L’Angolo de la Wanda – Aprile 2003 – “I NOSTRI ANTENATI in mostra al museo civico… A tu per tu co’ le nostre origini, traverso le ultime scoperte nel canpo dela paleontologia umana”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

I NOSTRI ANTENATI in mostra al museo civico.

A tu per tu co’le nostre origini, traverso le ultime scoperte nel canpo dela paleontologia umana.

El museo de storia naturale de Verona (palasso Pompei, Lungadige Porta Vittoria n.9, tel.045 8033689) el s’à caraterisado, nel corso dela só lónga tradissión, par l’inpegno nela ricerca sientifica e la mostra: “I nostri antenati” l’è stà’ sicuramente uno tra i argomenti de magior  riciamo parché no’ gh’è gnente de più afassinante del studio dele nostre origini.
Sistemadi ne l’ingresso, in varie vetrine, s’à podù amiràr, arènte a reperti originài, diverse riprodussioni de resti fossili; calchi, ricostrussioni fisiognomiche tridimensionali (teste), ilustrassioni realistiche de bestie e omini preistorici e rapresentassioni virtuali otegnude co’ le moderne tecniche ancó a disposissión grassie ale tecnologie informatiche.
La storia de l’omo l’è scominçià più de 7 milioni de ani fa e dala lussuregiante cuna africana ‘stó miracolo de individuo che, pur fisicamente simile a ‘na sìmia, el g’avéa evidentemente, de questa, diverse marce in più, in poche çentinara de meiara de ani, indrissà la schena (homo erectus) e svilupà la bipedia (cioè la capacità de caminàr solo co’ i arti inferiori, roba che à lassà liberi brassi e mane de far altre atività), el s’à sparpaià, grassie ala só capacità de adatamento, par tuti i lóghi possibili de la tera. L’inteligensa, pò, de riussìr a trasformàr le materie, partida dal fato de èssarse acorto che batendo ‘na rocia silicea co’ un percussór se podea otègnar dei strumenti boni par taiàr e par altre funsioni, l’è stà fondamentàl “incipit” par rivàr a le atuali tecnologie.
Dai primi manufati (chopper, chopping, schegge), con un salto de milioni de ani, l’omo l’è passà ai microchip; spassi tenporai curti, considerando el tempo de l’orolojo biologico che scandisse el ritmo dele mutassioni!
Tanti dei reperti in mostra i è stà’ trovà nel veronese; un teritorio che presenta carateri geomorfologici particolari. La presensa de’n fiume (l’Adese) e de aree pianegianti e colinari ma siore de grote e de altri ripari, i è stà’ quantomai adati a sostègnar l’economia dele popolassioni preistoriche; fonti de aprovigionamento e de materie prime come la selce dela quàl l’è ancora possibile catàr in giro pónte de frece de tute le misure. Tuto questo in un arco de tempo compreso tra 30.000 e 10.000 ani fa nele cave de Quinsàn, de la Cà’ Verde, Riparo Mezzena e Riparo Tagliente (del qual ò parlà su Q.C. nel numaro de magio 1988).
A conpagnàr i visitadori dela mostra, con conpetensa e straordinaria sinpatia, l’è stà’ la Prof. Stefania Dussini. Grassie a ela avemo fato un fià de amicissia co’ ‘sti nostri lontani parenti, anca se portadori de nomi dificili parfin da pronunciàr: homo Habilis, homo Ergaster, homo de Daka, homo de Dmanisi, homo de Altamura, de Neanderthal, e la celebre Luçi, infìn a l’homo sapiens, rivà in scena, parón anca dele arti, solo 80.000 ani fa.
Interessante la spiegassión de come che i fa a ricostruìr la facia de ‘sti nostri antenati; ‘na tecnica che ne ridà intati i só liniamenti e parfìn l’espressión. Autori de ‘sto miracolo: Alfons e Adrie Kennis.
La visita dela mostra l’è durà poco più de ‘n’ora; un tempo curto assè par traversàr l’oceano de 7 milioni de ani! ‘Na volta in strada, però, dopo aver scorso el panorama  del nostro passà, vièn fato de dimandarse dove mai el vorà rivàr ‘stó cusideto “homo sapiens” che nel giro solo de’n secolo l’à portà quasi a la distrussión tuto quel che par milioni de ani se avéa podù veramente ciamàr “paradiso terestre”.

Dio no’ voia che nel nostro futuro no’ ghe sia un ritorno ale grote, ale frece de selce e ale pèle de pégora!

Wanda Girardi Castellani