L’Angolo de la Wanda – Marzo 2002 – “Me compare Giacometo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Me compare Giacometo”

Luigi Nardo… ‘na ventà de fantasia… ‘n ‘arfià de bonumor e tanto amor par le tradissioni vènete.
L’ultimo nato da quel fecondo scritor che l’è l’amigo Luigi Nardo, el m’è rivà, fresco de stampa, soto ‘ste ùltime feste, cusÌ, co’ la so simpàtica letura, el m’à jutà a desmentegar che anca ‘sto 2001 el stava serando botega caricàndome sul gropon un altro ano de più. El titolo: “Me’ compare Giacometo”, par la Venilia editrice de Giacomo Luzzagni (Pd). Mension d’onor al premio leterario “Montemerlo” 2001. Presso de copertina; euro 13,43 (overo 26.000, moribondi franchi).”
El volume, belo anca nela vesta tipogràfica in gialo e azuro, el contien ‘na barca de cante, conte, cantilene, còcole, filastroche, sciolilengua, nine nane, indovinèi: tuta roba de casa nostra, elencada, riordinada e riproposta con amor e evidente entusiasmo dal nostro instancabile Luigi che ‘l n’à pura lassà le istrussioni par inventàrghene, noialtri, de nove. A scorar le 144 pàgine che compone el volume l’è come scrioltolarse soto al sol de magio nel giardin fiorido de la nostra infansia. Ogni cantilena, ogni filastroca la ne sveia drento momenti forsi ormai paradi in desmentegon dal sfoiarse impietoso de tanti lunari e, tra questi, se ritrova la voçe calda de la mama: “Bati, bati le manìne che rivarà papà”, quela de la nona: “Nina nana, nina nana, la putela de la mama, de la mama e de la nona”.
Eco tornar alora, sbusando le nebie più fisse, i veci zughi e i musi remenghi de tanti amissi persi par le strade ingroeià del mondo, drio el pestesar orbo del tempo: “Ma quante bele filie madama Dorè, ma quante bele filie!”… “la bela lavandaia che lava i fassoleti…”, “Andemo a la guera col s-ciopo par tera”. “Catarina dei corai, leva-sù che canta i gai…”.
L’è po’ ‘na gran bela sorpresa scoprir che çerti versi i è ‘stessi in tuto el Vèneto, salvo qualche picolessa come un “l’è”, trasformà in “xe”. “Caregheta d’oro che porta el mio tesoro…” e ci, Padovan, Venessian, Vesentin, Veronese, no l’à mai sentì salmodiar ‘ sta tiritera in casa o in stala, specie ne le note longhe e frede de inverno. La mama e el papà i incrosava i brassi a fame da caregheta e cusÌ, cantando, i ne menava in volta.
El libro, oltre a la nota de l’autor e quela de l’editor, el porta in chiusura ‘Da postfazione del noto, bravo poeta Livio Pezzato.
Luigi Nardo l’à dà a le stampe altri simpàtici e interessanti volumi: “Adio bisi” – divagassioni sui modi de dir vèneti. “Bote da orbi” – catalogo ragionado delle bote venete, da l’àmolo a la zìzola. “Basta eà salute” – erbe, diete, proverbi, cure pratiche e Santi da invocar, nel Vèneto. “E règoe del zogo” – galateo moderno in dialeto vèneto. “Ma quando penso a Padova” – fati e personagi de ieri e de ancuo. Altre pubblicassioni: “I quaderni portellati”, “Dizionarietto portellato”, “A ciascun el suo; domila epiteti veneti”, “Un borgo ciamado Portello”, “El Padovan, dissionario del padovan citadino” ecc…
Pubblicista, colaborador de tanti giornài tra i quài “El matin de Padova”, l’è nato e el risiede ne la çità del “Santo” dove che l’à insegnà par 40 ani. Eclètico, el s’à ocupà de çìnema, de leteratura infantil, de cultura padovana… e po’ …
Ma, soratuto, nel 1983 l’è stà tra quei che à fondà la nostra amada rivista “Quatro Ciàcoe”, dela qual l’è stà el primo diretor.
E ‘desso… coraio, Luigi, che spetemo de l’altro!

Wanda Girardi Castellani