L’Angolo de la Wanda – Gennaio ter 2002 – “La pua de pèssa”

…a cura di Graziano M. Cobelli

gcobelli05@gmail.com

Quatro Ciàcoe: da Verona

La pua de pèssa

I era tempi assè difarenti da quei che stemo vivendo. Ci se fidarìa ancò a lassàr andàr in òlta, sensa scorta, i buteleti?
Mi, a 8 ani, oltre che andàr ogni tanto con me cusina, in bicicleta, a la centràl eletrica de viale Piave a trovàr me papà che ghe lavorava, me són pertegà de spesso in quel’ano, par tuto novembre, un chilometro anca par andàr a sognàr davanti a la vetrina de Palmieri, zó dal ponte Navi; la botega de zugàtoli più bela de Verona, ‘ndove che, su ‘na scansìa de vero, faséa bela mostra ‘na pua de pessa de la “Lenci”. Me ricordo che la g’aveva i oci tondi, spalancà e le ganassete rosse a l’ombria de ‘na scufieta ‘dornà de fiori, el vestitìn largo a voulan che lassava védar soto i mudandoni e ‘n ombrelìn in man. L’avevo batesà: Valentina. Si… l’èra bela come el sol ma la costava un bàito (ben 30 franchi) e mi savevo che santa Lussia l’èra poareta, almanco la mia, cusìta no’ me fasevo ilusioni! Me papà, quando che i cantava “se potessi avere mile lire al mese”, el ghe ne ciapava poco più de quatrosento dale quale se dovéa cavàrghene 130 par l’afito de casa e 50 al mese par la cambiàl dela “DKW” crompada a rate come tuto el resto: la radio Kennedy, la bici “Bottecchia” de me mama e la stua nova vegnuda a sostituìr el camìn, serà-su parché el faséa poco caldo e el ne infumegava tuti, tanto che a scola i me toléa de soya parvia che g’avèo i busi del naso perenemente neri come quei dei spassacamini.
El sior Palmieri, parón de la botega, oramai quando che’l me vedeva stassionàr davanti al vero co’ la boca vèrta, el vegneva fora a far dó ciacole. ‘Na volta l’à parfìn tolto-su la pua e l’è vegnù a farmela védar da vissìn parmeténdome parfìn de tórla in brasso. Tornà a casa ghe l’ò contà a tuti, ciamando in causa a confermàr el fato straordinario, me cusina Wilma, me coetanea, compagna de zughi e de lasaronade.
Se aviçinava el 13 dicembre, festa de santa Lussia e de tuti i buteleti de Verona. Un dopdisnàr mi e la Wilma semo tornade da Palmieri. Dio… che dispiasér! La me pua de pessa no’ la gh’èra più. Al só posto su la scansia de vero, gh’èra un paiasso vestì de rosso che’l paréa farme le sgogne, con quela só boca granda, piegà come un stegagno e el naso grosso come un pearón.
A casa no’ ò dito gnente ma son andà, co’ la scusa dei compiti, a piànzar tuta la me desperassión in casa de la Wilma. Tri giorni dopo, ale 6 de matina la Santa l’à sonà la trombeta e me són sveià co’l cór che batéa forte, anca se me spetavo el solito vestitìn nóvo indosso al puòto vecio che zà da un mese la Santa, come d’usansa, par podérghe cambiàr la pèl, la m’avéa requisì. Fóra gh’èra scuro, nevegava e mi, savate e sialeto sóra la camisa scapà, són andà in cusina andove me mama l’aveva, in pressia, co’ la legna seca e le bale de carta fato un fià de caldo.
Ela, la pua de pessa, l’èra propio lì, in pié su la tàola, ‘rènte al “piato” de dolçi e a quel udo de le frègole de polenta lassà la sera prima par el musseto. Me par de védarla ancora, coi brasseti vèrti e quei so ocioni tondi, maraveià. No ve digo che contentessa! Penso che quelo el sia stà uno dei momenti più bei de la me vita.
Solo tanti ani dopo ò savù che me papà l’avéa magnà par un mese, in centrale, pan suto par podèr métar da parte el francheto che ala matina el se toleva-su par zontarghe a quela ciòpa de pan, un fià de companàdego.
Qualche ano fa, in Gran Guardia, i à fato ‘na bela mostra de pue antiche e tuto d’un colpo me la son catà davanti, drio ‘na vetrina de cristàl. L’èra propio la Valentina, cusì come me la ricordavo e m’è vegnù le lagrime ai oci su l’onda dei ricordi de quei lontani momenti ligadi a la stajón più bela. Da drio quel vero slusènto, a le spale de la me pua ridèa me mama e ‘l me vecio, feliçi de la me feliçità e a mi m’è vegnù el strucacór, tanto che silensiosamente ò scominçià a piànsar co’ la fronte postà al vero. A sveiarme da quela me solitudine interiór che m’avèa scancelà da torno tuta la gente, l’è stà ‘na signorina in divisa: “Signora, guardi che mi sta sporcando il vetro!”
La scusa, ma quela lì l’è la me pua de pessa che, par cromparmela, me papà l’à magnà pan suto par un mese.
St’altra la m’à vardà come che se varda un che ghe manca un vènardi e mi, co’l pugno serà sul pèto che me faseva tanto ma tanto mal, son andà fóra de corsa da quela sala tornà piena de gente… foresta.

Wanda Girardi Castellani

Pua d’època

Lùcida, rosa e stàtica
faceta de “bisquì”
soto la scufia mòrbida
‘na s-ciànta descusì
sensa le cìlie, atònite
gh’è do pupile azure,
un pisseghin de efèlidi
su do pagnache dure.
La vesta longa e còmoda,
tra pissi e tra voulan,
te vardi un poco stràbica
a un tempo assè lontan.
Ne l’època de i mìssili,
de i video-game na mucia
de bàmbole eletròniche
che ciàciara… che ciucia
te si cusì patètica
epura ‘fassinante…
te me fè tornar pìcola
con ti, tornà importante
a quando le me rondini
dai orisonti neti
no’ deventava asfitiche
in celi sporche e streti
quando no’ volea cressare
par ‘verte arente al piato
l’alba de i giorno tredese
col vestitin rifato.
Desso, drio un vero, rìgido
el to facin me specia;
ti… “pua pressiosa d’època”
mi, solamente… “vecia!”.

Wanda Girardi Castellani