L’Angolo de la Wanda – Giugno bis 2001 – “EI Premio “‘Na vita par la lirica – 2001”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“EI Premio “‘Na vita par la lirica – 2001”

consegnà al soprano Mietta Sighele e a so marì, el tenor Veriano Luchetti.

Ne la splendida, storica sala del circolo Uficiài, in Castelvecio, el 22 de apriI de ‘st’ano è stà consegnà el premio “Na vita par la lirica” a ‘na copia de artisti, cubià ne la vita come ne l’arte; el sopran Mietta Sighele e ‘l tenor Veriano Luchetti.
L’importante premio anual, istituì dal Cìrcolo “Amissi de la lirica Giovanni Zenatello” el conclude a la grande la stajon artistica 2000-2001; ‘na stajon che l’à visto sfilar sul nostro palco nomi importanti, ma anca nomi novi che, propio da ‘sto “tranpolin” i à, el più de le olte, ciapà el volo verso la fama ne i più grandi e famosi palcossènici del mondo.
EI premio “Zenatello”, opera pregevole del maestro orafo Angelo Antoniazzi, l’è stà consegnà, a nome del Circolo, dal Sovrintendente de la Fondassion Arena, Renzo Giacchieri.
Mietta Sighele e Veriano Luchetti, i du cèlebri cantanti romani (ma ela l’è nativa de Rovereto), come ò dito, unidi, ne l’arte e ne la vita, ghe i avemo avù spesso in sèna ne le stajoni liriche areniane dal 1977 fin al 1991. Ela, I’è atualmente diretrice artistica del concorso intemassional par giovani cantanti lirici “Riccardo Zandonai” e, tuti do, i è anca docenti de canto in vari corsi de perfessionamento e i partecipa ai “masterclasse” che ogni ano se fa al “Musica Rivafestival” de Riva del Garda.
A vèrsar la manifestassion con un saludo a la sala, a le autorità e ai artisti presenti, tra i quài la nostra sempre splendida Adriana Lazzarini, l’è stà el Presidente Nando Tavoso Spezie che, dopo i vari ringrassiamenti, primo fra tuti al Maestro Luciano Pollini, fotografo e memoria storica del Circolo, l’à anca puntualisà, a ciare letere, che l’unico premio “Zenatello”, avalà e autenticà da la fiola del grande tenor veronese, (al qual dovemo, tra l’altro, l’idea de organisar, dal 1913 in qua, i spetàcoli lìrici ne l’anfiteatro veronese), l’è el nostro!
A impiturar po’ el ritrato artìstico de i festegiadi, è vegnù al microfono el critico del giomal “L’Arena”, dot. Villani.
I du cantanti i s’à esibì, soto la diression de i più grandi tra i diretori d’orchestra, in tuti i più grandi teatri del mondo con un repertorio vastissimo che liga in un ideal “bouquet” Verdi, Puccini e i altri operisti romantici, a Spontini, Cherubini ecc…
Al concerto in onor de i festegiadi che è seguì a la premiassion, à partecipà el soprano Annunziata Lia Lanteri, el tenor Alex Magri e el baritono Nicolò Rigano, tuti tri, come sempre, compagnà al pianoforte dala bava prof. Michela Forgione.
À presentà el memorabile concerto Cristina Chiaffoni, preparada, spiritosa e simpatica quanto mai.
El concerto, scorninçià co’ n’aria da i Puritani de Vincenzo Bellini, eseguì magistralmente dal giovane ma za maùro baritono Nicolò Rigano, l’è po’ andà via, lissio come l’oio, con altre romanse da Donizetti, Gounod, Puccini, Verdi e Mozart, ogniuna coronà da longhi, entusiasti batiman.
Gh’è da dar ato, ancora ‘na òlta, che ‘l Circolo “Amiçi de la lìrica, Giovanni Zenatello” l’à dà prova del so amor par l’arte lirica, l’entusiasmo, la conpetensa e la parfeta organisassion.
Un aplauso, alora, soratuti a Nando Tavoso che de tuto quanto s’à dito e fato l’è, da ani e anori, l’instancabile “deus ex machina”.

Wanda Girardi Castellani