 ani fa ma el só diario el ne consente de conóssar fati e avenimenti de l’arte canpanaria a sistema veronese, dal 1892 fin a la metà dei ani “60”.
Riepilogando; la prima parte, dunque, l’è tuta dedicà a le varie partecipassioni dei só canpanari, ai premi conquistadi, a le vicissitudini e ai incidenti, gravi o manco gravi, sucessi nele anguste cele canpanarie. Particolarmente interessante l’è la seconda parte parché la ne consente de documentarse su l’origine dele più inportanti canpane, su le curiose scrite che ogniuna la se porta indosso, sui canpanari veronesi e le só fonderie. Tra le più note e inportanti: quela celebre de Luigi Gardoni, “Calzetar” e “maestro de campanò”, inventór de bronzini dal 1811 e quela dei Cavadini da dove è vegnù fora anca el canpanón de Rovereto, fuso co’l bronso dei canoni.
La più vecia canpana de Verona la se trova in Castelvecio. L’è stà regalà al Museo dal cardinàl Luigi de Canossa e l’è datada 1081. Gh’è n’è pura n’altra che la batéa le ore da la tór del Gardello de piassa Erbe quando su la Lamberti no’ gh’èra gnancora l’orolòio.
Ma tornando a la fonderia dei Cavadini; la se trovava in via XX setenbre e me ricordo quanto che la me incuriosiva, quando ero buteleta. Da ‘sta fonderia è vegnù fora tute le più grandi e le meio canpane tanto par l’ltalia che par l’estero. Co’ la piena fiducia dela comissión roveretana i Cavadini i è stà scelti anca par la rifusión e l’ingrandimento dela famosa canpana “Maria dolens”, dedicà ai morti de tute le nassioni nela guera 1915/18; ‘na canpana che dal peso de 105 quintài l’è stà portà a 160, risultando ‘dèsso la più granda e non solo dela nostra Patria!
Stó splendido volume el ne documenta anca su la nassita e l’atività de altre celebri canpane, come el nostro “Rengo”; la canpana magior dela tór Lamberti, fusa da Gianfrancesco Da Legnago nel 1394, pò’ rifusa da Gasparino da Vicenza nel 1452 e infine, nel 1557 da Alessandro Bonaventurini che’l g’à dà un tal spessór da risultar ancó, ancora come nova (42 q.li). Sancassani el ne conta pò’ la storia della seconda canpana de la Tór; la Marangona (18 quintali), pagada, nel 1294, a mò de condana (al posto del tajo dela testa) da ‘na siora, moièr de ‘n “marangon”, par aver copà co’ ‘na bala de piera in testa, destacà dal só pontesèl, durante ‘na processión, la morosa del marì; ‘na bela ma decisamente scarognà piassarota. El ché vièn a conprovàr el proverbio: “schei e amicissia sòfega la giustissia”.
Interessantissimo anca l’elenco dele iscrissioni eternà sui vari bronsi (ghe n’è par tre faciade): su le sié de san Luca, par esenpio, se lese “Ascoltami lieto che morto non mi udrai”, “piangi i morti, beneficando i vivi”, ecc… fino alla sesta: “dolce e piccina, trillo castamente”. Su una canpana vesentina trovemo i versi del Fogazzaro e in altre, versi in latin: “venite et videte opera Domini”, “Exurgat Deus et dissipantur inimici eius” ecc…
Nono Angelo a parte, ò leto con piasér “Le me canpane” e g’ò avù modo de amiràr l’entusiasmo, la fede, la braùra de Pietro Sancassani che ‘l n’à lassà un’opera che l’è de çerto unica; ‘na piera miliare!
Nel marso del 1967 el nostro l’à serà el discorso co’ ‘ste parole :”Son ancora vivo, ma la durarà poco. Saluti ai cari amiçi che me lesarà!”
‘Desso l’ò fato mi, caro Maestro, ricanbio i saluti e conplimenti!

Wanda Girardi Castellani