L’Angolo de la Wanda – Dicembre 1999 – “Capitèi”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Capitèi”

Me ricordo, ancora co’ granda emossion, n’edicola de la Vergine, iluminà da ‘na feta de luna filtrà traverso nùvole che no’ inprometeva gnente de bon. La m’èra aparsa na note come par miracolo a ‘na curva de’n pericoloso sentiér che’l se ranpegava sul Teide, el più alto vulcano d’Europa, a Playa Des Las Americas.
Mi e me fiol stavimo andando, co’ ‘na “fora-strada” tolta a nolegio, al noturno apuntamento co’ na celebre cometa; la Halley, (vedi Q.C. n°6 del 1986). No’ conossevimo la strada e, in mancansa de lampioni e de case, se ‘ndava avanti quasi a l’orba, col cor in gola e co’ i oci in man!
Subito però, a quel’incontro inaspetado, la paura de l’ignoto la s’èra sfantà come un banco de nebia spassà-via da ‘na folà de vento e, dopo vardà la Madona, alsando finalmente i oci se semo inacorti che’l cel l’èra fodrà da tante de quele stele, come no’ l’avèimo visto mai! Cusì, a ogni angolo de mondo cristiàn, par quanto de foravia, dove me són catada,  senpre ò incontrà un capitèl a riunirme con el fil ideàl de la pietà, tirà traverso tere, monti e mari, a la me casa- cesa distante.
Come el frate cociarol (questuante) che va a la çerca, són andà avanti cusì, scavando dapartuto con amor, nei cantoni  sepelidi ne la memoria dei più, a la ricerca de quele picole oasi de’n tenpo pacifico che le stà lì, spesso da secoli, scancanade e sbiadide, a dimostràr la continuità de la fede e dela devossión. Le parla a piàn co”na voçe che solo l’anima, quando che tuto intorno tase, la pól sentir e le ne conferma  che tuto quanto l’è stà de bontà e de belessa, no’l sarà mai del tuto scancelà né desmentegado.
Çertune, specie in Grecia come a le Canarie, le g’à drento ogeti pressiosi riparà solo da ‘na sportelina de vero gnanca inciavà. Epur nissuno se àrdega a robàr!
Si; l’è senpre ‘n’esperiensa grande rivar a conossar i trati spirituài de ‘n popolo che se mostra e se rivela traverso le spesso umili ma senpre genuine manifestassioni de l’anima, come i capitèi; “i fioi più picenini dei santuari e de le cese” da le più grandiose a le più grèse e scónte.
A la conossensa de la storia ne l’espression artistica che rapresenta i carateri più civili e aparissenti de’n grupo etnico, se alinia tute quele altre forme minori de vita pratica e morale, come la lengua, i modi de dir, i usi, le tradissioni, i canti, le legende, le feste, i riti e le cerimonie che ghe ne forma el substrato inconfondibile.
Mai come de sti tenpi el terén l’è aparso cusì fertile al recupero e a la rivaludassion de’n tal genere de studi e devossioni. Epura ne sucede ancora de passar davanti a n’edicola sacra par diesine de ani sensa védarla  o, notandola de spianso, sensa mai, gnanca par un minuto, fermarseghe davanti.
Bisogna inveçe, ne la corsa senpre più frenetica de la vita moderna, inporse ‘na sosta, se non par ‘na orassion, almanco par un saludo come se usa far quando se incontra ‘n amigo! Un saludo come se faséa da butini; la man amorosamente compagnà nel segno de Croçe da quela de nostra mama. Nè podarìa bastàr par ritrovarse con Dio e soratuto, con noialtri ‘stessi!
Davanti a la Madonina sul canton de casa mia, tute le matine a bonora sosta a pregar el me vecio dotor, portando a spasso el can.
La Luigina Tavi, una che “vive” de poesia, oltre che a saverde scrìvar (e ben), al só capitel de senpre, dopo aver predicà par ani che a causa de crepi ghe piove in testa a la mama del Signor, sicome nissun gnancora g’à risposto, a la fine la g’à messo par de soravia ‘na só onbrela giala che, oltre riparàr “l’inquilina”, la ghe dà l’ilusion che, inverno e istà, giorno e note, ghe splenda par de sóra el sol.

Wanda Girardi Castellani