L’Angolo de la Wanda – Maggio 2000 – “VITA DA CANI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“VITA DA CANI”

‘Na olta, el “mèio amigo de l’omo”, generalmente tacà co’ ‘na cadena curta, più che caresse e qualche bel’osso, el ciapava peàde e randelà. Gh’è stà tenpi, anca bastansa recenti, nei quai, el paron, el “ciapacani”, ma anca un qualunque, el g’avèa el dirito de coparlo “a colpi de baston o con altre armi, escluse quele da fógo”, spece se riconossudo o anca solo sospetà de idrofobia.

In ‘sti giorni m’è capità in man un “aviso” firmà, in data 15 lùio 1808, dal Prefeto Presidente de Verona, Thiene.
‘Sto aviso (n° 1437) del “Regno d’Italia” el snosèla le diese regole, pitosto dure, che la Comission de Sanità del Dipartimento de l’Adese, in riferimento ai cani, el ghe inpone ai so paroni ma anca, come vedaremo, a tuti i citadini; “dissipline che g’à el scopo de scansar el possibile svilupo, e conseguenti funesti efeti, de la rabia”.
Par prima regola i cani i dovéa, anca alora, andar in olta munidi de colar (de palete no’ se parla), marcà in modo indelebile e visibile con tanto de nome de la bestia e del paron. Qualunque can a spasso par le publiche strade sensa ‘stó parecio, dopo tri dì da la publicassion de l’aviso, el g’avéa da éssar copà sul posto.
‘Na regola simile l’è stà’ aplicà, se no’ ricordo mal, ‘péna finì l’ultima guera e son stà’ purtropo presente a la sopression de’n cagneto, quela òlta a colpi de rivoltela, da parte de’n “ciapacani”, su le scale de l’Asilo Camploy.
Ma tornando a l’aviso del 1808, scominçiemo col dir che le multe, par i non adenpienti, le andava da le sei lire italiane a le setanta, oltre che a l’aresto, in rason de lire italiane 2,50 par ogni dì. Prima de tuto gh’èra da stabilìr se’l can l’èra san o idrofobo e in ‘stó caso i sìntomi i èra cusì descriti : malinconia, rifiuto del magnar e soratuto del béar, poco o nissun sòno, oci tòrbi, rece e coa basse, bava a la boca, lengua rosso-scura, peli rufà, ecc… Se la bestia la presentava tute ‘sté carateristiche, se g’avea da coparla subito come anca tuti i altri cani che fusse vegnù a contato con ela. Se el morsegon l’èra inveçe ciapà ‘na persona, no’ gh’èra (Diograssia) l’obligo de coparla a randelade. La dovéa solamente avertìr dotori, preti o chirurghi; el primo sotoman, che a so volta i g’avèa da denunçiar, de corsa, el caso a la Deputassion Comunal che se incaricava de tegner de ocio el “smorsegà” e far el raporto sui metodi de cura messi in pratica.
El terso articolo del’aviso l’è el più curioso. El dise, testualmente: “Tuti i aventi botega verta nel Comune de ‘sto dipartimento, i dovarà, un giorno dopo la publicassion del deto aviso, tegner senpre su la porta un vaso de aqua pura che la dovarà èssar giornalmente ricambià, onde i possa i cani beararse a volontà. Ogni contravvension la sarà multà con lire italiane sei. Inacorsendose, oltretuto, subito, quando che un can el girava al largo da l’aqua, el botegàr el podéa denunçiarlo o anca provédar lu ‘stesso a cavarlo da le spese”.
Beh… de ‘sto articolo ò catà el segno ai pié de le pseudocolonne del bel palasso Maffei che ghe fa da sfondo, incoronà da le statue de Ercole, Giove, Venere, Mercurio, Apollo e Minerva, a la piassa de le Erbe. Se trata de tri “bearini” rotondi e fondi come ‘na scudela, scavà nel marmo. Probabilmente in giro par Verona ghe ne sarà dei altri. Podaressimo pensar che anca le dó banchetine de piera, scavà nel mèso, a drita e a sanca de l’hotel Accademia le g’avesse el ‘stesso scopo. Ma no! Quel scanso l’è stà’ fato par inpedirghe e un celebre imbriagon veronese; el “Tòmaci” (Luigi Tomici), fachìn de stassion, de sentarse lì a rònparghe le suste a quei che passava, dopo aver portà drento le valise dei clienti. Ma questa l’è n’altra storia!
Dulcis in fundo, tornando al palasso Maffei, oltre ai tri curiosi “bearini”, tra le altre belesse, gh’è a l’interno la più grande e splendida scala a “bogonela”, forsi del mondo!

Wanda Girardi Castellani