L’Angolo de la Wanda – Dicembre 2002 – “MUSEO NICOLIS; paradiso dele machine”

…a cura di Graziano M. Cobelli

gcobelli05@gmail.com

Quatro Ciàcoe: da Verona

MUSEO NICOLIS; paradiso dele machine.

Quasi de sicuro l’è el più grande, el più completo ma, soratuto, el più belo in tuto el mondo tra i musei dele auto, dela tecnica, dela mecanica e el se trova in viàl Postumia, 37069 Vilafranca veronese, drento in ‘na vasta, aveniristica strutura in vero e aciaio. El depliant messo a disposissión dei visitadori el ne informa che ‘stó splendido museo l’è el risultado de’n sogno perseguì da mèso secolo, con passión, determinassión e curiosità dal proprietario LUCIANO NICOLIS, tra l’altro un vero protagonista del miracolo economico del Nord-Est ne l’atività del riciclo dela carta. L’amor par la ricerca e l’inclinassión al studio de tuti i congegni mecanici, g’à permesso a ‘stó simpatico personagio, sempre pronto anca a far da “cicerón” nela visita, de realisàr un percorso conossitivo de l’evolussión storica della tecnica e de la mecanica aplicà ai mèsi de trasporto, ma non solo a quei, visto che tra le só tante complete colessioni, oltre a auto, moto, biciclete e parfìn aerei, gh’è anca strumenti musicali e antichi zugàtoli. La so braùra nel capir el valór de robe considerà da càneva o, pèzo, da rotamàr, de ricostruirle in ani de passiente lavoro perfetamente, come da nove e de studiarghene la storia, la g’à parmesso de far rivìvar dei pessi unici come le lussuose “Isotta Fraschini”. Sorprendente l’è el fato che tuti sti miracoli dela mecanica e de la tecnica i è parfetamente funsionanti.
El Museo Nicolis el se articola, oltre che ne l’esposissión su tre piani, in ‘na serie de spassi tra i quai: un modernissimo auditorium par conferense e proiessioni didatico-divulgative dotà de 140 posti, colegà a ‘na saleta “Vip” che pol tegnér comodi altri 20 ospiti. Gh’è inoltre ‘na importante biblioteca con archivio dedicà a la storia del materiàl esposto, ‘na sala par le esposissioni a tema o temporanee, un book shop con publicassioni e gadgest, ‘na cafeteria, servissi e ‘na maxi-terassa panoramica.
De la grande mostra ‘na sessión completa l’è dedicà a la “Motrice Pia” (1884) de Enrico Bernardi; prima realisassion assoluta de motor a bensina. Pò’ el prototipo francese “Adventure” che nel 1882 l’à fato un viajo, andada e ritorno, oltre Manica. L’Alfa Romeo RL (1923) forte de’n motór 3000, primogenita del registro Alfa Romeo. Un’altro splendór; la “Isotta Fraschini 8 AS” (1929), lussuoso saloto viagiante pién de comodità e de acessori in argento e radica. La documentassión esposta su un legìo la descrive el lóngo, passiente percorso dela parfeta ricostrussión parfìn dele fodre.
Altre maraveje dela mecanica; “l’Ansaldo 22” (1930), (quasi me coetanea ma, de mi, in assè mèio condissioni), la “Lancia Astura mile miglia” (1938) costruì par el grande Luigi Villoresi ecc… Interessantissima anca la mostra dele moto e dele biciclete, tra le quali çerti modéi curiosissimi adiritura col fanàl a candela. Me neodi i è restà inveçe incantadi dai vari strumenti musicali e soratuto dai usignoli mecanici in gabia ben conossudi traverso la celebre rosaria de “l’usignolo de l’imperadór dela Cina”.
Che altro dirve? Ghe ne sarìa ma l’è mèio che andè a védar el resto de persona!

Wanda Girardi Castellani

(ndr) El Museo l’è verto tuti i giorni, domìnica compresa, dale 10 ale 18 (orario continuado) escluso el lùni. L’ingresso el costa: intiero euro 5,50, ridoto 4,50, scole 3,60 e, dai 6 ai 10 ani 2,50.
Se ghe riva: In auto, vegnendo fora dal casèl de Verona-nord su A22 del Brenero (km.10) – In treno: stassion de Verona Porta Nova (km.15) – Museo Nicolis – Vilafranca (Verona).
tel.o45 6303289 – fax 045 7979493