L’Angolo de la Wanda – Gennaio bis 2002 – “I ÇERCOLI INSANGUINADI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

I ÇERCOLI INSANGUINADI

De quel lontàn 1972 ricordo poche robe;
a GENAR: la morte del principe dei atori francesi, Maurice Chevalier e quela del nostro grande Dino Buzzati.
De FEBRAR: el teramoto a Ancona e l’abolissión dela pena de morte in California.
In MARSO: a le porte dela primavera, l’editór Feltrinelli, a Segrate, el g’à lassà le péne par ‘na carica de dinamite piassà su ‘n tralicio ma in compenso el mese dopo el grande Vitorio De Sica l’à conquistà in America el só quarto Oscar con “El giardìn dei Finzi Contini”. I precedenti: “Sciuscià”, “Ladri de biciclete”, “Ieri, ancó e diman”. Personalmente ò pianto l’archeologo C.W. Ceram (pseudonimo de Kurt Marek) autore, tra l’altro, de uno tra i 5/6 libri (Civiltà sepolte) che çercarìa de salvàr se stesse par cascàr el mondo.
Nel mese de APRIL: tra el fiorìr dei persegari, s’à inveçe suicidà a 66 ani, l’indimenticabile atór inglese: George Sanders che, tra i tanti ruoli, l’avea rapresentà quel del cusìn antipatico de Rebecca nel film de Alfred Hitchcock trato dal romanso de Daphne Du Maurier.
A MAGIO: i à copà a Milan el Comissario Calabresi e n’aereo de l’Alitalia el s’à schiantà a Palermo, a Ponta Raisi, contro la famigerà Montagnalonga, con 115 persone a bordo.
Lassa la sèna del mondo andó che l’avéa recità una tra le più bele storie d’amor, el Duca de Windsor ‘bandonando, solo causa la morte, la só Wallis Simpson par la quàl l’avea abdicà al trono.
A GIUGNO: è deventà campion continentale el mitico Mennea.
A LUIO: è stà ritrovà nela Catedràl de Santa Maria del Fior a Firense la tomba del Brunelleschi.  L’America, pò’, finalmente l’è riussì a darghe “scaco mato” a l’URSS al canpionato mondiàl de scachi.
AGOSTO: ciapa el via a Monaco le Olimpiadi più tragiche dela storia  andó, paraltro, noialtri italiani avemo conquistà ben çinque medaie d’oro.
L’èra el 5 de setembre quando, a le prime luci del dì, un grupo de 8 fedayn palestinesi i è riussì a penetràr nel vilagio olimpico sequestrando nove atleti israeliani dopo averghene copà dù.
Dal Cairo l’organisassion palestinese “Setembre nero” l’à rivendicà la “paternità” de ‘sto bruto episodio dimandando la liberassión de oltre dosènto fedayn, “ospiti” dele presóni de Tel Aviv.  Israele, rifiutando de sotostàr a le pretese dei palestinesi, l’à dimandà, par primo, l’imediada sospensión dele Olimpiadi ma le gare i è stà’ sospese solo par poche ore. El governo tedesco fasendo finta de aconsentìr a le richieste dei palestinesi l’à çercà, con un “commando” armado de salvàr la situassión col solo risultado de lassàr ala fine su la strada quindese morti; 9 ostaggi, 5 fedayn e un polissioto. A la fine, tra ati teroristici e rapresaglie, de qua e de la, i morti i è stà’ 200. Gh’è da dir che dopo trent’ani la situassión l’è cambià solo in pèso!
Penso che semo in tanti, da quel’ano, a no’ avèr più vardà la bela gara modiàl coi stessi oci de prima. È stà insanguenà, sporcà, disonorà quel che par secoli l’avéa rapresentà quanto de più puro, de più sano e belo gh’èra al mondo; el sport. Quel’avenimento el g’à vù po’ ‘na coa.
A OTOBRE quando tri dei fedayn de “Setembre nero”, dirotando a Zagabria un Boeing 727 dela Lufthansa dopo aver ciapà in ostagio 20 persone, i à otegnù la liberassion de tre guerilieri caturadi a Monaco el mese prima.
Quel tristo 1972 l’è andà avanti tuto cusì, fin a la fine… con luti, dirotamenti aerei, disastri feroviari, bombe contro un treno de sindacalisti a Latina, rapimenti esplosioni e via discorendo.
A DICEMBRE: tra el teramoto in Nicaragua e altre piacevolesse, i americani par la setima volta i è andà a romparghe le togne a la luna.
In Vaticano, tra teologi e laici s’à scadenà ancora ‘na òlta la polemica sul tema: “Esìstelo el diàolo?”
Paolo Vl l’à dito che si… el diàolo esiste, ecóme! E a vardàr anca soltanto el bilancio de ‘stó 1972 gh’è da firmàr a conferma.

Wanda Girardi Castellani