L’Angolo de la Wanda – Febbraio bis 2002 – “L’onore delle armi” – Colession del Musèo de Castelvecio

…a cura di Graziano M. Cobelli

gcobelli05@gmail.com

Quatro Ciàcoe: da Verona

“L’onore delle armi” – Colession del Musèo de Castelvecio

Fin da quando el fiol de “Luçi” I’à imparà a difèndar la so caverna dal nemigo (o l’à vossù fregarghe la sua), tiràndoghe su la suca un sasso pontivo, el pensier predominante de l’omo l’è stà quel de costruirse armi sempre più parfete e micidiali: prima la clava, po’ l’arco e le frece, le balestre, le rivoltele, i s-ciopi e via…, co i canoni, i arieti, le mitralie, le bombe ecc…, fin a rivar a le atomiche e podemo star çerti che no ‘l g’à mai ‘vu l’intension de fermarse lì!
Penso che le sia queste le considerassioni che ‘l visitador el se fa nel vardar la bela mostra de “L’onor de le armi” inaugurà el 1° dicembre 2001, ne la Sala Broggian de Castelvecio, a Verona, curà da la nostra brava Paola Marini, coadiuvà da Denise Modonesi e alestimento de Alberto Erseghe.
La mostra la presenta 320 de le circa 500, tra le armi bianche e armi da fògo, militari e civili, conservade ne i depòsiti de i cìvici Musèi d’arte de Verona. Un viaio indrìo nel tempo par sete sècoli de storia tra strumenti de ofesa e de difesa; “status symbol” del potere, spesso stupendi capolaori de l’arte de la forgiadura e del cesel. La visita la se snoda ne la sala Broggian guarnì de quadri, sculture, medaie, onorificense, messi lì, con inteligensa e bon gusto, a completar l’inquadramento iconogràfico e stòrico. Le armi esposte le va da le imprese coloniali del 1890-93 in Eritrea e del 1911-12, in Libia, a la grande guera, a la guera in Etiopia del 1935-36, a quela de Spagna.
Più indrio, l’Unità d’ltalia, tra el 1848-70, fin a l’età de la Serenissima, dal 1400 a fine ‘700. Da ùltimo el periodo scaligero co’ le so armi bianche.
La colession l’è costituì principalmente da i legati de Carlo e Alessandro Alessandri (1896), de Virgilio Grossule (1904), de i Conti da Prato (1947) e del generai Alberto Pariani (1960).
Interessanti le armi de proveniensa africana, In gran parte congolesi; scudi, lance, cortèi, zagaglie. Presenti anca siàbole da samurài giaponesi e simitare del vecio impero “ottomano”. Interessanti pure i cosideti “falsi d’època” come le copie de i elmi, notevoli sforsi artigiani par gran parte de l’Otoçento.
A fine percorso, “I’arevedarse” el ne lo dà, da l’alto del so caval, ‘pena zo dal scalon, Mastino II della Scala (XIX sec) definitivamente trasferì anca lu a Castelvecio, a farghe compagnìa al so predecessor Cangrande I.

(Ndr) “L’onore delle armi” (Corso Castelvecio n° 2) l’è visitàbile fin al 7 april 2002, co’ l’orario: 9-19 (serà de luni). EI bilieto (Musèo e mostra) el costa E. 8.000 (ero 4,20). Solo mostra: E. 4.000 (euro 2,20), Studenti e grupi: E. 6.000 (euro3,10). Veci e butelti: E. 5.000 (euro 2,60). ridoto par le scolaresche E. 2.000 (euro 1,00). Le vìsite guidade par le elementari e medie E. 80.000 (euro 41,32). Par le superiori E. 90.000 (euro 46,48).
Par altre informassioni, tel. 045-8040431. Fax 045 8000804.
Veramente belo e pressioso el catàlogo Electa in vendita a E. 75.000 (euro 38,73).

Wanda Girardi Castellani