L’Angolo de la Wanda – Settembre 2000 – “Rita Chincarini – “Sognando in blu””

…a cura di Graziano M. Cobelli

gcobelli05@gmail.com

Quatro Ciàcoe: da Verona

Rita Chincarini – “Sognando in blu”

Che i colori i g’avesse pecati e virtù, l’ò senpre savudo. Par esempio, el celeste, in tute le so sfumadure, come ‘n àrfio de incenso in te ‘na cesa, el mete drento la chiete. Sarà par questo che quando son andà fora dal spassio espositivo de la Soc. Bele Arti in piassa Dante (o “dei Signori”) dopo aver visità la mostra de quadri de la pitrice veronese Rita Chincarini, qualche tenpo fa, me sentivo, oltre che piena de entusiasmo, in paçe col mondo intiero.
Sì, parché Rita quando la pitura le so splendide tele, prevalentemente la usa farlo pociando i penèi ne la taolossa del celo in quela del nostro Garda incantado!
‘Na roba che salta sùbito ai oci l’è la caraterìstica de quasi tute le figure feminili: quela de no’ ‘verghe liniamenti. L’artista la vòl che sia la gente che le varda a dàrgheli; ogniuno a proprio gusto e fantasia… ogniuno lassàndosse guidar da i propri sogni e soratuto da i oci del cor, cusì che tuti i se le senta sue.
Tra quei aerei veli da le mile sfumadure che va dal blu più fondo al più tènero de i celeste, se “move” morbide, misteriose figure…
Digo: “se move”, parché l’è questa la sensassion che se prova nel vardarle. La baIa sul serio Salomè, liberàndosse nel movimento de la dansa da i proverbiali sete veli e, cusì pura, le nina a piàn i so tati, le mame che quasi te par de sentirle cantarghe la vecia, mai desmentegada “nana” de la nostra infansia.
Da quando, “forgià” dal Maestro Antonio Nardi, l’è vegnù fora da l’ Academia Cignaroli, vivaio veronese de grandi artisti, dal 1956 a tuto anco, tra concorsi e coletive, in Italia e a l’èstaro, la ghe n’à fato ‘na sessantina.
‘Na trentina le “personali” de sucesso, recenside su vari importanti giornài e riviste.
‘Sta straordinaria artista la g’à ‘vudo el plauso de cèlebri giornalisti e scritori, come: Lionello Fiumi, Alberto De Mori, Giuseppe Faccincani, Licisto Magagnato, Carlo Rigoni, Adalberto Scemma, Gian Luigi Vercellesi, Carlo Caporal e tanti altri, tra i quai el fondator del Cenàcolo de Verona, Bepo Spela (Giuseppe Barni) e la più nota tra le firme de la rivista “Vita Veronese”, la brava Jole Simeoni ZanolIo.
Personalmente, pur puntualisando che no’ son un critico, digo che i quadri de la Rita i me piase tanto e… tuti!

Wanda Girardi Castellani