L’Angolo de la Wanda – Ottobre bis 2000 – “”NOVANTAUN… MA NO’L LI DIMOSTRA”
…a cura di Graziano M. Cobelli
gcobelli05@gmail.com
![](https://www.ilcondominionews.it/wp-content/uploads/2015/02/castellani2.jpg)
Quatro Ciàcoe: da Verona
“NOVANTAUN… MA NO’L LI DIMOSTRA”
Quando a l’ultima setimana de magio me sio Gino, classe 1909, unico fradèl de me pòra mama, el s’à presentà a la visita par rinovar la patente, i “adeti” i à fato dú oci ch’i paréa dú ferài a carburo! A novantaun ani el pretende de guidar ancora la machina?
Però… òstrega, lu el ghe vede meio de ‘n’aquila… el ghe sénte benon, el s-ciopa de salute e l’è tutaltro che rimbambido. Insoma, la patente ghe la dovemo propio rinovar… e el se conserva senpre cusì!
Che me sio Gino Pomari el sia un “foraclasse” l’émo sempre savù, figurève che 5 ani fa l’à ciapà ‘na multa parché l’andava a balar in discoteca co’ la morosa sentà sul “stangon” de la bicicleta. Al vigile che’l l’à fermà el g’à ‘vù el coraio de dirghe, schersando come el so solito: “Ma el vàrda che ‘sta quà l’è ‘na bici da dona!”
La morosa che la g’à 15 ani manco de lù, ‘dèsso l’è ricoverà in ‘na casa de riposo e me sio co’ la só vecia “126” azura, el la và a catar ‘na òlta al mese cucàndosse 60 km tra l’andar e ‘l tornar.
Gh’è da dir che da giovane l’à fato dele gare ciclistiche rivando tra i primi diese. Sempre in sela a la so bici, l’andava in visita dai parenti a Milan e a Schio. Nel 1941, in tempo de guera, l’è vegnù a catar anca la me fameia a Aviano dove che s’èrimo trasferì par stàr ‘rènte a me papà che’l faséa el pilota sui “Breda”. Me ricordo che ‘na me amigheta, un fià spaentada, l’è vegnù a dirne che fora, rivà in bici, ne çercava un tale che’l paréa un “becamorti”. Viste le condissioni de le strade a quei tenpi, figùreve come che l’èra consà me sio, tra pólvar e sudor!!
Paraltro, a córar in bicicleta ghe n’èra altri in faméia; Flaviano Vicentini (de la sòca de me nona) l’avea vinto el campionato del mondo cat. diletanti e me cusìn, Walter Pomari, l’aveva vinto anca lu de le corse, nei ani ’50.
Scartà al servissio militar par insuficensa toracica (?) me sio i l’avéa messo al servissio civile, ne la “UNPA”, adeto a iutar la gente nei rifugi antiaerei, a scavar tra le macerie par tirar fora morti e feriti e via cusì. El circolava co’ ‘na tuta, un elmeto e un siguréto tacà a la cintura e, longo e seco come l’è sempre stà… el fasèa la só bela figura.
In tempo de pace la só profession l’èra quela de marangon e, in cubia con me nono, el g’avéa un bel laboratorio in via Cantarane. Tra mobili, asse da paparele, mèscole, panare ecc… el faséa anca le casse da morto e noialtri buteleti se ghe andavimo a scondar zugando a “Coto”.
Malgrado l’età, qualche laoreto el lo fa ancora, specie par el picolo esercito de le vedove che ghe stà de casa intorno, nei camilioni. Quando ghe dimando: “Ma te pàghele?”, de solito el ride soto i mostaci e el me struca de ocio; èlo o no èlo ‘na macia ???
Come “hobby” me sio el g’aveva quelo dela musica e del canto. El s’avèa fato un bel fonografo a tromba, tuto intarsià e el g’avèa pura ‘na scariolà del dischi dei ani vinti: “Balochi e profumi”, “Vipera”, “Feriera”, “Miniera” ecc… I più cantà da Tino Franzi; ‘na celebrità de l’epoca. A tempo perso el giustava le careghe al cine “Miola” (“L’Italia”, a porta Vescovo) cusì tuti noialtri; me sia Rina, i so tri fioi, mi, me fradel e i me veci, entràimo tuti a maca.
Tuti i ani (prima e dopo la guera) el se presentava al maestro Cusinati co’la speransa de entrar nel coro de l’Arena. El se pareciava davanti al pianoforte; ‘na man sul pèto e quel’altra a mulinar ne l’aria, e el tacava “Ch’ella mi creda libero e lontano” da la Fanciulla del West de Puccini. Naturalmente Cusinati gnanca el ghe l’à faséa finir par no’ ris-ciar ‘n’infarto. Sempre scartà, el se consolava andando in comparsa. Me mama la me contava che ne “Gli Ugonotti” de Giacomo Meyerbeer (1933) so fradel, in sèna, l’èra visibile come un girassol in un canpo de gran, longo piassè de tuti, co’ ‘na paruca fin a mesa schena a rissoli rossi che i faséa contrasto con le soracilie nere, fisse come ‘na sésa; roba da farse, da le sganassade, la pipì in braghe. Lu el ne contava che a quei tenpi l’èra prudente scondarse i schei ne le calse parché, a difarensa de ancó, che va in conparsa generalmente dei studenti, gh’èra de quele “tèpe” da ‘vèrghe paura.
Par ani me sio Gino l’avea sonà la fisarmonica insegnandome a dopararla anca mi. Insieme, pena finì la guera, andavimo a sonàr ne le feste da balo. Strassi tuti du, i ne “tolerava” pì che altro al circolo dei comunisti, anca parché i ne pagava al massimo con un panetin co’ la bondola e qualche goto. L’è stà lì che ho conossù me marì che, armà de megafono, el se sgolava a dir “Le compagne sono pregate di far ballare i militari”. Beh… ‘na sera m’è vegnù un dubio: “Sio Gino, ma cosa steto sonando? – Un valser! …ma se mi sto sonando la “Cumparsita”! (tango). Insoma, i bala… no? E alora tàsi che va ben cusì.
Qualche ano fa gh’è vegnù la nostalgia del “zum-papà” “zun…papà (la sinfonia che’l tacava quando che’l se desmentegava la musica).
Beh, el s’à cronpà n’altra fisarmonica e dèsso el la sona in tute le ocasioni, specie ne le festine da balo a le quale no’l manca mai, sia che i le organisa in çità che in provincia. El taca a balar quando l’orchestra la sfodra i strumenti e el la mòca quando che la i è mete ‘ìa. Dove che’l va l’è conossù e no’ ghe manca de çerto le balarine che le se lo disputa spesso barufando ma me sio Gino una a la òlta, democraticamente, el le fa balàr tute. Se gh’è ‘na çena o un rinfresco, el ghe fa onor a la grande, el magna de tuto e el digerisse anca i quarèi! La roba però che ghe piase de più i è i pomi (par gnente el se ciama Pomari) e l’è ‘na vita che’l ghe ne fa fóra ‘na casseta a la setimana. Vuto védar che el segreto de la so salute e la so longevità l’è propio quèl?
“Un pomo al giorno el cava el dotór da ‘torno” e figuremosse se al posto de ùn, se ghe ne magna ‘na sesta!!!
Paraltro, me papà a me sio el ghe ciamava “el pacifico” parché l’è propio de quei che se casca el mondo… i se tira in là.
Wanda Girardi Castellani