L’Angolo de la Wanda – Luglio bis 2000 – “Le CasteIane e i Spadarini 2000”
…a cura di Graziano M. Cobelli
gcobelli05@gmail.com
Quatro Ciàcoe: da Verona
Le CasteIane e i Spadarini 2000
A Soave, el cortil d’onor del bel castel scalìgero che incapèla el romàntico borgo medioeval fodrà de vigneti conossùi e apressà in ogni canton de la tera, ancora ‘na òlta, domìnica 21 magio, ano domila, za ale 4 de dopodisnar l’èra pien come un ovo. Un’ ora dopo, entrà el coloradissimo cortèo de dame, cavalieri, mùsici, sbandieradori, tamburini e trombetieri, tuti paludà in lussuosi vestiti; moda “1300”, è scominçià el spetàcolo che oramai da trent’ani se sròdola, tra soni e bali, intorno a le “neo Castelane de Suavia” e ai “neo-Spadarini”; ‘sti qua, eleti a far da “scorta armada” a le “castelane” (anca se, visti i tenpi che core, più che de’n “spadin” sarìa el caso de fornirli de’n mitra). A èssar intronisà, ‘ sto ano, i è stà 6 dame e 3 cavalieri: Madona Ada Cittellani Piantoni, Dama del vin de la Franciacorta; Madona Anna Roncolato, Dama del vin, ne la nota azienda agricola soavese; Madona Giuseppina Tomasi Napolitano, “public-relations” e ambassiatrice del vin de Soave nel mondo; Madona Elisabetta Tosi, laureada in filosofia a l’Università de Padova, giornalista ne le reti Mediaset e scritrice; Madona Maria Antonietta Ventre, Presidente de la Fondassion intitolà a la sorela, la rimpianta Mariele Ventre, organisatrice e Maestra del celebre coro de l’Antoniano de Bologna (‘sta Fondassion la se òcupa de dar aiuto e protession a l’infansia); “dulcis in fundo”, la grande soprano Madona Katia Ricciarelli, notissima, unanimemente riconossù come una tra le più grandi soprano del mondo. A ricevar inveçe la “spadina”, i è stà tri spadarini de corte: Pierluigi Bolla, de la cantina Bolla; Don Bruno Fasani, diretor de “Verona Fedele” e Alberto Gastagneti, diretor tècnico de la squadra italiana de nuoto, a le Olimpiadi. L’organisassion l’è stà opera de la splendida e ardita imperial Castelana, Nenè Lovat e del so ativissimo staf de bele e bràe Castelane. Da l’alto de la scala d’onor, a condur la vivacìssima cerimonia, atornià da ‘na diesina de trombetieri, è stà, come ogni àno “L’araldo”… cioè, mi!!
Wanda Girardi Castellani
