L’Angolo de la Wanda – Settembre Ter 2001 – Speciale del premio “Giuseppe Lugo” Premio Giuseppe Lugo – 2001 – “UNA VITA D’ARTISTA” al Soprano MAGDA OLIVERO
…a cura di Graziano M. Cobelli
gcobelli05@gmail.com
![](https://www.ilcondominionews.it/wp-content/uploads/2015/02/castellani2.jpg)
Quatro Ciàcoe: da Verona
Edissión Speciale del premio “Giuseppe Lugo” Premio Giuseppe Lugo – 2001 “UNA VITA D’ARTISTA” al Soprano MAGDA OLIVERO
La manifestassion la s’à svolta a “villa Vento” de Custosa, giòvedi 10 magio 2001, ale 19,30. La motivassion del premio: “El Comitato “G.Lugo” e la faméia Pezzini i à stabilì, a l’unanimità, de atribuìr, nela sede del Comitato, al ristorante “Villa Vento” de Custosa, un premio speciàl al soprano MAGDA OLIVERO, tra l’altro Presidente onorario del Comitato stesso. El celebre Soprano l’è nata a Saluzzo el 25 marso 1910 quindi, se savemo far pulito i conti, la g’à 91 ani, portadi, ve garantisso, ala “bersaliera”!
Fin da picenina l’à dimostrà de ‘vérghe notevoli qualità artistiche binà a ‘na voçe che la prometéa ben e l’à tacà presto a studiàr pianoforte con el Maestro Giorgio Ghedini e canto con el Maestro Luigi Gerussi a la scola de l’Eiar de Torìn.
El debutto la l’à fato al Teatro Vitorio Emanuele nel capologo piemontese el 31 otobre 1933 nela parte de Lauretta nel “Giani Schicchi” de Puccini. Da quel “trampolìn” l’è volada a ale spiegà verso tuti i più grandi teatri italiani con le opere: “Suor Angelica”, “Madame Butterfly”, “Boheme” e “Manon” del grande Puccini ingrossando pò’ el só repertorio con el “Mefistofele”, “Lohengrin”, “Traviata” e soratuto con “Adriana Lecouvreur”; l’opera che più l’à sentido sua, secondo el giudizio de l’autor Francesco Cilea.
Magda l’à cantà con una voçe dal tinbro squilante e ‘na musicalità più unica che rara. Oltre a tuto, grassie a ‘na cossiensa artistica ecessionàl, l’à incornisà el só splendido canto con ‘na recitassion rafinà, apassionà e sensibile che g’à frutà, da parte del publico, oltre che dala critica, la fama de “Signora dela lirica”.
Nel 1941, dopo el matrimonio, l’è stà distante dale sène par 10 ani, ritornandoghe pò’ nel 1951, dopo le continue insistense del Maestro Cilea che’l la voléa ancora a interpretàr la só Adriana.
In seguito l’à arichì el só zà vasto repertorio con opere come “La faciulla del West”, “Iris”, “Fedora”, “El tabàr”, la “Wally” e “Tosca”. Da quela grande, versatile artista che l’è, la savù interpretàr anca opere moderne come “La guera” de Rossellini, “I dialoghi dele carmelitane” de Poulec, la “Celestina” de Testi e altre.
A l’estero l’à calcà le tòle dei più importanti palchi e l’è stà dapartuto acolta quasi con idolatria, in particolàr nei Stati Uniti, fin dala prima aparissión a Dallas nel 1967 ne l’opera “Medea” de Rossellini.
Nel 1975 al Metropolitan de New York, l’à cantà la “Tosca” con un tal successo che parfin l’orchestra l’à dovù fermarse par diversi minuti, fin che’l publico no’l s’à stracà de aplaudìr! Nel 1979, da novo ciamà al grande teatro americàn par el Met-tour nei States, la g’à avù a fianco, sempre ne la “Tosca”, Luciano Pavarotti.
Tanti e de grande sucesso anca i concerti che l’à portà a Caracas, San Francisco, Verona, Parigi, Parma, Barcellona ecc… fin al marso 1981 quando l’Ente Autonomo Arena de Verona el l’à riciamà sul palco del Filarmonico par recite de musiche de Poulenc e Malipiero, saludà dai giornài co’ la definission de “Gran mostro sacro del nostro canto”.
Inumerevoli i è stà’ i premi che l’à ricevù ne la só cariera e tante i è stà’ le partecipassioni a giurie dei più prestigiosi concorsi per giovani cantanti lirici.
‘Desso anca el Comitato “G.Lugo” l’à volù premiarla con la bela anbitissima targa, incisa dal nostro Maestro orafo Angelo Antoniazzi, su disegno del Maestro Luciano Pollini.
Wanda Girardi Castellani